រដ្ឋាភិបាល​ប្រកាស​បើក​អាជីវកម្ម​កាស៊ីណូ​ឡើង​វិញ អ្នកវិភាគ​ថា​គួរ​បើក​អាជីវកម្ម​ដទៃ​ទៀត​ផង​ដែរ


រាជធានី​ភ្នំពេញ ៖ បន្ទាប់​ពី​រាជរដ្ឋាភិបាល​បាន​ប្រកាស​បិទ​អាជីវកម្ម​កាស៊ីណូ​អស់​រយៈពេល​ជិត​៣​ខែ ដោយសារ​តែ​ការ​រាតត្បាត​នៃ​ជំងឺ​កូ​វី​ដ​១៩ អាជីវកម្ម​នេះ​ក៏​ត្រូវ​បាន​ប្រកាស​បើក​ឡើង​វិញ ក៏​ប៉ុន្តែ​ត្រូវ​មាន​វិធានការ​រឹតត្បិត​ដដែល ដើម្បី​ការពារ​ការ​រីក​រាលដាល​នៃ​ការ​ឆ្លង​ជំងឺ​កូ​វី​ដ​១៩ ។ អ្នកវិភាគ​សេដ្ឋកិច្ច​ក៏​បាន​ស្នើ​អោយ​រដ្ឋាភិបាល​ពិចារណា​បើក​អាជីវកម្ម​ដទៃ​ទៀត​ផង​ដែរ​ដែល​បាន​បិទ​កន្លង​មក​ដើម្បី​ជំរុញ​ចរន្ត​សេដ្ឋកិច្ច​ឡើង​វិញ ។

បើ​យោង​តាម​អ្នកនាំពាក្យ​រាជរដ្ឋាភិបាល​លោក​ផៃ ស៊ី​ផា​ន បានអោយ​ដឹង​ថា ឆ្លង​តាម​កិច្ចប្រជុំ​កាលពី​ព្រឹក​ថ្ងៃ​ទី​០៣ កក្កដា ២០២០ សម្ដេច​តេ​ជោ​ហ៊ុន សែន នាយក​រដ្ឋមន្ត្រី នៃ​ព្រះរាជាណាចក្រ​កម្ពុជា​បាន​អនុញ្ញាត​អោយ​អាជីវកម្ម​កាស៊ីណូ ត្រៀម​រៀបចំ​បើក​ដំណើរការ​ឡើង​វិញ ក៏​ប៉ុន្តែ​ត្រូវ​គោរព​តាម​វិធាន​របស់​ក្រសួងសុខាភិបាល​នៃ​ព្រះរាជាណាចក្រ​កម្ពុជា ។

លោក​បន្ត​ថា រាជរដ្ឋាភិបាល​បាន​អនុញ្ញាត​អោយ​បើក​ដំណើរ​តែ​ល្បែងភ្នាល់​និង​ស្លុត​ម៉ាស៊ីន​ដូច្នេះ បើសិន​ម្ចាស់​កាស៊ីណូ​ណា​បាន​ប្រព្រឹត្តិ​ហួស​ពី​អ្វី​ដែល​រដ្ឋាភិបាល​ផ្ដល់​ជូន កាស៊ីណូ​នោះ នឹង​ត្រូវ​ទទួល​ពិន័យ ឬ​រង​ការ​ផ្អាក​អាជីវកម្ម​វិញ ដោយ​រដ្ឋាភិបាល​បាន​កំណត់​រួច​ហើយ ។ លោក​ថា​៖« ម្ចាស់​កាស៊ីណូ អាច​ទាក់ទង​ទៅ​ក្រសួងសុខាភិបាល និង​ចុះ​កិច្ចព្រមព្រៀង​សន្យា​ជាមួយ​គ្នា ដូច្នេះ​កាស៊ីណូ​នោះ អាច​បើក​ដំណើរ​ចាប់ពី​ថ្ងៃនេះ​តទៅ​ក៏​បាន​ដែរ » ។

