ខេត្តកំពង់ឆ្នាំង ៖ មន្ត្រីរាជការចូលនិវត្តន៍ម្នាក់ទើបចេះបើករថយន្តថ្មីៗ ពេលយករថយន្តមកលាងបាន
បើករថយន្តឡើងលើខឿនលាងរថយន្ត ស្រាប់តែច្រឡំជាន់ហ្គារបន្ថែម បណ្តាលអោយរថយន្តស្ទុះទៅបុកជញ្ជាំងរបងផ្ទះគេបាក់អស់ប្រមាណ២ម៉ែត្រការ៉េ លាន់ឮដូចរន្ទះ លៀនក្បាលរថយន្តអើតទៅម្ខាង ។ ហេតុការណ៍ខាងលើនេះ បានកើតឡើងនៅម៉ោង៩និង១៥នាទី ព្រឹកថ្ងៃទី២៦ ខែមិថុនា ឆ្នាំ២០២០ នៅយានដ្ឋានលាងរថយន្តមួយកន្លែង នៅមុខហាងកាហ្វេបុរី ខ្លះហៅហាងបឹងកំប្លោក ស្ថិតនៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។
សមត្ថកិច្ចនគរបាលនៅក្នុងមូលដ្ឋាន ដែលបានចុះទៅសម្របសម្រួលគ្រោះថ្នាក់ខាងលើនេះ បានអោយដឹងថា រថយន្តបង្កគ្រោះថ្នាក់ខាងលើនេះ ម៉ាកកូរ៉ូឡា ពណ៌ស ពាក់ផ្លាកលេខ ភ្នំពេញ២AT ០៩៩៦ បើកបរដោយបុរសវ័យចំណាស់ម្នាក់ ជាមន្ត្រីរាជការនៅមន្ទីរកសិកម្មខេត្តចូលនិវត្តន៍ មានទីលំនៅក្នុងក្រុងកំពង់ឆ្នាំង ។
នៅមុនពេលកើតហេតុ បុរសម្នាស់រថយន្តបានបើករថយន្តមកលាង នៅកន្លែងលាងរថយន្តខាងលើ ប៉ុន្តែគេដឹងថា ដោយសារគាត់ទើបតែចេះបើកស្ទើរភ្លើង ដែលកូនគាត់បានទិញរថយន្តថ្មីជិះ ហើយអោយរថយន្តកូរ៉ូឡានេះមកគាត់ ។ ពេលគាត់បើករថយន្តឡើងលើខឿនលាងរថយន្ត គឺពេលត្រូវជាន់ហ្វាំងឈប់ ភ្លាត់ស្នៀតមិនជាន់ហ្វ្រាំងទេ បែរជាច្រឡំជាន់ហ្គារបន្ថែម ធ្វើអោយរថយន្តស្ទុះទៅបុកជញ្ជាំងរបងថ្មីលាន់ឮដូចផ្ទុះគ្រាប់បែក ផ្អើលអ្នកផឹកកាហ្វេពេញហាងបុរីទាំងព្រឹក ។
ករណីនេះ បណ្តាលអោយរបងថ្មប្រមាណ២ម៉ែត្រការ៉េបាក់ធ្លុះធ្លាយ និងសំណាងដែរ ក្នុងពេលនោះកង់រថយន្តខាងមុខ បានកល់ជាប់នឹងធ្នឹមសសរខឿនលាងរថយន្តទៅមុខលែងរួច កុំអីម៉ាល្បឿនស្ទុះនេះ រថយន្តនោះអាចនឹងធ្លាយទៅបុកនឹងជញ្ជាំងផ្ទះអ្នកលក់បុកល្ហុងថៃថែមទៀត ។ ភ័យម្យ៉ាងទៀត ប្រសិនពេលនោះមានកម្មករលាងរថយន្តនៅស៊ីញ៉ូចំពីមុខវិញ ក៏អាចត្រូវរថយន្តនេះបុកស្លាប់ផងក៏មិនដឹង ។
ក្រោយពេលកើតហេតុ គេឃើញម្ចាស់កន្លែងលាងរថយន្ត បានហៅសមត្ថកិច្ចនគរបាលចរាចរណ៍ អោយមកជួយសម្របសម្រួលជាមួយម្ចាស់របងផ្ទះ និងម្ចាស់កន្លែងលាងរថយន្ត ដោយត្រូវតែសងថ្លៃរបងថ្មគេមិនតិចជាង១០០ដុល្លារឡើយ ។ បន្ទាប់មក ទើបឃើញមានរថយន្តស្ទូចមកស្ទូចរថយន្តបង្កគ្រោះថ្នាក់ខាងលើនេះ ចេញពីកន្លែងកើតហេតុអស់ប្រាក់ឈ្នួលប្រមាណ១០០ដុល្លារទៀត ដើម្បីយករថយន្តនេះចេញទៅជួសជុល ។ ចំណែករថយន្តនោះ ក៏រងការខូចខាតបាក់កាងមុខផងដែរ ៕
ចែករំលែកព័តមាននេះ