លោក​​ទេស​រដ្ឋមន្ត្រី​ជំរុញ​ឱ្យ​មន្ទីរ​សាធា​រណ​ការ​ខេត្ត​ធ្វើ​ផ្លូវ​ឱ្យ​ដូច​ខេត្ត​ព្រះ​សីហនុ


ខេត្តសៀមរាប ៖ គម្រោង​អភិវឌ្ឍន៍​ហេ​ដ្ឋារចនាសម្ព័ន្ធ​ផ្លូវ​មេ​ចំនួន​៣៨​ខ្សែ សរុប​ប្រវែង៩៨,៣៤​គីឡូម៉ែត្រ​ក្នុង​ក្រុង​សៀមរាប ត្រូវ​បាន​សិក្សា​ក្នុង​គោលបំណង​ដើម្បី​ចូលរួម​លើកកម្ពស់​វិស័យ សេដ្ឋកិច្ច សោភ័ណ​ភាព​ទីក្រុង​សៀមរាប ឱ្យ​ស័​កិ្ត​សមជា​ទីក្រុង​ទេសចរណ៍ វប្បធម៌ និង​ប្រវត្តិសាស្ត្រ ព្រមទាំង​ត​ភ្ជាប់​ទីប្រជុំជន​ក្រុង​សៀមរាប​ទៅ​តំបន់​ដាច់​ស្រយាល​នៅ​ជាយក្រុង និង​ជួយ​សម្រួលការ​ធ្វើ​ដំណើរ​របស់​ប្រជាពលរដ្ឋ​និង​ភ្ញៀវ​ទេសចរ ។

កាលពី​ព្រឹក​ថ្ងៃ​ទី​២៧ ខែមិថុនា ឆ្នាំ​២០២០ ឯកឧត្តម​ទេស​រដ្ឋមន្ត្រី ស៊ុន ចាន់​ថុ​ល រដ្ឋមន្ត្រី ក្រសួង​សាធារណការ​និង​ដឹក​ជញ្ជូន បាន​អញ្ជើញ ដឹកនាំ​កិច្ចប្រជុំ​ពិភាក្សា​ជាមួយ​ឯកឧត្តម ទៀ សីហា អភិបាលខេត្ត​សៀមរាប លើ​ការងារ​ពាក់ព័ន្ធ​នឹង​ការ​សិក្សា​គម្រោង​អភិវឌ្ឍន៍​ហេ​ដ្ឋា​រចនា​សម្ព័ន្ធ​ក្នុង​ក្រុង​សៀមរាប ដោយ​មានការ​អញ្ជើញ​ចូលរួម​ពី​ថ្នាក់ដឹកនាំ​ក្រសួង អង្គភាព​ជំនាញ​របស់​ក្រសួង និង​មន្ទីរ​ពាក់ព័ន្ធ​ជុំវិញ​ខេត្ត ។

កិច្ចប្រជុំ​នេះ ធ្វើ​ឡើង​ដើម្បី​ពិនិត្យ​និង​សិក្សា​លើ​គម្រោង​ផ្លូវ​មេ​ចំនួន​៣៨​ខ្សែ សរុប​ប្រវែង​ប្រ​មា​ណ​៩៨,៣៤​គីឡូម៉ែត្រ ក្នុង​នោះ​ផ្លូវ​២​គន្លងមាន​ប្រវែង​ប្រមាណ​៤៤​គីឡូម៉ែត្រ និង​ផ្លូវ​៤​គន្លង​មាន​​ប្រវែង​ប្រមាណ​៥៤​គីឡូម៉ែត្រ ដែល​លាតសន្ធឹង​ក្នុង​សង្កាត់​ទាំង​១២​របស់​ក្រុង​សៀមរាប និង​មួយ​ផ្នែក​នៃ​ស្រុក​បាគង ដែល​ស្ថិត​ក្នុង​គម្រោង​អភិវឌ្ឍន៍​ហេដ្ឋារចនាសម្ព័ន្ធ​ក្នុង​ក្រុង​សៀមរាប ។

