រាជធានីភ្នំពេញ ៖ ក្រោយពីការចាប់ខ្លួននាំយកទៅសាកសួរនៅអធិការដ្ឋាននគរបាលខណ្ឌកំបូលរួចមក ជនសង្ស័យជាឃាតករដៃដល់ហៅវ៉េវអាយុ២៣ឆ្នាំមានស្រុកកំណើតនៅ ស្រុកអង្គស្នួល ដែលចាក់ប្រពន្ធខ្លួនឯងរហូតធ្វើឲ្យបាត់បង់ជីវិតនោះ រហូតព្រឹកដល់ព្រឹកថ្ងៃទី២៩ ខែមិថុនា ឆ្នាំ២០២០នេះ ត្រូវបាននគរបាលខណ្ឌបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ហើយ បន្ទាប់ពីការកសាងសំណុំរឿងរួចរាល់។
ជនសង្ស័យជាឃាតកររូបនេះមានឈ្មោះ សុខ លីសម្បត្តិ ហៅវ៉េវ អាយុ២៣ឆ្នាំ មានស្រុកកំណើតនៅក្នុងភូមិទួលខ្លុង ឃុំទួលព្រេជ ស្រុកអង្គស្នួល ខត្តកណ្ដាល ។ ចំណែកស្ត្រីរងគ្រោះជាប្រពន្ធឈ្មោះ លាង ផល្លា អាយុ២៣ឆ្នាំ មុខរបរកម្មការិនីរោងចក្រកាត់ដេរ មានទីលំនៅក្នុងភូមិដូនរ័ត្ន សង្កាត់ឪឡោក ខណ្ឌកំបូល។
ពេលសួរនាំជនដៃដល់រូបនេះ បានប្រាប់នគរបាលឱ្យដឹងថា មានមូលហេតុជាច្រើនដែលបណ្ដាលឲ្យខ្លួនដាច់ចិត្តលើកដៃចាក់ប្រពន្ធខ្លួនឯង រហូតដល់បាត់បង់ជីវិតដើម្បីជាការរំសាយកំហឹង និងភាពក្ដៅក្រហាយហ្មងសៅនៅក្នុងចិត្តយ៉ាងពុះកញ្ជ្រោលជាយូរមកហើយ។ ដោយក្នុងនោះគឺ ៖
ទី១-រយៈពេលជាង៣ខែកន្លងមកហើយ ដែលខ្លួននិងប្រពន្ធជាកម្មការិនីរោងចក្រកាត់ដេរ មិនបានចុះដំណេកគ្នាទេ ទោះបីជាដេកនៅក្នុងបន្ទប់តែមួយជាមួយគ្នាពិតមែន ប៉ុន្តែខ្លួនមិនអាចប៉ះពាល់ខ្លួននាងបានទាល់តែសោះ ។
ទី២-ប្រពន្ធតែងតែលេងឆាតជាមួយប្រុសផ្សេងដែលធ្វើឲ្យខ្លួនមិនសប្បាយចិត្តឡើយ ព្រោះសង្ស័យថា នាងមានស្នេហ៍ថ្មី ។
ទី៣-ពេលដែលខ្លួនយកទូរស័ព្ទនាងមកមើល ប្រពន្ធបាននិយាយថា «បើអ្ហែងចង់ប៉ះទូរស័ព្ទរបស់អញ ចាំអ្ហែងមានលុយដូររបស់ឲ្យអញសិន ចាំអញឲ្យប៉ះ ហើយអញអត់ដាក់លេខកូដទេ។
ជនដៃដល់ប្រាប់ទៀតថា ក្រោយពីប្រពន្ធនិយាយបញ្ហាទី៣បែបបនេះ នៅថ្ងៃទី១ ខែមិថុនា ខ្លួនបានទៅខ្ចីលុយម្ដាយបង្កើត២០០ដុល្លារ ប៉ុន្តែពុំបានភ្លាមៗនោះទេ រហូតដល់ម៉ោង១១ព្រឹកថ្ងៃទី២១ ខែមិថុនា ទើបម្ដាយផ្ញើលុយឲ្យ ហើយខ្លួនបានដករួចយកលុយនោះទៅឲ្យប្រពន្ធចំនួន១៦០ដុល្លារ ដើម្បីឲ្យនាងដូរទូរស័ព្ទ។ ខណៈនោះខ្លួនបានបបួលនាងថា «តោះទៅដូរទូរស័ព្ទបានលុយហើយ ប៉ុន្តែប្រពន្ធបានឆ្លើយថា «ថ្ងៃនេះជាងគេអត់បើកហាងទេ ចាំថ្ងៃច័ន្ទ ពេលនាងទៅធ្វើការចាំនាងដូរខ្លួនឯង» រីឯខ្លួន ក៏យល់ព្រមតាមនឹងដែរ។
