ខេត្តបាត់ដំបង ៖ លោកឆោម ពិសិទ្ធ តារាចម្រៀងដែលកើតចេញពីកសិករ មានប្រជាប្រិយក្នុងខេត្តបាត់ដំបង បានធ្លាក់ខ្លួនឈឺពិការមួយចំហៀងខ្លួន បន្ទាប់ពីបានវះកាត់ឈាមកកក្នុងក្បាលដោយសារដាច់សរសៃឈាម រួចចេញពីមន្ទីពេទ្យវិញ នៅថ្ងៃទី២៧ មិថុនា ឆ្នាំ២០២០ មកថ្មីៗនេះ ដោយមានជំងឺ(ស្ត្រូប) ហើយបានវិលមុខដួលនៅមុខបន្ទប់ទឹកសន្លប់ កាលពីថ្ងៃទី១៤ ខែមិថុនា ឆ្នាំ២០២០ កន្លងមក ។ ពេលនេះ បានចេញទៅសម្រាកនៅផ្ទះ ដោយមានប្អូនស្រីជាអ្នកមើលថែ ព្រោះជាក្មេងកំព្រារស់នៅតែ២នាក់បងប្អូន ដែលប្អូនស្រីមានប្តីមុន ហើយលោកឆោម ពិសិទ្ធ តារាចម្រៀងនេះ មិនទាន់បានគិតគូររកប្រពន្ធកូនអ្វីឡើយ ។
ដោយសារតែភាពក្រីក្រ ហើយត្រូវទំនួលខុសត្រូវក្នុងគ្រួសារកំព្រា ដើម្បីពង្រឹងខ្លួនឲ្យមានជីវភាពគ្រាន់បើបន្តិច ទើបបង្ខំចិត្តដើរលក់សម្លេងចំរៀងតាមអាហារដ្ឋាន និងគ្រប់កម្មវិធីផ្សេងៗដែលមានគេត្រូវការតន្ត្រីចម្រៀង តែត្រូវជួបគ្រោះអកុសលផ្ទួនៗគ្នា បន្ទាប់ពីមានមេរោគជំងឺឆ្លងកូវីដ-១៩រួចមក ជីវភាពអ្នកចំរៀងនេះត្រូវយ៉ាប់យឺនជួបការលំបាកបន្ថែមទៀត រហូតដល់លក់ម៉ូតូផ្ទាល់ខ្លួនដែលសន្សំពីការច្រៀង និងជាមធ្យោបាយជិះទៅច្រៀងមើលជំងឺសិន, ដោយហាងធ្លាប់ច្រៀងរៀងរាល់យប់ត្រូវបានបិទ និងកម្មវិធីផ្សេងៗទាំងអស់ត្រូវបានផ្អាក ។
ដេកនៅលើគ្រែក្រោមផ្ទះកំណើត ស្ថិតនៅភូមិអូរខ្ជាយត្បូង ឃុំអូរដំបង១ ស្រុកសង្កែ ខេត្តបាត់ដំបង ដែលមានចម្ងាយប្រមាណជាង២០គីឡូម៉ែត្រពីក្រុងបាត់ដំបង អ្នកចំរៀងដែលធ្លាប់ប្រឹងត្រដរដើរច្រៀងគ្រប់ទីកន្លែងតាមកម្មវិធីទាំងយប់ទាំងថ្ងៃរបស់លោកឆោម ពិសិទ្ធ ដែលមានឈ្មោះពិតឆោម ប៊ុនធឿន អាយុ៣៦ឆ្នាំ ត្រូវម្តាយស្លាប់ចោលពីឆ្នាំ២០០៣ និងឪពុកស្លាប់ចោលនៅឆ្នាំ២០១២ ព្រោះតែចង់លើកស្ទួយសេដ្ឋកិច្ចក្នុងគ្រួសារ ដែលមានតែ២នាក់បងប្អូន ហើយប្អូនស្រីរបស់លោកត្រូវមានប្តីជាជាងចម្លាក់ និងមានកូនចំនួន៣នាក់មុនលោកទៅវិញ កំពុងរស់នៅជាមួយគ្នា ត្រូវបានដាក់បន្ទុកការលំបាកមកលើបងប្អូនលើកបន្ថែមទៀត ។