ថ្លែង​ក្នុង​កិច្ចប្រជុំ​នេះ ឯកឧត្តម ទៀ សីហា បានឱ្យ​ដឹង​ថា ខេត្តសៀមរាប​គឺជា​ខេត្ត​ទេសចរណ៍ វប្បធម៌ និង​ប្រវត្តិសាស្ត្រ ហើយ​ស្ថានភាព​ហេដ្ឋារចនាសម្ព័ន្ធ​ផ្លូវ​ជា​ច្រើន ត្រូវ​ធ្វើការ​ជួសជុល​និង​កែ​លម្អ​ឡើង​វិញ ។ គម្រោង​ខ្សែ​ផ្លូវ​មេ​ទាំង​៣៨​ខ្សែ​នេះ​ដែល​បាន​សិក្សា គឺជា​សរសៃ​ឈាម​និង​ជា​បេះដូង​របស់​ខេត្ត ដើម្បី​កំណើនសេដ្ឋកិច្ច ទេសចរណ៍ និង​សោភ័ណ​ភាព​របស់​ខេត្ត ។

ឯកឧត្តម​អភិបាលខេត្ត ក៏​បាន​លើក​ឡើង​ពី​ការងារ​ជួសជុល​និង​កែ​លម្អ​ផ្លូវ​ចំនួន​១០​ខ្សែ ដោយ​រដ្ឋបាល​ខេត្តសៀមរាប​រួម​មាន ផ្លូវ​តា​អុចផ្លូវ​នាគ​ទេព ផ្លូវ​ខ្នែង​ជន្លង់ ផ្លូវ​តុង​សេង ផ្លូវ​អា​ទី​ហ្ស​ង់ ផ្លូវគោក​ស្រិត ផ្លូវ​ជាប់សូ​ហ្វី​តែ​ល ផ្លូវ​ពន្ធដារ​ខេត្ត ផ្លូវ​កេសរ​កូ​ល និង​ផ្លូវ​ស្វាយមាស​។

ឯកឧត្តម​ទេស​រដ្ឋមន្ត្រី ស៊ុន ចាន់​ថុ​ល មាន​ប្រសាសន៍​ថា ហេដ្ឋារចនាសម្ព័ន្ធ​ផ្លូវ​ក្នុង​ក្រុង​សៀម
រាប ដល់​ពេល​ដែល​ត្រូវ​សិក្សា​រៀបចំ​ផែនការមេ ដើម្បី​ធ្វើការ​ជួស​ជុស​កែ​លម្អ​ឡើង​វិញ​ដូច​ក្រុងព្រះសីហនុ ឱ្យ​ស័​កិ្ត​សមជា​ទីក្រុង​ទេសចរណ៍ ដើម្បី​លើក​ស្ទួយ​មុខមាត់​ប្រទេស​ជាតិ​នៅ​លើ​ឆាក​អន្តរជាតិ តាម​រយៈ​ភ្ញៀវ​ទេសចរ​អន្តរជាតិ ។

ឯកឧត្តម​ទេស​រដ្ឋមន្ដ្រី បាន​គូសបញ្ជាក់​ថា រាជរដ្ឋាភិបាល​កំពុង​សិក្សា​ស្វែងរក​ប្រភព​ថវិកា ដើម្បី​អនុវត្ត​គម្រោង​ហេដ្ឋារចនាសម្ព័ន្ធ​ផ្លូវ​៣៨​ខ្សែ​នេះ ។ ខេត្តសៀមរាប​ជា​ប៉ូ​ល​សេដ្ឋកិច្ច​ដ៏​សំខាន់​មួយ​របស់​កម្ពុជា និង​ជា​តំបន់​ត​ភ្ជាប់​ផ្លូវ​សេដ្ឋ​កិច្ច​បាត់ដំបង​-​សៀមរាប ។

