អង្គការសិទ្ធិមនុស្សស៊ីរី OSDH ដែលមានប្រភពព័ត៌មានច្រើន រាយការណ៍កាលពីថ្ងៃទី១២ ធ្នូ កន្លងមកនេះថា ជនស៊ីវិលជាង៩០០នាក់ ស្លាប់ឬរបួសរយៈពេល១៦២ថ្ងៃចុងក្រោយនេះ ដោយសារការវាយប្រហាររបស់ពួកឧទ្ទាមលើតំបន់នានា ស្ថិតក្រោមការត្រួតត្រារបស់រដ្ឋាភិបាលនៅទីក្រុងអាឡែប ភាគខាងជើងប្រទេស ។
OSDH បញ្ជាក់ថា ជនស៊ីវិល២០៣នាក់ ត្រូវស្លាប់ហើយ៧០០នាក់ទៀតត្រូវរបួស ដោយសារការវាយប្រហារនានារបស់ក្រុមឧទ្ទាមមួយដែលហៅខ្លួនគេថា ក្រុម «កងពលទុក្ករកម្ម BADR» ។ អង្គការនេះបន្តថា កុមារ៤២នាក់ មានអាយុក្រោម១៨ឆ្នាំ ត្រូវស្លាប់ដោយសារការបាញ់ផ្លោងដាក់បណ្តាផ្នែកនៃទីក្រុងអាឡែប ស្ថិតក្រោមការត្រួតត្រារបស់រដ្ឋាភិបាល ។
OSDH គូសបញ្ជាក់ថា ក្រុមដែលធ្វើការវាយប្រហារទាំងនេះដឹកនាំដោយបុរសម្នាក់មានឈ្មោះថា ខាឡេដ ហាយា៉នី ។ ក្រុមនោះប្រើប្រាស់កាំភ្លើងត្បាល់ គ្រាប់រុ៉ក្កែត និងដបឧស្ម័នលាយគ្រឿងផ្ទុះសម្រាប់វាយប្រហារ ។ ក្រុងអាឡែប ដែលកាលពីមុនជាមជ្ឈមណ្ឌលសេដ្ឋកិច្ចរបស់ស៊ីរី នោះជាទីលាននៃការប្រយុទ្ធគ្នាយា៉ងសាហាវបំផុតមួយរវាងពួកឧទ្ទាម និងកងទាហានរដ្ឋាភិបាល ។ ពួកឧទ្ទាមកាន់កាប់ជិតពាក់កណ្តាលទីក្រុងនោះ និងតំបន់ជុំវិញភាគច្រើន ។ ចំណែករដ្ឋាភិបាលវិញ បន្តការតស៊ូដើម្បីវាយបណ្តេញពួកឧទ្ទាមចេញពីទីក្រុងនោះ ៕
ចែករំលែកព័តមាននេះ