លោក សាយ សំ​អាល់​៖ អាជ្ញាធរ​មូលដ្ឋាន​មិន​ត្រូវ​បើកដៃ​ឱ្យ​មានការ​កាប់​រានទន្ទ្រាន​កាន់កាប់​ដី​រដ្ឋ​ដោយ​ខុសច្បាប់


ខេត្តរតនគិរី ៖ នៅ​ខេត្តរតនគិរី មានការ​ទន្ទ្រាន​កាន់កាប់​ដី​រដ្ឋ ដោយ​ខុសច្បាប់​កើត​មាន​ឡើង នៅ​ក្នុង​តំបន់ការពារធម្មជាតិ ហើយ​មានការ​ជាប់​ព័ន្ធ នឹង​អាជ្ញាធរ​មូលដ្ឋាន​ខ្លះ ដូច​ជា​មេ​ភូមិ មេឃុំ​ជាដើម ដែល​នៅ​បន្ត​បំពាន​ច្បាប់​ចុះហត្ថលេខា​លើ​លិខិត​ទិញ​និង​លក់​ដី និង​ការ​ចុះហត្ថលេខា​បញ្ជាក់​ពី​ការ​កាន់កាប់​ដី ដោយ​ខុសច្បាប់ ទោះបីជា​មានការ​ផ្សព្វផ្សាយ អប់រំ​ណែនាំ​ជា​ច្រើន​លើក​ច្រើន​សារ​រួច​មក​ហើយពី​សំណាក់ មន្ត្រី​ជំនាញ​យ៉ាងណា​ក៏​ដោយ​។ នេះ​ជា​ការ​លើក​ឡើង​របស់​លោក​សាយ សំ​អាល់ រដ្ឋមន្ត្រី​ក្រសួងបរិស្ថាន ។

ការ​លើក​ឡើង​នេះ ធ្វើ​នៅ​ព្រឹក​ថ្ងៃ​ទី​៣០ ខែមិថុនា ឆ្នាំ ២០២០ នេះ​នៅ​សាលាខេត្ត​រតនគិរី ក្នុង​កិច្ចប្រជុំ​ស្តី​ពី​ការ​គ្រប់គ្រង​ដី​សាធារណៈ​របស់​រដ្ឋ នៅ​ក្នុង​តំបន់ការពារធម្មជាតិ ក្នុងភូមិ​សាស្ត្រ​ខេត្តរតនគិរី​។

រដ្ឋមន្ត្រី​ក្រសួងបរិស្ថាន បាន​ព្រមាន​ថា​៖ «​អាជ្ញាធរ​មូលដ្ឋាន​ដែល​មាន​តួនាទី​ចូលរួម​ការពារ​និង​អភិរក្ស​ធនធានធម្មជាតិ មិន​ត្រូវ​បើកដៃ​ឱ្យ​មានការ​កាប់​រាន ដុត​ឆ្ការ ទន្ទ្រាន​កាន់កាប់​ដៃ​រដ្ឋ​ដោយ​ខុសច្បាប់ ហើយ​ស្នើ​សុំ​កាត់​ឆ្វៀល​ដី​រំលោភ​ទន្ទ្រាន​ទាំងនោះ​ឱ្យ​ក្រុម​ជនខិលខូច​ឡើយ នេះ​ជា​ទ​ង្វើ​ខុសច្បាប់ ហើយ​ចាំបាច់​ត្រូវ​ទទួលខុសត្រូវ​ចំពោះ​មុខ ច្បាប់​ដោយ​គ្មាន​ការ​លើកលែង​ឡើយ​»​។

លោក រដ្ឋមន្ត្រី បាន​មាន​ប្រសាសន៍​ថា ជន​ដែល​រំលោភ​បំពាន ទន្ទ្រាន​កាន់កាប់​ដី​រដ្ឋ តែងតែ​ត្រូវ​បាន​ប្រឈម​មុខ​ច្បាប់ ហើយ​បាន​សង្កត់ធ្ងន់​ថា​៖ «​រាជរដ្ឋាភិបាល​កម្ពុជា​ក៏​ដូច​ជា​ក្រសួងបរិស្ថាន​ពិតជា​សប្បាយ​រីករាយ​ក្រៃ​លែង​នៅ​ពេល​ឃើញ​ប្រជាពលរដ្ឋ​មាន​ជីវភាព​ធូរធារ ប៉ុន្តែ​ត្រូវធ្វើ​យ៉ាងណា​ស្រប​តាម​ច្បាប់​»​។
សូម​បញ្ជាក់​ថា ខេត្តរតនគិរី​មាន​តំបន់ការពារធម្មជាតិ​ចំនួន ៦ ដែល​មាន​ផ្ទៃដី ៨៩៣ ៥៩៤ ហិ​កតា​ក្នុង​នោះ​មាន​ដូច​ជា​ឧទ្យាន​ជាតិ​វី​រៈ​ជ័យ ឧទ្យាន​ជាតិ​អូ​យ៉ា​ដាវ ដែនជម្រកសត្វព្រៃ​លំ​ផាត់ ដែនជម្រកសត្វព្រៃ​សៀម​ប៉ា​ង​វើ​ន​សៃ​។

