ខេត្តរតនគិរី ៖ មន្ត្រីឧទ្យានុរក្សប្រចាំស្រុកវើនសៃ នៅថ្ងៃទី១៧ ខែមិថុនា នេះបានចុះសហការជាមួយអាជ្ញាធរភូមិឃុំប៉ាកាឡាន់ ចុះល្បាតក្នុងគោលដៅក្នុងតំបន់ ដើម្បីពិនិត្យនិងបង្ក្រាបបទល្មើសធនធានធម្មជាតិ ដោយបានឃើញបង្គោលហ៊ុមព័ទ្ធយកដីព្រៃធ្វើជាកម្មសិទ្ធ ។…
ខេត្តរតនគិរី ៖ មន្ត្រីឧទ្យានុរក្សប្រចាំស្រុកវើនសៃ នៅថ្ងៃទី១៧ ខែមិថុនា នេះបានចុះសហការជាមួយអាជ្ញាធរភូមិឃុំប៉ាកាឡាន់ ចុះល្បាតក្នុងគោលដៅក្នុងតំបន់ ដើម្បីពិនិត្យនិងបង្ក្រាបបទល្មើសធនធានធម្មជាតិ ដោយបានឃើញបង្គោលហ៊ុមព័ទ្ធយកដីព្រៃធ្វើជាកម្មសិទ្ធ ។ ក្នុងនោះក្រុមការងារបានដកបង្គោលចំនួន៥០បង្គោល ។
លោកនេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានប្រាប់សារព័ត៌មានកាសែតកោះសន្តិភាព ថ្ងៃទី១៨ ខែមិថុនា នេះថា «ក្នុងក្របខណ្ឌនៃការបង្ក្រាបបទល្មើសនៃធនធានធម្មជាតិ និងការទន្ទ្រានហ៊ុមព័ទ្ធយកដីព្រៃ ក្នុងដែនការពារព្រៃធម្មជាតិ ពេលឧទ្យានុរក្សចុះល្បាត ហើយប្រទះឃើញបង្គោលត្រូវបានដាំ ឬគូសវាសជាសញ្ញាអ្វីមួយ គឺមន្ត្រីឧទ្យានុរក្សនឹងដកចេញ ឬគាស់ចេញភ្លាម ។
ជនខិលខូចមួយចំនួនបានប្រើវិសាស្ត្របែបនេះ ដើម្បីបន្លំយកដីព្រៃធ្វើជាកម្មសិទ្ធ ហើយអ្នកខ្លះទៀតធ្វើការបន្លំក្រោមរូបភាពដាំបន្លែ» ។ លោក ភក្ត្រា បានបន្ថែមថា ព្រោះក្នុងអំឡុងពេលនេះជារដូវវស្សា រុក្ខជាតិនានា ឬដំណាំហូបផ្លែជាច្រើន ងាយនឹងដុះលូតលាស់បានលឿន ដូចនេះជនខិតខូចខ្លះលួចដាំដូចជាចេក ស្វាយ និងស្វាយចាទី ។
សូមបញ្ជាក់ថា ក្រុមការងារបានធ្វើការផ្សព្វផ្សាយអំពីច្រករបៀងអភិរក្សជីវៈចម្រុះ និងការចុះធ្វើបច្ចុប្បន្នភាពដីចម្ការរបស់ប្រជាពលរដ្ឋនៅភូមិទួលខ្មែរ ស្ថិតក្នុងភូមិកំពង់ចាម ឃុំប៉ាកាឡាន់ ស្រុកវើនស ខេត្តរតនគិរី ៕
ចែករំលែកព័តមាននេះ