ខេត្តបន្ទាយមានជ័យ ៖ មិនដឹងថាមកពីកម្មផលឬយ៉ាងណានោះទេ? ប៉ុន្តែក្រោមមេឃតែមួយ បែរជាមនុស្សខ្លះរស់នៅទាំងវេទនាភ្នែកទៅវិញ។ ជាក់ស្តែងក្រុមក្មេងៗអាណាថាមួយចំនួននៅក្រុងប៉ោយប៉ែត គេសង្កេតឃើញដើរដេកអាណាធិបតេយ្យ និងក្មេងខ្លះពេលថ្ងៃកាន់ថង់មានកាវខាងក្នុងដើរហិតព្រោងព្រៀតតាមទីប្រជុំជនក៏មាន។
ក្មេងអាណាថាទាំងនេះមួយចំនួនធំដើរសុំទានលើទឹកដីកាស៊ីណូ និងមួយចំនួនតូចដើររើសអេតចាយ ហើយពេលយប់ពួកគេដល់ទីណា គឺដេកនៅទីនោះ។ ជួនឃើញដេកតាមតូបលក់បង្អែម ឬតូបចាប់ហួយ ខ្លះដេកតាមសំយ៉ាបផ្ទះអ្នកស្រុក និងលើទឹកដីកាស៊ីណូទៀតផង។ ក្មេងអាណាថាទាំងនេះ ពេលសាកសួរពួកគេមិននិយាយស្តីអ្វីឡើយ ហាក់ដូចលាក់លៀមពីប្រវត្តគេ និងក្រុមគ្រួសា។
បើតាមប្រភពខ្លះបានឱ្យដឹងថា ក្មេងខ្លះធ្លាប់ត្រូវបានអាណាព្យាបាលយកទៅផ្ញើមណ្ឌលរបស់អង្គការ ដើម្បីបានរៀនសូត្រនៅវិជ្ជាជីវៈផ្សេងៗដែរ តែមិនដឹងថា យ៉ាងម៉េច ទើបពួកគេនៅតែចង់លួចលាក់រត់ចេញពីមណ្ឌល រួចបន្តដើរដេកអាណាធិបតេយ្យដដែល។
អ្វីដែលគួរឲ្យបារម្ភ ទៅថ្ងៃអនាគត គឺក្មេងៗទាំងនេះអាចនឹងជួបគ្រោះអវិជ្ជា ជាពិសេសបញ្ហាសុខភាព ព្រោះតែទាំងការញ៉ាំ ទាំងដេក គឺគ្មានអនាម័យ និងប្រឈមមូសខាំរាល់យប់ទៀតផង។
អ្នកស្រុកក៏អំពាវសុំអាជ្ញាធរ និងអង្គការពាក់ព័ន្ធ មេត្តាជួយពិនិត្យមើលបញ្ហាខាងលើផង ដើម្បីឲ្យក្មេងៗទាំងនេះក្លាយជាទំពាំងស្នងឬស្សីដ៏ពិតប្រាកដ ដើម្បីកុំឱ្យក្លាយជាទំពាំងស្អុយទៅថ្ងៃអនាគត។
គួររំលឹកថា ករណីក្មេងអាណាថាដើរសុំទាន ឬហិតកាវ និងដេកអាណាធិបតេយ្យនេះកន្លងមក ហាក់ស្ងប់ស្ងាត់មួយរយៈធំហើយ ទើបតែសម័យកូវីដ១៩ នេះ មិនដឹងថាយ៉ាងណា បែរជាឃើញកើតមានព្រោងព្រៀតឡើងវិញ៕
ចែករំលែកព័តមាននេះ