បើ​តាម​លោក​ចាន់ សុផល អ្នកវិភាគ​សេដ្ឋកិច្ច​មួយ​រូប​នៅ​កម្ពុជា បានអោយ​ដឹង​ថា ការ​បើក​ដំណើរការ​ឡើង​វិញ​នៃ​អាជីវកម្ម​កាស៊ីណូ​នេះ គឺ​ផ្ដល់​អត្ថប្រយោជន៍​ជា​ច្រើន​ដល់​ប្រជាពលរដ្ឋ​ជា​ពិសេស​អ្នក​ដែល​បាត់បង់​ការងារ ដោយសារ​តែ​កូ​វី​ដ​១៩​និង​អ្នក​ដែល​ធ្លាប់​បម្រើ​ការងារ​ក្នុង​អាជីវកម្ម​កាស៊ីណូ អាច​ចូល​បម្រើ​ការងារ​ឡើង​វិញ​បាន ហើយ​ក៏​អាច​នឹង​ជួយ​អោយ​អាជីវកម្ម​ផ្សេង​ទៀត ដូច​ជា​សណ្ឋាគារ ភោជនីយដ្ឋាន​ក្នុង​កាស៊ីណូ​នោះ អ្នក​រត់​តាក់ស៊ី ម៉ូតូឌុប និង​កង់​បី​ជាដើម ហើយ​ក៏​អាច​អោយ​ពួក​គាត់​រក​ចំណូល​សម្រាប់​ផ្គត់ផ្គង់​គ្រួសារ​ពួក​គាត់​ផង​ដែរ ។ ក្រៅពី​នេះ​ដែរ វា​ក៏​បាន​នាំ​នូវ​ប្រាក់​ចំណូល​ពី​បរទេស​មក​ចូល​ក្នុង​ប្រទេស​កម្ពុជា​ផង​ដែរ តាម​រយៈ​ការ​មក​ស្នាក់​នៅ​របស់​អ្នក​ចូល​លេង​ក្នុង​កាស៊ីណូ ។

លោក​បន្ត​ថា ក្រៅពី​អាជីវកម្ម​កាស៊ីណូ រាជរដ្ឋាភិបាល​គួរ​ពិចារណា​បើក​ដំណើរការ​ឡើង​វិញ​នូវ​អាជីវកម្ម​ផ្សេង​ទៀត​ដែល​បាន​ប្រកាស​បិទ ដើម្បី​ការពារ​កូ​វី​ដ​១៩ ក៏​ប៉ុន្តែ​ត្រូវ មាន​វិធានការ​ការពារ​ត្រឹមត្រូវ​ពី​ម្ចាស់​អាជីវកម្ម​ដោយ​រក្សា​គម្លាត​ពី​គ្នា ដើម្បី​បង្កា ។ ធ្វើ​ដូច្នេះ​គឺ​ដើម្បី​អោយ​ពលរដ្ឋ​មានការ​ងារ​ធ្វើ​ឡើង​វិញ ហើយ​រដ្ឋាភិបាល​ក៏​អាច​រក​ចំណូល​បាន​វិញ​តាម​រយៈ​ការ​ប្រមូល​ពន្ធ ។ លោក​ថា​៖« កន្លង​មក​ក្រសួងទេសចរណ៍ ក៏​បាន​ចេញ​វិធានការ​អនាម័យ​ណែនាំ​ដល់​ម្ចាស់​ភោជនីយដ្ឋាន​និង​អាជីវកម្ម​ទេសចរណ៍​ដទៃ​ទៀត​ដូច​ជា​ការ​ស្ទង់​កំ​ដៅ ការ​កំណត់​ទីតាំង​អង្គុយ កំណត់​ចំនួន​ភ្ញៀវ​ជាដើម »​។

