កិច្ចពិភាក្សាពង្រឹងផលិតភាពកសិកម្ម ការចិញ្ចឹមសត្វ និងការដាំដុះ
- ភ្នំពេញ
រាជធានីភ្នំពេញ ៖ លោក សាយ សំអាល់ រដ្ឋមន្ត្រីក្រសួងបរិស្ថានបានអនុញ្ញាតអោយលោកជំទាវ លីអឹកា រ៉ូឌ្រីហ្គេ បារីយ៉ូស (Liurka…
រាជធានីភ្នំពេញ ៖ លោក សាយ សំអាល់ រដ្ឋមន្ត្រីក្រសួងបរិស្ថានបានអនុញ្ញាតអោយលោកជំទាវ លីអឹកា រ៉ូឌ្រីហ្គេ បារីយ៉ូស (Liurka Rodriguez Barrios ) ឯកអគ្គរដ្ឋទូតនៃសាធារណៈរដ្ឋគុយបា ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅរសៀលថ្ងៃ ទី១០ ខែកក្កដា ឆ្នាំ២០២០ នៅទីស្តីការក្រសួង។
នៅក្នុងឱកាសនោះ លោកជំទាវ ឯកអគ្គរដ្ឋទូតបានថ្លែងអំណរគុណដល់ឯកឧត្តមរដ្ឋមន្ត្រី ដែលបានអនុញ្ញាត និងឆ្លៀតឱកាសចំណាយពេលវេលាមានតម្លៃជួបសំណេះសំណាលការងារជាមួយលោកជំទាវ ហើយលោកជំទាវមានសេចក្ដីសោមនស្សរីករាយដែលបានមកបំពេញបេសកកម្មការទូតលើកទី១ នៅព្រះរាជាណាចក្រកម្ពុជា ។
នៅក្នុងអាណត្តិបេសកកម្មនេះ លោកជំទាវរំពឹងថា នឹងអាចសម្រេចបានលទ្ធផលជាច្រើនលើកិច្ចសហប្រតិបត្តិការទ្វេភាគី ជាពិសេសលើវិស័យកសិកម្ម និងអប់រំ ។ ជាកិច្ចស្វាគមន៍ លោករដ្ឋមន្ត្រីបានមាន ប្រសាសន៍ថ្លែង អំណរគុណចំពោះជំនួយរបស់ប្រទេសគុយបា នាពេលកន្លងមក ជាពិសេសការផ្ដល់អាហារូបករណ៍សិក្សានៅប្រទេសគុយបា និងជំនួយផ្សេងៗទៀតលើវិស័យកសិកម្ម ។
លោកសង្ឃឹមថា នៅក្នុងអាណត្តិរបស់លោកជំទាវ កម្ពុជា-គុយបា នឹងអាចបន្តកិច្ចសហប្រតិបត្តិការបន្ថែមទៀត ជាពិសេស បច្ចេកវិទ្យាជីវសាស្ត្រ (Biotechnology) លើវិស័យកសិកម្ម និងវេជ្ជសាស្ត្រ ។ លោករដ្ឋមន្ត្រីស្នើឱ្យមានជំនួយលើការលើក កម្ពស់ ជីវភាពប្រជាពលរដ្ឋក្នុងសហគមន៍តំបន់ការពារធម្មជាតិ តាមរយៈការពង្រឹងផលិតភាពកសិកម្ម ការចិញ្ចឹមសត្វ និងការដាំដុះ (ពិសេសដំណាំស្ករអំពៅ) ។
បច្ចុប្បន្ន ក្រសួងបរិស្ថាន កំពុងជំរុញការដាំដុះ Soft wood ដូចជា អាកាស្យា និងម៉ៃសាក់ ជាដើម ហើយកំពុងពិនិត្យលទ្ធភាពលើការជំរុញការដាំដុះផ្លែលម៉ើ (Dates) ផងដែរ។
លោក រដ្ឋមន្ត្រី គ្រោងនឹងរៀបចំឱ្យមានការជួបជុំមួយ ដោយមានការចូលរួមពីស្ថានទូតទាំងអស់នៅកម្ពុជា និងវិស័យឯកជន (ផ្នែកកសិកម្ម) ដើម្បីជំរុញភាពជាដៃគូបន្ថែមទៀត ៕
ចែករំលែកព័តមាននេះ