ខេត្តសៀមរាប ៖ ការដើរទាក់លក់ ទិញ និងពិឃាតសត្វឆ្កែសត្វសុខន (ឆ្កែ) បែបអាណាធិបតេយ្យ មិនអនុញ្ញាតឲ្យមាននៅលើទឹកដីអង្គរខេត្តសៀមរាប ទៀតទេ។ មន្ទីរកសិកម្មខេត្តសៀមរាប…
ខេត្តសៀមរាប ៖ ការដើរទាក់លក់ ទិញ និងពិឃាតសត្វឆ្កែសត្វសុខន (ឆ្កែ) បែបអាណាធិបតេយ្យ មិនអនុញ្ញាតឲ្យមាននៅលើទឹកដីអង្គរខេត្តសៀមរាប ទៀតទេ។ មន្ទីរកសិកម្មខេត្តសៀមរាប បានជូនដំណឹងជាធាសារណៈក្នុងការទប់ស្កាត់សកម្មភាពសម្លាប់ និងធ្វើអាជីវកម្មសត្វឆ្កែ បែបអាណាធិបតេយ្យ កាលពីថ្ងៃទី៦ កក្កដា ឆ្នាំ២០២០ បន្ទាប់ពីសង្កេតឃើញថា សកម្មភាពអាជីវកម្មលើសត្វឆ្កែកើនឡើងច្រើនគួរឲ្យព្រួយបារម្ភនៅលើទឹកដីអរិយធម៌របស់ខ្មែរនោះ។
ការសម្លាប់សត្វឆ្កែ ដើម្បីធ្វើម្ហូបនេះ នៅភ្នំពេញក៏កើតមានច្រើនបែបអាណាធិបតេយ្យនោះដែរ។ សាច់ឆ្កែដែលបានចម្អិន ហើយត្រូវបានគេដាក់លក់យ៉ាងចំហ ដោយទុកលលក្បាលឆ្កែបង្ហាញជាសាធារណៈនៅកន្លែងលក់ទៀតផង គួរឲ្យសង្វេគទៀតផង។ ការធ្វើអាជីវកម្មលើសត្វឆ្កែ បានរងការរិះគន់ថា ជាសកម្មភាពខ្វះសីលធម៌ ហាក់បង្ហាញពីអំពើឃោឃៅរបស់មនុស្ស មិនគួរកើតមានចំពោះប្រទេសដែលកាន់ព្រះពុទ្ធសាសនានោះឡើយ។
ការរិះគន់របស់សាធារណជន ពីការសម្លាប់សត្វឆ្កែធ្វើម្ហូប មិនខុសពីការរិះគន់ទៅដល់សកម្មភាពលក់សាច់គោដុត ដែលអ្នកលក់ដុតគោទាំងមូលៗនៅតាមដងផ្លូវសាធារណៈនោះឡើយ។សម្រាប់ស្ថាប័នជំនាញសត្វ បានលើកឡើងថា ការធ្វើអាជីវកម្មសត្វឆ្កែ ដើម្បីធ្វើម្ហូបខុសច្បាប់ផង និងបង្ហាញពីធ្លាក់ចុះពីតម្លៃមនុស្សធម៌ ផង។
សេចក្តីជួនដំណឹងរបស់មន្ទីរកសិកម្មខេត្តសៀមរាប បានបញ្ជាក់ថា «ការធ្វើអាជីវកម្មលក់ ទិញ ពិឃាតសត្វឆ្កែ ដើម្បីធ្វើម្ហូបអាហារមានភាពអាណាធិបតេយ្យ និងកើនឡើងគួរឲ្យព្រួយបារម្ភ ជាសញ្ញាមួយបង្ហាញថា មានការធ្លាក់ចុះនូវតម្លៃមនុស្សធម៌ គុណធម៌ ព្រមទាំងធ្វើឲ្យការឆ្លងរាលដាលជំងឺឆ្កែឆ្កួត និងជំងឺផ្សេងៗជាច្រើនទៀតពីតំបន់មួយទៅតំបន់មួយ ដែលអាចប៉ះពាល់ដល់សុខភាពសាធារណៈ។
សមត្ថកិច្ចបានបញ្ជាក់ចំពោះផ្លូវច្បាប់វិញថា ការជួញដូរលក់ និងទិញសត្វឆ្កែ គឺផ្ទុយទៅនឹងច្បាប់ស្តីពីសុខភាពសត្វ និងផលិតកម្មសត្វ ដែលត្រូវទទួលទោសយ៉ាងធ្ងន់ធ្ងរ ទៀតផង។
ក្នុងសេចក្តីជូនដំណឹងរបស់មន្ទីរកសិកម្ម ហាក់ចង់បង្ហាញថាការសម្លាប់សត្វឆ្កែធ្វើម្ហូបលក់បែបអាណាធិបតេយ្យនៅខេត្តសៀមរាប អាចប៉ះពាល់ដល់អារម្មណ៍អ្នកទេសចរផង។
អាជ្ញាធរបានលើកឡើងដូច្នេះ «ខេត្តសៀមរាប ជាខេត្តទេសចរណ៍វប្បធម៌ ធម្មជាតិ មានភ្ញៀវទេសចរជាតិ និងអន្តរជាតិ មកទស្សនាប្រាង្គប្រាសាទ វប្បធម៌ ន្រពៃណី ទំនៀបទម្លាប់ដ៏ល្អផូរផង់គ្មានពីរលើលោក។ តាំងពីបុរាណរៀងមក សត្វសុនខត្រូវបានប្រជាជនទូទាំងពិភពលោក ជាពិសេសប្រជាពលរដ្ឋខ្មែរចាត់ទុកជាសត្វចិញ្ចឹមស្មោះត្រង់របស់មនុស្ស ហើយសត្វសុនខមានគុណតម្លៃណាស់សម្រាប់ការពារផ្ទះ ចម្ការ ហ្វូងសត្វ និងជួយក្នុងវិស័យយោធាបានល្អទៀតផង»៕ (កែសម្រួលដោយ ៖ បុប្ផា)
ចែករំលែកព័តមាននេះ