ខេត្តរតនគិរី ៖ បើតាមសេចក្តីរាយការណ៍បានឱ្យដឹងថា បុរសម្នាក់ប្រកបរបរស៊ីឈ្នួលកាត់ស្មៅចំការឱ្យគេ ស្រាប់តែជួបគ្រោះអកុសលដោយត្រូវផ្លែម៉ាស៊ីនកាត់ស្មៅបាក់មួយកំណាត់ ហើយខ្ទាតហោះមកប៉ះចំក្បាលជនរងគ្រោះ បណ្តាលឱ្យបាត់បង់ជីវិតភ្លាមៗមួយរំពេចនៅនឹងកន្លែងកើតហេតុតែម្តង។ ហេតុការណ៍នេះបានកើតឡើងកាលពីម៉ោង៤និង១០នាទីល្ងាច ថ្ងៃទី២៩ ខែមិថុនា…
ខេត្តរតនគិរី ៖ បើតាមសេចក្តីរាយការណ៍បានឱ្យដឹងថា បុរសម្នាក់ប្រកបរបរស៊ីឈ្នួលកាត់ស្មៅចំការឱ្យគេ ស្រាប់តែជួបគ្រោះអកុសលដោយត្រូវផ្លែម៉ាស៊ីនកាត់ស្មៅបាក់មួយកំណាត់ ហើយខ្ទាតហោះមកប៉ះចំក្បាលជនរងគ្រោះ បណ្តាលឱ្យបាត់បង់ជីវិតភ្លាមៗមួយរំពេចនៅនឹងកន្លែងកើតហេតុតែម្តង។ ហេតុការណ៍នេះបានកើតឡើងកាលពីម៉ោង៤និង១០នាទីល្ងាច ថ្ងៃទី២៩ ខែមិថុនា ឆ្នាំ២០២០ ត្រង់ចំណុចចំការ ស្ថិតក្នុងនៅភូមិកាម៉ែនតូច ឃុំសាមគ្គី ស្រុកអូរ ជុំ ខេត្តរតនគិរី ។
បើតាមប្រភពពីសមត្ថកិច្ចស្រុកអូរជុំ បានឱ្យដឹងថា ជនរងគ្រោះខាងលើឈ្មោះ យ៉ែ ក ហឿន ភេទប្រុស អាយុ២៧ឆ្នាំ ជនជាតិទំពួន មុខរបរធ្វើចំការ មានទីលំនៅភូមិ-ឃុំកើតហេតុខាងលើ។
ប្រភពដដែលបន្តថា មុនពេលកើតហេតុ ជនរងគ្រោះបានទៅស៊ីឈ្នួលកាត់ស្មៅឱ្យគេនៅចំការខាងជើង ដែលមានម្ចាស់ឈ្មោះ ភើន ប្លាន់ រស់នៅភូមិ-ឃុំជាមួយគ្នា ក្នុងភូមិការម៉ែនតូច ចម្ងាយប្រហែល៣គីឡូម៉ែត្រពីភូមិ។
ប្រភពដដែលបន្តទៀតថា ខណៈពេលដែលជនរងគ្រោះកំពុងតែកាត់ស្មៅនោះ ស្រាប់តែ ចៃដន្យអាក្រក់អី ផ្លែម៉ាស៊ីនកាត់ស្មៅនោះបានប៉ះចំថ្មធ្វើឱ្យបាក់ផ្លែម៉ាស៊ីនកាត់ស្មៅមួយកំណាត់ ហើយខ្ទាតហោះទៅត្រូវចំក្បាលខាងមុខលើថ្ងាសជនរងគ្រោះ បណ្តាលឱ្យដួលបាត់បង់ជីវិតភ្លាមៗមួយរំពេចតែម្តង។
ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ហើយធ្វើកោសល្យវិច័យ រួចសន្និដ្ឋានថា ជនរងគ្រោះពិតជាបាត់បង់ជីវិតដោយសារតែត្រូវចំផ្លែម៉ាស៊ីនកាត់ស្មៅនោះពិតប្រាកដមែន។
បន្ទាប់ពីពិនិត្យរួចរាល់ សមត្ថកិច្ចបានធ្វើកំណត់ហេតុ រួចប្រគល់សពជនរងគ្រោះទៅឱ្យសាច់ញាតិ និងក្រុមគ្រួសារយកទៅធ្វើបុណ្យតាមប្រពៃណីផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