រាជធានីភ្នំពេញ ៖ មានការស្ទង់មតិមួយតាម online ធ្វើឡើងដោយអង្គការតម្លាភាពកម្ពុជា ពីការរាយការណ៍ពីអំពើពុករលួយរបស់ប្រជាពលរដ្ឋ ។ លទ្ធផលពីការស្ទង់មតិខ្លី ទៅលើសំណួរថា តើអ្នកមានអារម្មណ៍សុវត្ថិភាពក្នុងការរាយការណ៍អំពីអំពើពុករលួយ…
រាជធានីភ្នំពេញ ៖ មានការស្ទង់មតិមួយតាម online ធ្វើឡើងដោយអង្គការតម្លាភាពកម្ពុជា ពីការរាយការណ៍ពីអំពើពុករលួយរបស់ប្រជាពលរដ្ឋ ។ លទ្ធផលពីការស្ទង់មតិខ្លី ទៅលើសំណួរថា តើអ្នកមានអារម្មណ៍សុវត្ថិភាពក្នុងការរាយការណ៍អំពីអំពើពុករលួយ ឬ ទង្វើខុសឆ្គងនៅកន្លែងធ្វើការ ឬក៏អ្នកខ្លាចការគុំកួនប្រសិនបើ អ្នកធ្វើការរាយការណ៍? ក្នុងចំណោមអ្នកចូលរួមស្ទង់មតិចំនួន១១១នាក់ មាន៣១% មានអារម្មណ៍សុវត្ថិភាពក្នុងការរាយការណ៍។ចំណែក៦៩% ភ័យខ្លាចការគុំកួនក្នុងការរាយការណ៍ ។
លោក ប៉ុច ពិសី នាយកប្រតិបត្តិការអង្គការតម្លភាពកម្ពុជា មិនសប្បាយចិត្តជាមួយលទ្ធផលស្ទង់មតិនោះទេ ។ លោកថា លទ្ធផលនោះបានបង្ហាញពីការភ័យខ្លាច មិនមានសុវត្ថិភាព សម្រាប់ការចូលរួមរបស់ពលរដ្ឋនៅក្នុងការប្រយុទ្ធប្រឆាំងអំពើពុករលួយ ។ លោកលើកឡើងថា ការប្រយុទ្ធប្រឆាំងអំពើពុករលួយ គឺចាំបាច់ត្រូវមានការចូលរួមពីពលរដ្ឋ បើពលរដ្ឋភ័យខ្លាច ឬមានអារម្មណ៍ថាគ្មានសុវត្ថិភាព នៅក្នុងការធ្វើសេចក្តីរាយការណ៍ពីបញ្ហាពុករលួយនោះ ប្រសិទ្ធភាពប្រឆាំងអំពើពុករលួយ នឹងមិនសូវបានផលឡើយ ។
នាយកអង្គការតម្លភាពកម្ពុជាលើកឡើងថា ការដែលពលរដ្ឋបារម្ភនៅក្នុងការរាយការណ៍ពីអំពើពុករលួយដោយសារនៅក្នុងច្បាប់ប្រឆាំងអំពើពុករលួយបានចែងពីបទចោទលើពលរដ្ឋណាដែលរាយការណ៍មិនពិតពីករណីពុករលួយ ។ លោកថា ច្បាប់នោះមិនបានលើកទឹកចិត្តដល់ពលរដ្ឋឲ្យចូលរួមប្រយុទ្ធប្រឆាំងនឹងអំពើពុករលួយឡើយ ។
លោកប៉ិច ពិសី ស្នើដល់រដ្ឋាភិបាលលើកទឹកចិត្តដល់ពលរដ្ឋថែមទៀត នៅក្នុងការដែលពួកគាត់ត្រូវចូលរួមប្រយុទ្ធប្រឆាំងជំងឺពុករលួយនោះ ។
សូមជម្រាបថា នៅក្នុងការប្រយុទ្ធប្រឆាំងអំពើពុករលួយនេះសមត្ថកិច្ចបានដាក់ប្រអប់សំបុត្រស នៅតាមទីសាធារណៈ និងស្ថាប័នក្រសួងរបស់រដ្ឋផងដែរ ដើម្បីទទួលសេចក្តីរាយការណ៍ពីអំពើពុករលួយនេះ ៕
ចែករំលែកព័តមាននេះ