រាជធានីភ្នំពេញ៖ រថយន្តក្រុងប្រភេទទេសចរណ៍មួយគ្រឿងមានដឹកទំនិញពេញ បានបើកគេចរថយន្តមួយគ្រឿងផ្សេងទៀតក៏ជ្រុលចង្កូតឡើងលើសួនច្បារខណ្ឌចែកទ្រូងផ្លូវជាតិលេខ៦ រួចបុកបង្គោលភើ្លងគោមបំភ្លឺផ្លូវ បណ្តាលអោយទ្រេត ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី២០ ខែមិថុនា ឆ្នាំ២០២០ ស្ថិតនៅតាមបណ្តោយផ្លូវជាតិលេខ៦ ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
រថយន្តក្រុងមួយគ្រឿងដែលជួបគ្រោះថ្នាក់ខាងលើម៉ាកហ៊ីយ៉ាន់ដាយ ប្រភេទទេសចរណ៍២៥កៅអី ពណ៌ខៀវលាយស ពាក់ស្លាកលេខ ភ្នំពេញ ៣B-៤០៤១ អ្នកបើកបរមិនស្គាល់អត្តសញ្ញាណ ។
តាមប្រភពពីអ្នកបើកបរបានអោយដឹងថា មុនពេលកើតហេតុ គាត់បានបើករថយន្តមួយគ្រឿងខាងលើធ្វើដំណើរក្នុងទិសដៅពីត្បូងទៅជើង(ចេញពីរាជធានីភ្នំពេញ) ក្នុងល្បឿនលឿន លុះមកដល់កន្លែងកើតហេតុ ក៏បានបើកជែងខាងឆ្វេងរថយន្តមួយគ្រឿងទៀតប្រុងវ៉ា ស្រាប់តែមានរថយន្តមួយគ្រឿងផ្សេងទៀត មកពីក្រោយជែងដែរ ជាហេតុធ្វើអោយគាត់ទាញចង្កូតគេច ក៏ជ្រុលឡើងសួនច្បារខណ្ឌចែកទ្រូងផ្លូវ និងបុកបង្គោលភ្លើងបំភ្លឺផ្លូវ បណ្តាលអោយទ្រេត ។ ចំណែករថយន្តក៏បានរងការខូចខាតខ្ទេចផ្នែកខាងមុខបែកកង់ទៅមុខលែងរួច។
នៅក្នុងគ្រោះថ្នាក់ចរាចរណ៍ខាងលើនោះពុំបណ្តាលអោយមនុស្សណាម្នាក់រងរបួសឡើយ ។ ក្រោយពេលកើតហេតុ ម្ចាស់រថយន្តមួយគ្រឿងខាងលើក៏បានហៅរថយន្តផ្សេងមកសេងអីវ៉ាន់ ហើយនគរបាលបានចុះចុះទៅវាស់វែងនាំយករថយន្តនោះបញ្ជូនទៅកាន់ការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញដើម្បីដោះស្រាយសងការខូចខាតទ្រព្យសម្បត្តិសាធារណៈ៕ (កែសម្រួលដោយ ៖ ធីតា)
ចែករំលែកព័តមាននេះ