ខេត្តកែប ៖ យុទ្ធនាការបោសសំអាត និងរើសសំរាមនៅទីក្រុងកែប កាលពីព្រឹកថ្ងៃទី១៣ ធ្នូ ដែលមានឈ្មោះថា «កែបសំអាតកែប» (Kep Kep Clean) លើកទី២ ឆ្នាំ២០១៤ ដែលរៀបចំឡើងដោយសហព័ន្ធកីឡាវាយកូនបាល់កម្ពុជា រួមជាមួយអង្គការមូលនិធិទឹកចិត្តទាំង៣របស់ជប៉ុន បានដំណើរការនិងបញ្ចប់ទៅដោយជោគជ័យ ដោយមានមនុស្សប្រមាណជិត២០០០នាក់ចូលរួម ។
យុទ្ធនាការ «កែប សំអាតកែប» លើកទី២ប្រចាំឆ្នាំ២០១៤នាព្រឹកនោះ មានការចូលរួមគាំទ្រពីលោកអភិបាលខេត្តកែប កែន សត្ថា លោក សំ សារិន ប្រធានក្រុមប្រឹក្សាខេត្ត មន្ត្រីរាជការសាលាក្រុងកែប បវរកញ្ញាឆ្នាំ២០១៤របស់ជប៉ុន Hao kak Marina កញ្ញា Hisae Arai បវរកញ្ញាជប៉ុនឆ្នាំ២០១១ ជាទូតសុច្ឆន្ទៈសហព័ន្ធកីឡាវាយកូនបាល់កម្ពុជា ព្រមទាំងមានអ្នកចូលរួមជាយុវជន កុមារ និងមហាជនស្ម័គ្រចិត្ត កីឡាករវាយកូនបាល់កម្ពុជាល្បីៗ និងអ្នកវាយកូនបាល់វ័យក្មេងនៅខេត្តកែប សរុបប្រមាណជិត២.០០០នាក់ ។ អ្នកចូលរួមទាំងអស់បានដើរប្រមូល និងសំអាតសំរាមនៅតាមដងផ្លូវនានា ផ្សារក្តាម តាមឆ្នេរសមុទ្រ និងរហូតដល់ក្នុងផ្សារកែប ដែលមានវិសាលភាពលើផ្ទៃដីប្រមាណជា១៥គីឡូម៉ែត្រក្រឡា ។
ជាមួយនឹងការបោសសំអាតសំរាម ក៏មានការផ្លាស់ប្តូរស្លាកសញ្ញាថ្មី និងធុងសំរាមថ្មីប្រមាណជាង១០០ ដែលបានដាក់ពង្រាយនៅតាមទីកន្លែងសាធារណៈក្នុងខេត្តកែប ដោយយកធុងចាស់ៗចេញផងដែរ ។
កញ្ញា Hisae Arai បវរកញ្ញាជប៉ុនឆ្នាំ២០១១ ទូតសុច្ឆន្ទៈសហព័ន្ធកីឡាវាយកូនបាល់កម្ពុជា និងជាអគ្គនាយកប្រតិបត្តិនៃអង្គការមូលនិធិទឹកចិត្តទាំង៣ បានបញ្ជាក់ក្នុងយុទ្ធនាការ «កែប សំអាតកែប» នេះថា ដោយមានបទពិសោធន៍ និងធ្លាប់ទទួលបានជោគជ័យក្នុងការរៀបចំកម្មវិធី «កែប សំអាតកែប» លើកទី១កាលពីឆ្នាំ២០១៣កន្លងមកនោះ អង្គការមូលនិធិទឹកចិត្តទាំង៣ សហការជាមួយសហព័ន្ធកីឡាវាយកូនបាល់កម្ពុជា ក៏បានរៀបចំនូវកម្មវិធី «កែប សំអាតកែប» នៅខេត្តកែបជាលើកទី២ ក្នុងគោលបំណងបំផុសស្រទាប់យុវជន ក៏ដូចជាមហាជនទូទៅឲ្យចូលចិត្តលេងកីឡា ដើម្បីលើកកម្ពស់សុខភាព និងចេះថែរក្សាបរិស្ថាន ។
កញ្ញា Hisae Arai បានអះអាងថា ព្រឹត្តិការណ៍នេះ នឹងធ្វើឱ្យអ្នករស់នៅខេត្តកែប កាន់តែយកចិត្តទុកដាក់លើសុខភាព និង ការពារបរិស្ថានសម្រាប់ខេត្តទេសចរណ៍របស់ខ្លួនផងដែរ ។ អ្វីៗទាំងនេះ ធ្វើឡើងគឺដើម្បីសុខភាព ដើម្បីកីឡា និងជាការផ្លាស់ប្ដូរវប្បធម៌រវាងកម្ពុជា និង ជប៉ុន ។
លោក កែន សត្ថា អភិបាលខេត្តកែប បានមានប្រសាសន៍ថា យុទ្ធនាការនេះមានសារៈសំខាន់ខ្លាំងណាស់ ដែលនឹងធ្វើឱ្យខេត្តកែបមានសោភ័ណភាពកាន់តែស្រស់ស្អាតជាងមុននិងមានបរិស្ថានអនាម័យល្អ ដែលអាចទាក់ទាញភ្ញៀវទេសចរបានកាន់ច្រើនថែមទៀត។ ទោះជាយ៉ាងនេះក្តី លោកអភិបាលខេត្តបញ្ជាក់ថា បញ្ហាចំពោះមុខគឺខេត្តត្រូវការធុងសំរាមប្រមាណ៤០០០ទៅ៥០០០ធុង ដើម្បីបំពេញសេចក្តីត្រូវការនៅតាមទីសាធារណៈ ខណៈដែលបច្ចុប្បន្នខេត្តមានធុងសំរាមតែប្រមាណ៥០០ធុងនោះ ។
ចុងបញ្ចប់កម្មវិធីបោសសំអាតសំរាមក្នុងយុទ្ធនាការ កែប សំអាត កែប (Kep Kep Clean) ក៏មានការបង្ហោះខ្លែង និងដាំដើមឈើ ជានិមិត្តរូបនៃចំណងសាមគ្គីភាពយូរអង្វែងរវាងកម្ពុជា-ជប៉ុនផងដែរ ៕
ចែករំលែកព័តមាននេះ