រាជធានីភ្នំពេញ ៖ រដ្ឋលេខាធិការ និងជាអ្នកនាំពាក្យក្រសួងបរិស្ថានបានអំពាវនាវជាថ្មីទៀត ដល់ប្រជាពលរដ្ឋកម្ពុជាឲ្យរួមគ្នាថែរក្សាអភិរក្សប្រភេទសត្វគ្រប់ប្រភេទសំខាន់ប្រភេទសត្វដ៏កម្រនៅកម្ពុជា ដើម្បីរួមចំណែកបម្រើឲ្យវិស័យទេសចរណ៍ ខណៈដែលប្រភេទសត្វដ៏កម្រខ្លះដែលកំពុង មានវត្តមាននៅកម្ពុជាវាស្ទើរតែផុតពូជទៅហើយនៅលើពិភពលោក ។ លោក នេត្រ ភក្ត្រា រដ្ឋលេខាធិការក្រសួងបរិស្ថាន បានថ្លែងនូវការអំពាវនាវនោះក្នុងឱកាសដែលលោកចូលរួមក្នុង ពិធីប្រគល់ និងទទួលសត្វអណ្តើកហ្លួងចំនួន២ក្បាលពីលោកស្រី ឡាយ ខុនថេង ដែលបានជាវអណ្តើកពីប្រជានេសាទ ហើយយកមកប្រគល់ឲ្យក្រសួងបរិស្ថាន ដើម្បីអភិរក្សប្រភេទ សត្វអណ្តើកហ្លួងដ៏កម្រនេះ។
លោក នេត្រ ភក្ត្រា បានថ្លែងឲ្យដឹងថា សត្វអណ្តើកហ្លួងដ៏កម្រ ទាំង២ក្បាលនេះ មានទម្ងន់ប្រមាណជាង២០គីឡូក្រាម ក្នុងមួយក្បាលៗខណៈដែល សត្វអណ្តើកហ្លួងទាំង២ក្បាលនេះបានជាប់មងអ្នកនេសាទ ហើយត្រូវបានបងស្រី ឡាយ ខុនថេង គាត់បានដឹងអំពីអត្ថប្រយោជន៍នៃប្រភេទសត្វដ៏កម្រនេះ ហើយក៏បានទិញពីអ្នកនេសាទយកមក ប្រគល់ឲ្យក្រសួងបរិស្ថានតែម្តង។ លោករដ្ឋលេខាធិការបានបញ្ជាក់ថា អណ្តើកហ្លួង ឬហៅថា អណ្តើកសរសៃជាប្រភេទសត្វដ៏កម្រ ហើយជិតផុតពូជទៅហើយនៅលើពិភពលោកក្នុងចំណោម ប្រភេទសត្វកម្រប្រមាណជាង២០ប្រភេទ។
លោកបញ្ជាក់បន្ថែមថា សម្រាប់សត្វអណ្តើក លើពិភពលោក គឺមានជាង៣០០ប្រភេទឯណោះ ខណៈដែលសត្វអណ្តើកហ្លួងនេះស្ថិតក្នុង ប្រភេទសត្វកម្រដែលជិតផុតពូជនៅលើពិភពលោកផងដែរ។ លោក នេត្រ ភក្ក្រា ក៏បានរម្លឹកឡើងវិញថា ប្រភេទសត្វអណ្តើកហ្លួងនេះមានប្រវត្តិផ្សារភ្ជាប់ទៅនឹងព្រះមហាក្សត្រ ខណៈដែលព្រះអង្គយាងទៅប្រពាតនៅកន្លែងស្រែអំបិលក៏មានប្រជាពលរដ្ឋ បានយកសត្វអណ្តើកនេះ ទៅថ្វាយព្រះមហាក្សត្រ ។ ដូច្នេះហើយទើបតំណតមកគេក៏បាន ហៅសត្វអណ្តើកប្រភេទនេះថា « អណ្តើកហ្លួង » រហូតមក។
តាមលោក នេត្រ ភក្ត្រា បានបញ្ជាក់ថា នៅកម្ពុជាត្រូវបានគេជឿថា វាស្ទើរតែបាត់ពូជ សត្វអណ្តើកហ្លួងនេះទៅហើយ… ប៉ុន្តែនៅអំឡុងឆ្នាំ២០០០ មានការស្វែងរកឃើញសត្វ អណ្តើកហ្លួងនេះតាមរយៈអង្គការ CWS ជាមួយនឹងគម្រោងរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ។ លោកថា ចំនួននៃសត្វអណ្តើកហ្លួងនេះគឺមិនមានច្រើននោះទេ ដូច្នេះហើយវាស្ថិតក្នុងប្រភេទសត្វកម្រ។ លោកថា តាមរយៈការស្រាវជ្រាវរកឃើញថា ប្រភេទសត្វអណ្តើកហ្លួងនេះមាននៅសល់ ក្នុងតំបន់ស្រែអំបិលនេះ បន្ទាប់មកខាងអង្គការ CWS និងរដ្ឋបាលជលផលបានរៀបចំ តំបន់នេះជាតំបន់អភិរក្ស ហើយបានបន្តការឃ្លាំមើលនូវកន្លែងពងកូនរបស់សត្វអណ្តើក ហ្លួងជាប់ជាប្រចាំ។