ប្រភពដដែលបន្តថា លុះស្អែកឡើងថ្ងៃច័ន្ទ ក្រោយពីប្រពន្ធត្រឡប់មកពីធ្វើការរោងចក្រវិញដល់ផ្ទះពេលល្ងាច ខ្លួនក៏បានឡើងទៅលើផ្ទះសុំមើលទូរស័ព្ទ ហើយឃើញទូរស័ព្ទនៅដដែលលុយក៏អស់ទៀត។ ពេលនោះខ្លួនសួរថា «ទូរស័ព្ទនឹងដូរឬអត់? បើថា ទូរស័ព្ទនឹងអត់ដូរទេ ឲ្យលុយមកខ្ញុំវិញមក ខ្ញុំយកទៅទុក» ស្រាប់តែប្រពន្ធឆ្លើយវិញថា «អញ អត់បានយកលុយអ្ហែងទេ សមត្ថភាពអ្ហែងប៉ុណ្ណឹង អ្ហែងមានលុយឲ្យអញទាំងរយដែរឬ?»។
ទី៤-បន្ទាប់មកខ្លួន បានចុះពីលើផ្ទះវិញបបួលប្រពន្ធស្បថដោយខ្លួននិយាយថា «ហ៊ានស្បថជាមួយខ្ញុំអត់ បើថាអត់បានយកលុយខ្ញុំ? ចង់ឲ្យឡានបុកក៏បាន ឬក៏រន្ទះបាញ់ក៏បានដែរ» រួចហើយខ្លួនបានរត់ទៅយកធូបមកស្បថ ស្រាប់តែប្រពន្ធឆ្លើយថា «បើអញស្បថឲ្យឪអ្ហែងងាប់ អញស្បថ» មិនតែប៉ុណ្ណោះថែមទាំងនិយាយទៀតថា «អ្ហែងរស់នៅជាមួយអញដល់ណាទៀត បើអញមិនដែលខ្វល់ជាមួយអ្ហែងផងនឹង?»។
ជនដៃដល់ខាងលើនិយាយបន្តថា សម្ដីមាក់ងាយពីសំណាក់ប្រពន្ធបែបនេះ ធ្វើឲ្យខ្លួនខឹងខ្លាំងណាស់ ហើយក្រោយពីការឈ្លោះប្រកែកគ្នាមួយប្រាវ ខ្លួនក៏បានរត់ទៅយកកាំបិតត្នោត រួចបានចាក់ទៅលើប្រពន្ធ១កាំបិតប៉ុណ្ណោះ ខណៈដែលនាងកំពុងឈរហាលសម្លៀកបំពាក់ បណ្ដាលឲ្យនាងដួលដេក។ បន្ទាប់មកទៀត ខ្លួនក៏ជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ គេចខ្លួនទៅកាន់ភូមិពោធិ៍តាអ៊ុន សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ដោយស្នាក់នៅលាក់ខ្លួននៅផ្ទះអ្នកភូមិជាមួយគ្នាកាលពីមុន ហើយក៏ទៅរស់នៅខេត្តកំពង់ធំនោះ លុះក្រោយមកក៏ត្រូវនគរបាលចុះទៅឃាត់ខ្លួនបានតែម្ដង។
សូមរម្លឹកផងដែរថា ប្ដីប្រពន្ធ១គូនេះបានរៀបការជាមួយគ្នាកាលពីឆ្នាំ២០១៧ និងបង្កើតបានកូនប្រុសម្នាក់អាយុជាង២ខួប ហើយជនដៃដល់ជាប្ដីបានចាក់ប្រពន្ធកាលពីម៉ោង៧យប់ ថ្ងៃ២២ ខែមិថុនា ឆ្នាំ២០២០ នៅក្នុងភូមិដូនរ័ត្ន សង្កាត់ឪឡោក ខណ្ឌកំបូល រាជធានីភ្នំពេញ។
តាមក្រុមគ្រួសារខាងស្រីប្រាប់ថា មូលហេតុគឺបណ្ដាលមកពីជននេះប្រចណ្ឌប្រពន្ធហួសហេតុពេក សូម្បីតែនាងទៅបុណ្យទាន ឬចូលរួមមង្គលការណាមួយក៏មិនបានផង ប៉ុន្តែបើនៅពេលដែលនាងហ៊ានតែធ្វើខ្លួនទៅការ ឬបុណ្យមិត្តភក្ដិម្ដងៗត្រឡប់មកដល់ផ្ទះវិញ គឺដឹងតែមានរឿងហើយ និងធ្លាប់ជិះម៉ូតូបំបុកប្រពន្ធធ្វើឱ្យរងរបួសម្ដងរួចមកហើយដែរ ក្រៅពីនេះនាងត្រូវប្ដីវាយដំជាបន្តបន្ទាប់ថែមទៀតផង។ មិនតែប៉ុណ្ណោះជននេះ ត្រូវជាប់ឈ្មោះថា «ពូកែប្រចណ្ឌប្រពន្ធតពូជតែម្ដង» ព្រោះកាលពីឪពុករបស់គេក៏ជាអ្នកប្រចណ្ឌប្រពន្ធយ៉ាងគ្មានហេតុផល រហូតឈានដល់ការលែងលះបែកបាក់គ្រួសារដែរ ។
គួររំលឹកទៀតថា ប្រចណ្ឌតំណពូជ! តាំងពីឪពុកដល់កូនប្រុស រហូតដាច់ចិត្តលើកដៃប្រល័យសង្ខារនាង (វីដេអូ) ។ (កែសម្រួលដោយ ៖ បុប្ផា)
ចែករំលែកព័តមាននេះ