ពេលនេះ ត្រូវលក់ម៉ូតូនិងគ្រឿងលម្អខ្លួនដែលមានបន្តិចបន្តួចពីវិស័យសិល្បៈ ដើម្បីយកមកមើលជំងឺខ្លួនកំពុងជួបជាមុនសិន ហើយត្រូវខ្ចីបុលគេបន្ថែមទៀតអស់ជាង៣ពាន់ដុល្លារ សម្រាប់ឲ្យថ្លៃពេទ្យ និងទិញថ្នាំព្យាបាលដែលបានចំណាយកន្លងមកក្នុងរយះពេល១៤ថ្ងៃមកនេះ អស់ជាង៦ពាន់ដុល្លា ដែលប្ងូនស្រីរបស់លោកបានគិតថា ត្រូវលក់ម៉ូតូដែលមាន និងត្រូវខ្ចីលុយគេឲ្យខាងតែបាន ដើម្បីយកមកព្យាបាលមនុស្សដែលកំពុងជួបជំងឺនេះឲ្យមានជីវិតរស់នៅជួបជុំគ្នាសិន រួចហើយចាំគិតបន្តទៅទៀត ។
លោកឆោម ពិសិទ្ធ បាននិយាយខ្សាវៗទាំងអួលដើម កផងបានបញ្ជាក់ថា ដំបូងឡើយលោកគ្មានដឹងខ្លួនអ្វីទាំងអស់ ដែលជំងឺនេះវាមិនបានឱ្យដឹងជាមុនឡើយ ស្រាប់តែកំពុងយួរទឹកដាក់ពាងត្រូវងងិតដួលនៅមុខបន្ទប់ទឹក ហើយដឹងខ្លួនវិញនៅក្នុងមន្ទីរពេទ្យ ដោយការសម្រេចចាត់ចែងស្ថិតនៅលើប្អូនស្រី ជាអ្នកចាត់ចែងសម្រេចទាំងអស់ ព្រោះពេលនេះបន្ទុកស្ថិតនៅលើប្អូនស្រីទាំងអស់ ។ ម្ល៉ោះហើយទើបសម្រេចចិត្តលក់ម៉ូតូ១គ្រឿង និងខ្សែកមានបន្តិចបន្តួចដែលជារបស់សម្រាប់ពេលចេញទៅច្រៀងនោះសិន រងចាំរកវិញទៅថ្ងៃក្រោយ តែមិនដឹងជាទទួលលទ្ធផលដូចម្តេចឡើយ បើពេលនេះសល់តែសំបកខ្លួន និងសំបកផ្ទះ ហើយជម្ងឺកំពុងស្ថិតនៅក្នុងស្ថានភាពពិការមួយចំហៀងខ្លួនទៀត ដោយគិតអ្វីមិនចេញសោះឡើយ ។
លោកឆោម ពិសិទ្ធ បានលើកដៃសំពះតាមរយៈកោះសន្តិភាព សូមអំពាវនាវដល់សប្បុរសជននានា មិត្តភក្តិ ដែលតែងតែបានស្គាល់រាប់អានគ្នាក្នុងវិស័យសិល្បៈ ជួយចម្លងគ្រោះដល់រូបខ្ញុំដែលពេលនេះកំពុងតែជួបបញ្ហាលំបាកជីវភាពក្នុងពេលមានមេរោគកូវីដ-១៩ហើយ បន្ថែមមកធ្លាក់ខ្លួនឈឺខ្លួនឯងបន្ថែមទៀតដោយមិនអាចគេចបានទើបសុខចិត្តលើកដៃសំពះអង្វរពេលនេះប្អូនចង់ជួយលោកឆោម ពិសិទ្ធ តារាចម្រៀងនេះប្រើទូរស័ព្ទលេខ (០១៧ ៤២៤ ៦៤០) ។
ចែករំលែកព័តមាននេះ