កុលបុត្រទាំងឡាយដែលសម្រេចចិត្តចេញចាកកាម ចេញចាកទ្រព្យសម្បត្តិគឺជាអ្នកដើរតាមគន្លងធម៌ដ៏ស្ងប់ស្ងាត់ ជាផ្លូវនៃអ្នកបួសរស់នៅមានលក្ខណៈខុសពីគ្រហស្ថ ជាអ្នកមិនមានចិត្តជាប់ជំពាក់ទៅនឹងផ្ទះសម្បែង មាសប្រាក់ ទ្រព្យសម្បតិ្តអ្វីឡើយ ទាំងការស្លៀកពាក់ ទាំងការរស់នៅក៏ខុសពីគ្រហស្ថ ពោលគឺយកធម៌វិន័យជាធំ ។
អ្នកបួសគប្បីពិចារណាយ៉ាងនេះថាៈ អាត្មាអញកាន់យកភេទដ៏ប្លែកអំពីភេទរបស់គ្រហស្ថ, ការប្រព្រឹត្តចិញ្ចឹមជីវិតតាមផ្លូវសុចរិតរបស់អាត្មាអញ អាត្មាអញគួរធ្វើ គួរប្រព្រឹត្តឱ្យបានត្រឹមត្រូវ, យប់និងថ្ងៃទាំងឡាយនេះកន្លងទៅ តើអាត្មាអញបានធ្វើអ្វីខ្លះហើយ, សព្វថ្ងៃនេះអាត្មាអញមានសេចក្តីអភិរម្យត្រេកអរក្នុងផ្ទះដ៏ស្ងៀមស្ងាត់ដែរឬទេ, អាកប្បកិរិយាផ្សេងអំពីគ្រហស្ថ អាត្មាអញគួរធ្វើ គួរប្រតិបត្តិទេ ។
បព្វជិតគប្បីពិចារណារឿយៗថា ឧត្តរិមនុស្សធម៌គឺជាធម៌របស់មនុស្សដ៏ប្រសើរក្រៃលែងមានដល់អាត្មាអញហើយឬ ធម៌ដ៏វិសេសដែលគួរនឹងឃើញដោយប្រាជ្ញាដ៏ប្រសើរអាត្មាអញបានត្រាស់ដឹងហើយឬ, អាត្មាអញមានកម្មជារបស់ខ្លួន មានកម្មជាទាយាទ មានកម្មជាកំណើត មានកម្មជាផៅពង្ស មានកម្មជាគ្រឿងរលឹកឃើញ អាត្មានឹងធ្វើនូវកម្មណាល្អ ឬអាក្រក់ អាត្មាអញគង់នឹងបានជាអ្នកទទួលយកនូវផលនៃកម្មនោះពុំខានឡើយ, ការព្រាត់ប្រាសនិរាសចាកសត្វ និងសង្ខារទាំងអស់ដែលជាទីស្រឡាញ់ជាទីគាប់ចិត្តនៃអាត្មាអញតែងមានជាធម្មតា ។
ធម៌ទាំង៨ប្រការនេះអ្នកបួសគួរពិចារណាជាប់ជានិច្ចក្នុងសន្តាន ដើម្បីធ្វើអាសវកិលេសអោយយស្រាលចុះ ជីវិតរស់នៅដោយសេចក្តីស្ងប់ ។ សាន សារិន
ចែករំលែកព័តមាននេះ