លោក​បញ្ជាក់​ថា ការ​បើក​ដំណើរការ​ឡើង​វិញ​នូវ​អាជីវកម្ម​ដែល​បាន​បិទ​កន្លង​ទៅ ពី​សំណាក់​រដ្ឋាភិបាល​នឹង​អាច​ហុច​ផលប្រយោជន៍​ដល់​សេដ្ឋកិច្ចជាតិ និង​សេដ្ឋកិច្ច​គ្រួសារ​របស់​ពលរដ្ឋ​កម្ពុជា និង​ជា​ការ​សម្រួល​បន្ទុក​របស់​រដ្ឋាភិបាល​ក្នុង​ការ​ជួយ​ដល់​ពលរដ្ឋ​ក្រីក្រ​ផង​ដែរ ។

បើ​តាម​លោក​ម៉េ​ង សុខ​ជា អ្នក​រត់​កង់​បី​នៅ​ខេត្ត​ព្រះ​សីហ​នុ បានអោយ​ដឹង​ថា ចាប់តាំងពី​រាជរដ្ឋាភិបាល​ប្រកាស​បិទ​អាជីវកម្ម​កាស៊ីណូ លោក​បាន​បាត់​ចំណូល​អស់​ច្រើន ពីព្រោះ​អ្នក​ជិះ​កង់​បី​របស់​លោក​ភាគច្រើន​ជា​អ្នក​ចូល​លេង​ក្នុង​កាស៊ីណូ ហើយ​ជា​ជនបរទេស ។ បន្ទាប់​ពី​កាស៊ីណូ​បិទ ជនបរទេស​ទាំងអស់​អត់​ចេញពីផ្ទះ​និង​មិនសូវ​ចេញ​ដើរ​លេង​ទើប​ធ្វើ​អោយ​អ្នក​ប្រកបរ​បរដូច​គ្នា​នេះ ត្រូវ​បាត់បង់​ចំណូល​គ្រប់​ៗ​គ្នា ។ លោក​ថា​៖«​នៅ​ពេល​លឺ​ថា​រដ្ឋាភិបាល​ប្រកាស​បើក​វិញ ពួក​យើង​អ្នក​រត់​កង់​បី និង​អ្នក​ដែល​បាត់បង់​ការងារ​ដោយសារ​ការ​បិទ​អាជីវកម្ម​នេះ សង្ឃឹមថានឹង​អាច​រក​ចំណូល​និង​ប្រាក់ខែ​សម្រាប់​ផ្គត់ផ្គង់​ជីវភាព​អោយ​ប្រសើរ​ឡើង​វិញ » ។

យោង​របាយការណ៍​របស់​ក្រសួងទេសចរណ៍​, អាជីវកម្ម​ទេសចរណ៍​ជាង​៣​ពាន់​ទីតាំង​បាន​បិទ​និង​ផ្អាក​សកម្មភាព​ដោយសារ​តែ​កូ​វី​ដ​១៩ ហើយ​ក៏​ធ្វើ​អោយ​ប៉ះពាល់​ដល់​កំលាំង​ពលកម្ម​ប្រមាណ​៤​ម៉ឺន​៥​ពាន់​នាក់​ផង​ដែរ ។ ដើម្បី​ស្ដារ​វិស័យ​នេះ​ឡើង​វិញ ក្រសួងទេសចរណ៍​បាន​ជំរុញ​ភ្ញៀវ​ទេសចរ​ធ្វើ​ដំណើរ​កម្សាន្ត​នៅ​ក្នុងស្រុក ដើម្បី​អោយ​ប្រតិបត្តិ​ករ​អា​ចរក​ចំណូល​បាន​ខ្លះ​ៗ សម្រាប់​ផ្គត់ផ្គង់​អាជីវកម្ម​និង​បើក​ប្រាក់ខែ​អោយ​បុគ្គលិក​របស់​ខ្លួន ក៏​ប៉ុន្តែ​ម្ចាស់​អាជីវកម្ម​ទេសចរណ៍​ទាំងនោះ ក៏​ត្រូវ​អនុវត្តន៍​តាម​ការ​ណែនាំ​អោយ​បាន​ខ្ជាប់ខ្ជួន​របស់​ក្រសួងសុខាភិបាល​កម្ពុជា​ផង​ដែរ ដើម្បី​ការពារ​ការ​ឆ្លង​កូ​វី​ដ​១៩​នៅ​តាម​សហគមន៍ ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