ឯកឧត្តម​ទេស​រដ្ឋមន្ដ្រី បាន​លើក​ឡើង​ពីគម្រោង​ដែល​ក្រសួង​កំពុង​ជួសជុល​កែ​លម្អ​ឡើង​វិញ ។ គម្រោង​ផ្លូវ​វាង​ក្រុង​រួម​មាន ផ្លូវ​ខេត្ត​លេខ​2SR3 ប្រវែង​១៤,៩៥​គីឡូម៉ែត្រ បំបែក​ពី​ផ្លូវជាតិ​លេខ​៦​ត្រង់​គីឡូម៉ែត្រ​៣០៨+៨៣០ (​ចុង​កៅស៊ូ​) ដល់​គីឡូម៉ែត្រ​៣១៩+៦០០(​ទឹក​វិល​) ក្រាល​កៅស៊ូ DBST និង​ផ្លូវ​ខ្នារ​ចាស់ (​វិ​ថី​សម្តេច ជា ស៊ី​ម​) ប្រវែង​៤,៦០​គីឡូម៉ែត្រ បន្ត​ពី​ផ្លូវ​៧​មក​រា ចាប់ពី​ផ្លូវ​លេខ 2SR3 ឆ្ពោះទៅ​កាន់​ផ្លូវ​ខេត្ត​លេខ​២៦៥F ប្រើប្រាស់​ថវិកា​ឥណ ទាន ADB ។ គម្រោង​ផ្លូវ​វាង​ខាងត្បូង​ក្រុង​សៀមរាប ប្រើប្រាស់​ឥណទាន​ហិរញ្ញប្បទាន​សាធារណរដ្ឋ​កូរ៉េ EDCF មាន​ប្រវែង​៤៥​គីឡូ ម៉ែត្រ ចាប់ពី​ផ្លូវជាតិ​លេខ​៦​ត្រង់​ចំណុច​គីឡូ ម៉ែត្រ​២៩១​ដល់​គីឡូម៉ែត្រ​៣៣០ កំពុង​សិក្សា​ជ្រើសរើស​គន្លង​ខ្សែ​ផ្លូវ និង​សិក្សា​ពី​លទ្ធភាព​គម្រោង ។

ព្រម​ជាមួយ​នេះ គម្រោង​ប្រព័ន្ធ​ចម្រោះ​ទឹកកខ្វក់​ក្នុង​ក្រុង​សៀមរាប​ក៏​ត្រូវ​បាន​សិក្សា​ដែរ ។គម្រោង​សិក្សា​ផ្លូវ​ទាំង​៣៨​ខ្សែ​នេះ ជា​បណ្តុំបណ្ដាញ​ផ្លូវ​មេ​យ៉ាង​ប្រទាក់ក្រឡា​ក្នុង​ក្រុង​សៀមរាប នឹង​ជួយ​សម្រួល​ដល់​ការ​ធ្វើ​ដំណើរ​របស់​ប្រជាពលរដ្ឋ ក៏​ដូច​ជា​ភ្ញៀវ​ទេសចរ​ក្នុង​ខេត្តសៀមរាប កាត់​បន្ថយ​ពេលវេលា​ក្នុង​ការ​ដឹក​ជញ្ជូននិង​ចរាចរណ៍​ទំនិញ​គ្រប់​ប្រភេទ កាត់​បន្ថយ​ការកកស្ទះ​និង​គ្រោះថ្នាក់​ចរាចរណ៍ ព្រមទាំង​លើកកម្ពស់​សោភ័ណ​ភាព​ទីក្រុង​សៀមរាប ឱ្យ​ស័ក្តិសមជា​ទីក្រុង​ទេសចរណ៍វប្បធម៌ និង​ប្រវត្តិសាស្ត្រ របស់​កម្ពុជា ។

គម្រោង​ផ្លូវ​នេះ នឹង​ចូលរួម​ជំរុញ​និង​លើកកម្ពស់​កំណើនសេដ្ឋកិច្ច តាម​រយៈ​តំបន់​ទេសចរណ៍​នានា ជា​ពិសេស​តំបន់​ភាគ​ខាងត្បូង និង​ការ​ធ្វើ​សមាហរណកម្ម​ប្រជាពលរដ្ឋ​ដែល​នៅ​ជាយក្រុង​ដាច់​ស្រយាល​មក​កាន់តែ​ជិត​ក្រុង ត​ភ្ជាប់​ទីប្រជុំជន​ក្រុង​សៀមរាប ដោយ​កាត់​បន្ថយ​គម្លាត​រវាង​ប្រជាពលរដ្ឋ​ក្នុង​ក្រុង និង​តំបន់​ដាច់​ស្រយាល​នៅ​ជាយក្រុង ក្នុង​ការ​ទទួល​បាន​សមិទ្ធផល​ប្រកប​​ដោយ​​បរិ​យា​ប័ន្ន ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