រាជធានីភ្នំពេញ ៖ លោក សក់ សេដ្ឋា រដ្ឋលេខាធិការប្រចាំការបំភ្លឺករណីការបោះតង់របស់ភាគីវៀតណាម ចូលមកតំបន់ព្រំដែនជាមួយកម្ពុជាកន្លងមក ។
យោងតាមបណ្តាញសង្គមហ្វេសប៊ុក ក្រសួងមហាផ្ទៃ នៅថ្ងៃអី១០ កក្កដា ឆ្នាំ២០២០ លោក សក់ សេដ្ឋា រដ្ឋលេខាធិការប្រចាំការបានការបោះតង់របស់ភាគីវៀតណាមចូលមកតំបន់ព្រំដែនកើតឡើង នៅអំឡុងខែមីនា ឆ្នាំ២០២០ ។
ក្រសួងមហាផ្ទៃបានទទួលព័ត៌មានពីកម្លាំងនគរបាលការពារព្រំដែនយោធាព្រំដែន និងរដ្ឋបាលខេត្តករណីភាគីវៀតណាមបានបិទច្រកទ្វារព្រំដែនដោយឯកតោភាគី ព្រមទាំងសង់រោងប្រក់តង់ និងដាក់ពង្រាយកងទ័ពការពារ ព្រំដែន នៅតាមបណ្តោយព្រំដែនគោកកម្ពុជា-វៀតណាម ក្រោមរូបភាពទប់ស្កាត់ការឆ្លងជម្ងឺកូវីដ ១៩ (COVID-19) ដោយលើកទង់ជាតិវៀតណាម និងបដាសរសេរជាភាសាវៀតណាមថា «ប៉ុស្តិ៍ទប់ស្កាត់ជម្ងឺកូវីដ១៩» ។
លោក សក់ សេដ្ឋាថា ពាក់ព័ន្ធនឹងសកម្មភាពបោះតង់របស់ភាគីវៀតណាមក្រសួងមហាផ្ទៃបានណែនាំដល់អភិបាលខេត្ត និងស្នងការដ្ឋាននគរបាលខេត្តជាប់ព្រំដែន សហការចុះទៅសម្របសម្រួល និងចរចាជាមួយភាគីវៀតណាមឲ្យរុះរើតង់ទាំងនោះចេញ ។
ជាលទ្ធផលភាគីវៀតណាមបានយល់ព្រមរុះរើចេញ និងរំកិលតង់មួយចំនួនថយក្រោយ ។ ទន្ទឹមនេះភាគីវៀតណាមបានឆ្លើយតបមកអាជ្ញាធរកម្ពុជាថា វៀតណាមនឹងរុះរើតង់ទាំងនោះចោលវិញ ក្រោយពេលដែលជំងឺកូវីដ១៩ ត្រូវបានកំចាត់ចោលទាំងស្រុងនាពេលខាងមុខ ។
ម្យ៉ាងទៀតក្រសួងមហាផ្ទៃក៏បានស្នើគណៈកម្មាធិការចំរុះកិច្ចការព្រំដែន ដើម្បីពិភាក្សាចរចាជាមួយភាគីវៀតណាម ឱ្យរុះរើតង់ទាំងនោះចេញ និងរក្សាស្ថានភាពដដែលនៅតាមបណ្តោយព្រំដែនដែលពុំទាន់ឯកភាពខណ្ឌសីមា និងបោះបង្គោលរួច តាមរយៈលិខិតលេខ១៥៧៩សជណ ចុះថ្ងៃទី០១ ខែមិថុនា ឆ្នាំ២០២០ ។
ជាការឆ្លើយតបគណៈកម្មាធិការចំរុះកិច្ចការព្រំដែនបានស្នើមកក្រសួងមហាផ្ទៃផ្តល់នូវចំនុចនិយាមការនៃទីតាំងបោះតង់របស់ភាគីវៀតណាម ។ បច្ចុប្បន្នក្រសួងមហាផ្ទៃកំពុងបូកសរុបផ្ទៀងផ្ទាត់និយាមការទាំងនោះ ដើម្បីផ្តល់ជូនគណៈកម្មាធិការចំរុះកិច្ចការព្រំដែនចាត់ចែងតាមសមត្ថកិច្ច ។
ពាក់ព័ន្ធនឹងបញ្ហាខាងលើនេះកន្លងមកផ្អែកតាមលិខិតរបស់រដ្ឋបាលខេត្តកណ្តាល ក្រសួងការបរទេស និងសហប្រតិបត្តិការអន្តរជាតិក៏បានធ្វើកំណត់ទូតទៅភាគីវៀតណាម កាលពីថ្ងៃទី១៣ ខែឧសភា ឆ្នាំ២០២០ ដើម្បីតវ៉ាអំពីសកម្មភាពបោះតង់របស់ភាគីវៀតណាម នៅចន្លោះទន្លេមេគង្គ និងទន្លេបាសាក់ ចាប់ពីបង្គោលព្រំដែនលេខ២៤១-២៤៥, និងនៅតាមបណ្តោយព្រែកជ្រៃធំ-ព្រែកប៊ិញយី ចាប់ពីចន្លោះបង្គោលព្រំដែន លេខ ២៤៧-២៥៣ និងទាមទារភាគីវៀតណាមឲ្យរុះរើតង់ទាំងនោះចេញ និងស្នើឲ្យរក្សាស្ថានភាពនៅដដែលនៅតាមតំបន់ព្រំដែនទាំងនេះស្របតាមស្មារតីនៃប្រកាសព័ត៌មានរួមរបស់នាយករដ្ឋមន្ត្រី ទាំងពីរឆ្នាំ១៩៩៥ និងសន្ធិសញ្ញា បំពេញបន្ថែមឆ្នាំ២០០៥ ។
លោករដ្ឋលេខាក៏បានឲ្យដឹងថា គិតត្រឹមថ្ងៃទី០២ ខែកក្កដា ឆ្នាំ២០២០ ចំនួនតង់ដែលភាគីវៀតណាមបានរុះរើចេញវិញចំនួន០៨កន្លែង ក្នុងនោះតង់ដែលបានបោះនៅតំបន់ព្រំដែនដែលមិនទាន់ឯកភាពគ្នាក្នុងការវាស់វែងខណ្ឌសីមា និងបោះបង្គោលព្រំដែនសរុបចំនួន៤២តង់៕
ចែករំលែកព័តមាននេះ