ជាមួយ​គ្នា​នេះ មានការ​រៀបចំ​សហគមន៍​តំបន់ការពារធម្មជាតិ​ចំនួន ១០ ដែល​មាន​ផ្ទៃដី ២៦ ៣៣៨ ហិ​កតា ហើយ​បច្ចុប្បន្ន​នេះ​ក្រសួងបរិស្ថាន​និង​អាជ្ញាធរ​ខេត្ត​បាន​និង​កំពុង​ពង្រឹង​បន្ថែម​តួនាទី​របស់​សហគមន៍​ក្នុង​ការ​ចូលរួម​ការពារ​និង​អភិរក្ស​ប្រកបដោយ​ប្រសិទ្ធភាព ទប់ស្កាត់​និង​បង្ក្រាប​បទល្មើស​ធនធានធម្មជាតិ​ជាមួយ មន្ត្រី​ជំនាញ​របស់​ក្រសួងបរិស្ថាន​។

បច្ចុប្បន្ន​នេះ ខេត្តរតនគិរី​មាន​ប្រជាពលរដ្ឋ​រស់នៅ​ចំនួន ២៦០៥៥៧​នាក់ និង​មាន​ជនជាតិភាគតិច​ចំនួន ៦០%​នៃ​ចំនួន​ពលរដ្ឋ​សរុប ហើយ​មាន​ជនជាតិភាគតិច​ចំនួន ៨​។

លោក សាយ សំ​អាល់ បន្ត​ថា «​យើង​ត្រូវ​ធ្វើការ​រួម​គ្នា ដើម្បី​និរន្តរភាព​បរិស្ថាន និង​ធនធានធម្មជាតិ​។ ប្រសិនបើ​បងប្អូន​ប្រជាពលរដ្ឋ ខ្វះ​ដី​ពិតប្រាកដ​សូម​ដាក់​ពាក្យ​ស្នើ​សុំ ដី​សម្បទាន​សង្គមកិច្ច​ជាមួយ​អាជ្ញាធរ​ពាក់ព័ន្ធ ហើយ​ប្រសិនបើ​មាន​កំណើនប្រជាជន​ក្នុង​ឃុំ​ស្រុក ឬ​មាន​បំណង​ចង់​បង្កើត​ហេដ្ឋារចនាសម្ព័ន្ធ​ថ្មី ដើម្បី​ឆ្លើយ​តប​នឹង​កំណើន​ប្រជាពលរដ្ឋ អាជ្ញាធរ​អាច​លើក​ជា​គម្រោង​ដើម្បី​ជជែក​ពិភាក្សា​ជាមួយ​មន្ត្រី​ជំនាញ​»​។

ចក្ខុវិស័យ​និង​ការ​ចូលរួម​លើកកម្ពស់ ជីវភាព​ប្រជា​សហគមន៍​នេះ ត្រូវ​បាន​ចែករំលែក​ពី​សំណាក់ លោក ថង សា​វុន អភិបាល​នៃ​គណៈ​អភិបាលខេត្ត​រតនគិរី ដោយ​បាន​ថ្លែង​ថា «​យើងខ្ញុំ​មិន​ចង់ឱ្យ​ប្រជាពលរដ្ឋ​ខេត្ត​យើង ខ្ញុំ​ពឹង​អាស្រ័យ​មុខរបរ​លើ​ធនធានធម្មជាតិ​ទេ គឺ​មានមុខ​របរ​ផ្សេង​ក្រៅពី​ការ​ប្រមូល​អនុ​ផល​ព្រៃឈើ ដើម្បី​ទុក​ឱ្យ​ធនធានធម្មជាតិ​មានការ​រីក​ធំធាត់ និង​ធ្វើ​ឱ្យ​ខេត្តរតនគិរី ក៏​ដូច​ជា​ប្រទេស​កម្ពុជា​ទាំងមូល​សម្បូណ៌ ដោយ​ធនធានធម្មជាតិ ដើម្បី​ផលប្រយោជន៍​សម្រាប់ កូនចៅ​ជំនាន់​ក្រោយ​បន្ត​ទៀត​។ ខ្ញុំ​សូម​ស្នើ​សុំ​ឱ្យ​អាជ្ញាធរ​ភូមិ​ឃុំ រួម​នឹង​អង្គការ​សង្គម​ស៊ី​វិល​សហការ​គ្នា​ឱ្យ​បាន​ល្អ ចូលរួម​ការពារ​និង​អភិរក្ស​ធនធានធម្មជាតិ​ឱ្យ​បាន​គង់វង្ស​»​។

លោក សាយ សំ​អាល់ ក៏​បាន​ផ្តល់​ជា​គំនិត​ដល់​អាជ្ញាធរ​ក្នុង​ការ​គិ​រ​គូរ​ជាមួយ​ប្រជា​សហគមន៍ បង្កើត​ជម្រើស​មុខរបរ​ថ្មី ដូច​ជា​ការ​ចិញ្ចឹមសត្វ និង​ដំណាំ​កសិកម្ម​ផ្សេង​ៗ ក្រៅពី​មុខរបរ​ប្រពៃណី​ដកហូត​អនុ​ផល​ព្រៃឈើ ការ​ទន្ទ្រាន​ដី​ធ្វើ​ចម្ការ​ពនេចរ ហើយ​ក្រសួងបរិស្ថាន​ត្រៀមខ្លួន​ជួយ​ទាំង​បច្ចេកទេស និង​ថវិកា​៕

Facebook Google Twitter Email

Live

Sponsored News

១០:២៧ | ក្នុងស្រុក

លោក សុធា អរុណ ចាញ់​ការ​ប្ដឹងផ្ដល់​ថ្នាក់​សាលាឧទ្ធរណ៍​បន្ទាប់​ពី​ផ្តល់​ឯកសារ​ក្លែងក្លាយ ​ដើម្បី​ទទួល​បានការ​គ្រប់គ្រង​លើ​មណ្ឌលកុមារ​កំព្រា​ជា​ថ្មី​ម្ដងទៀត !

ការស្ទង់មតិគេហទំព័រថ្មី




    សូម​អរគុណ