លោក នេត្រ ភក្ត្រា បានឲ្យដឹងដែរថា ចាប់ពីឆ្នាំ២០០២មក រហូតមកដល់ឆ្នាំ២០២០នេះ គឺកន្លែងសម្បុកពងកូនរបស់សត្វអណ្តើកហ្លួងមានចំនួន៤៣កន្លែង ហើយមានពងចំនួន ៦៧៨៧ ខណៈដែលពងដែលបានញាស់ ហើយនោះមានចំនួន៤៥០កូន។ ទន្ទឹមនោះខាងអង្គការ CWS ក៏មានកន្លែងចិញ្ចឹមសត្វអណ្តើកហ្លួងបែបអភិរក្សមួយផងដែរ នៅក្នុងមណ្ឌលអភិរក្ស សត្វល្មូននៅខេត្តកោះកុង ហើយចាប់ពីឆ្នាំ២០១៥មក អង្គរបានប្រលែង សត្វអណ្តើកហ្លួង ចំនួន៨៦ក្បាល រួចមកហើយផងដែរ។ លោក នេត្រ ភក្ត្រា បានថ្លែងអំណរគុណ យ៉ាងជ្រៅចំពោះបងស្រីដែលបានជួយសង្គ្រោះសត្វដ៏កម្រនេះ ព្រោះថា ប្រសិនបើសត្វអណ្តើកហ្លួង ដ៏កម្រនេះធ្លាក់លើដៃជនមួយ ចំនួនណានោះដែលគាត់មិនយល់អំពីតម្លៃ ឬអត្ថប្រយោជន៍នៃការ អភិរក្សប្រហែលជាសត្វអណ្តើកហ្លួងទាំង២ក្បាលនេះមិនដឹងថា មានវាសនាយ៉ាងណានោះទេ។ លោកថា ទង្វើរបស់បងស្រីគឺជាកាយវិការដ៏ គំរូមួយសម្រាប់ប្រជាជនកម្ពុជាក្នុងការចូលរួមអភិរក្ស សត្វព្រៃដ៏មានតម្លៃនេះ។
លោកថា ការចូលរួមក្នុងការអភិរក្សសត្វព្រៃដ៏មានតម្លៃ ឬប្រភេទសត្វដ៏កម្រ និងជិតផុតពូជនេះវាមិនគ្រាន់តែមានតម្លៃសម្រាប់ការសិក្សាសម្រាប់ការអភិរក្សជីវៈចម្រុះសម្រាប់ ពិភពលោកនោះទេ ប៉ុន្តែវាមានតម្លៃខ្លាំងណាស់សម្រាប់វិស័យទេសចរណ៍នៅកម្ពុជា ព្រោះថា ករណី ប្រភេទសត្វអណ្តើកហ្លួងដ៏កម្រ និងជិតផុតពូជនេះវានឹងធ្វើឲ្យគ្រប់មនុស្សជាតិ ចង់ដឹងចង់ ឃើញនូវប្រភេទសត្វដ៏កម្រនេះ។ លោកអំពាវនាវម្តងទៀតដល់ប្រជាពលរដ្ឋកម្ពុជាចូលរួមការពារ អភិរក្សសត្វព្រៃសំខាន់ប្រភេទសត្វកម្រហើយត្រូវនិយាយថាទេ ចំពោះការបរិភោគសត្វព្រៃ ការជួញដូរ ការបរបាញ់សត្វ ព្រោះសត្វព្រៃជាជីវៈចម្រុះដែលធ្វើឲ្យប្រទេសកម្ពុជាយើងកាន់តែមានភាពសម្បូរបែប បន្ថែមទៀតតាមរយៈនៃការការពារ ការអភិរក្សសត្វព្រៃ ខណៈដែលយើងក៏អាចទាញយកផល សេដ្ឋកិច្ចតាមរយៈទេសចរណ៍ធម្មជាតិ។
លោកស្រី ឡាយ ផុនថេង មានប្រសាសន៍ថា ការទិញសត្វអណ្តើកហ្លួង២ក្បាល ហើយយកមកប្រគល់ជូនក្រសួងបរិស្ថាននេះគឺជាការរួមចំណែក អភិរក្សសត្វព្រៃឬសត្វដ៏កម្រនៅកម្ពុជា។ លោកស្រីបន្តថា ការទិញសត្វអណ្តើកហ្លួង២ក្បាលនេះ ក៏ជាការសង្គ្រោះដល់ជីវិតសត្វផងដែរ ព្រោះថាបើយើងបណ្តោយឲ្យគេលក់តៗ គ្នាទៅប្រាកដណាស់សត្វអណ្តើកហ្លួងទាំងក្បាលនេះនឹងត្រូវអស់ជីវិតមិនខាន។ លោកស្រីអំពាវនាវផងដែរ ដល់ប្រជាពលរដ្ឋកម្ពុជាឲ្យបញ្ឈប់ការប្រមាញ់សត្វព្រៃ ការបរិភោគសត្វព្រៃ សំខាន់សត្វដ៏កម្រដូចជា អណ្តើកហ្លួងនេះជាដើម ព្រោះថា សកម្មភាពទាំងអស់មិនត្រឹមតែ គ្មានប្រយោជន៍យូរអង្វែងនោះទេ ប៉ុន្តែវាបំផ្លាញនូវជីវៈចម្រុះបំផ្លាញឲ្យ ផុតពូជប្រភេទសត្វដ៏កម្រតែប៉ុណ្ណោះ។ សូមជម្រាបថា ប្រទេសកម្ពុជាត្រូវបានទទួលស្គាល់ថា ជាប្រទេសដែលសម្បូរដោយជីវៈចម្រុះ ហើយប្រភេទសត្វមួយចំនួនដែលជិតផុតពូជ នៅលើពិភពលោកគឺបច្ចុប្បន្នមានវត្តមាននៅកម្ពុជាដូចជា ប្រភេទសត្វអណ្តើកហ្លួងនេះជាដើម៕ ដោយ ៖ សុខ សារ៉ាយ
ចែករំលែកព័តមាននេះ