រាជធានីភ្នំពេញ ៖ សព្វថ្ងៃនេះមិនថាទីក្រុង ឬតាមបណ្តាលស្រុកនានាទេ ប្រជាពលរដ្ឋកាន់តែនិយមការតសំយាបផ្ទះរបស់ខ្លួន ដើម្បីបានម្លប់ សោភ័ណភាព និងការពារកុំឲ្យពុកជញ្ជាំងផ្ទះជាដើម ហើយពួកគាត់បោះបង់ការដាំដើមឈើ។ អ៊ុំស្រី នឹម នាង រស់នៅភូមិអង្គរុន ឃុំខ្វាវ ស្រុកទ្រាំង ខេត្តតាកែវ បានឲ្យដឹងថា ៖ គាត់មានបងប្អូន៥នាក់ បានសាងសង់ផ្ទះ៥ខ្នង ហើយក៏តសំយាប ជុំវិញផ្ទះ ដើម្បីការពារទឹកភ្លៀងកុំឲ្យសាចចូលជញ្ជាំងផ្ទះ និងម្យ៉ាងវិញបានម្លប់គ្រាន់ឲ្យកូនៗ អង្គុយលេង។ ម្យ៉ាងវិញទៀតឃើញអ្នកក្នុងភូមិនាំគ្នាតសំយាបគាត់ក៏តនឹងគេដែរ តែគាត់មិនបាន កាប់បំផ្លាញដើមឈើនោះទេសូម្បីតែមួយដើម។
សព្វថ្ងៃនេះក្នុងភូមិរបស់គាត់មានប្រជាពលរដ្ឋ ៨០ភាគរយដែលនាំគ្នាតសំយាបនេះក៏ព្រោះតែបងប្អូនមានសាច់ញាតិទៅធ្វើចំណាកស្រុកមានជីវភាពធូរធាផងដែរ។ លោកអ៊ុំ ជុំ សំណាង អាយុជាង៦០ឆ្នាំ រស់ភូមិពង្រ ឃុំខ្វាវ ស្រុកទ្រាំង ខេត្តតាកែវ ដែលអង្គុយមុខផ្ទះក្រោមសំយ៉ាបផ្ទះរបស់គាត់និយាយឲ្យដឹងថា ៖ ដោយសារតែភ័យខ្លាចដើមឈើរលំ សង្កត់ផ្ទះ ទើបគាត់សម្រេចចិត្តឲ្យជាងតសំយាបផ្ទះ ដើម្បីបានម្លប់ និងកុំឲ្យពុកជញ្ជាំងផ្ទះ។ ទន្ទឹមនឹងមានសំយាបផ្ទះដែលការពារពន្លឺថ្ងៃ តែគាត់ឆ្លៀតដាំដើមឈើបន្ថែមផងដែរ ព្រោះថាដើមឈើផ្ដល់ទាំងម្លប់ អុកស៊ីសែន ខ្យល់អាកាសល្អ និងជួយទប់ទល់ការឡើងកម្ដៅ អាកាសធាតុអាប់អួរជាដើម។
លោកអ៊ុំ សំណាង រំលឹកថា ៖ ភូមិឃុំដែលអ៊ុំរស់សព្វថ្ងៃគឺជាភូមិដាច់ស្រយាលកាលពីមុនមិនថា សម័យសម្តេចតា សម័យសាធារណៈខ្មែរ សម័យប៉ុលពត ប្រជាពលរដ្ឋធ្វើដំណើរដោយថ្មើរជើង ដើរកាត់ព្រៃលើផ្លូវរទេះដែលសុទ្ធតែខ្សាច់។ ដើម្បីទៅផ្សារតាកែវដែលមានចម្ងាយប្រមាណជា ២០គីឡូម៉ែត្រ ព្រលឹមស្រាងៗចេញពីភូមិលុះល្ងាចនាំគ្នាមកវិញជិតយប់។ តែពេលនេះបងប្អូន ប្រជាពលរដ្ឋរស់ឃុំខ្វាវមានជីវភាពធូរធារហូតដល់ពួកគេមានលទ្ធភាពតសំយាបផ្ទះពេញមួយឃុំ តែអ្វីដែលគាត់សោកស្តាយមានអ្នកខ្លះបែរកាប់ដើមឈើចោលជុំវិញផ្ទះដើម្បីតសំយាប។ គាត់សុំឲ្យអាជ្ញាធរជួយផ្សព្វផ្សាយដល់ប្រជាពលរដ្ឋយល់ដឹងពីអត្ថប្រយោជន៍នៃដើមឈើផងដែរ។
សមាជិកក្រុមប្រឹក្សាឃុំខ្វាវមួយរូបបានលើកឡើង ៖ ដើម្បីទទួលផលប្រយោជន៍ដូចខាងលើនេះ ប៉ុន្តែប្រជាពលរដ្ឋមិនត្រូវភ្លេចពីសារប្រយោជន៍របស់ដើមឈើដែលហុចផលច្រើនជាងនេះនោះទេ។ លោកប្រាប់ថា ទន្ទឹមនឹងមានសំយាបផ្ទះដែលការពារពន្លឺថ្ងៃ តែគេគួររក្សា និងឆ្លៀតដាំដើមឈើបន្ថែមផងដែរ ព្រោះថាដើមឈើផ្ដល់ទាំងម្លប់ អុកស៊ីសែន ខ្យល់អាកាសល្អ និងជួយទប់ទល់ការឡើងកម្ដៅ អាកាសធាតុអាប់អួរជាដើម។ ហើយពួកគេអាចជ្រើសរើសដាំដើមឈើហូបផ្លែនៅកៀកផ្ទះ ហើយដាំដើមឈើធំៗនៅឆ្ងាយពីផ្ទះបន្តិច ករណីដែលគេខ្លាចដើមឈើធំបាក់រលំលើផ្ទះ។
លោកក៏បានបញ្ជាក់ថា ៖ រឿងទាំងនេះ គឺទាមទារការផ្លាស់ប្ដូរឥរិយាបទរបស់ប្រជាពលរដ្ឋ តាមរយៈការយល់ដឹង ការលើកទឹកចិត្ត ហើយបើមានគម្រូរបស់អាជ្ញាធរដែលដាំដើមឈើក្នុងទីធ្លាសាធារណៈក៏រួមចំណែកផងដែរ។ ឃុំខ្វាវ មានចម្ងាយប្រមាណជិ២០គីឡូម៉ែត្រ ពីទីរួមខេត្តតាកែវធ្វើដំណើរតាម បណ្តោយផ្លូវជាតិលេខ២ លុះដល់ផ្សារព្រៃសណ្តែកបត់ទៅទិសខាងកើត ប្រមាណ៨គីឡូម៉ែត្រ នឹងដល់សាលាឃុំខ្វាវព្រមទាំងបានឃើញផ្ទះប្រជាពលរដ្ឋនៅទីនោះនរណាក៏គេតសំយាបផ្ទះដែរ ៕ ដោយ ៖ ទុយ ប៊ុនរី
ចែករំលែកព័តមាននេះ