សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី អះអាងកាលពីថ្ងៃទី១៤ កញ្ញា ថា អ៊ុយក្រែនត្រៀមចាត់បណ្ដាវិធានការកាត់បន្ថយជម្លោះ ប្រសិនបើរុស្ស៊ីធ្វើដូចគ្នានោះដែរ ។ លោកលើកបែបនេះ ដោយមិននិយាយពីការអះអាងរបស់ប្រធានាធិបតីអាមេរិក លោកដូណាល់ត្រាំដែលថា ក្រុងមូស្គូ និងក្រុងគៀវ បានយល់ព្រមលែងវាយប្រហារ បណ្ដាហេដ្ឋា រចនាសម្ព័ន្ធថាមពលគ្នាទៅវិញទៅមក ។
លោកត្រាំដែលចាប់តាំងពីវិលចូលសេតវិមានវិញមក បានខិតខំប្រឹងប្រែងធ្វើអាជ្ញាកណ្ដាល ដើម្បីបញ្ចប់សង្គ្រាមនៅអ៊ុយក្រែននោះអះអាងថា ក្រុងគៀវបានយល់ព្រមលែងវាយប្រហារ បណ្ដាហេដ្ឋារចនាសម្ព័ន្ធថាមពលរុស្ស៊ី និងថា ក្រុងមូស្គូក៏យល់ព្រមលែងវាយប្រហារបណ្ដាគោលដៅថាមពលអ៊ុយក្រែនដែរ ។
ក្នុងសង្កថាប្រចាំថ្ងៃផ្សាយតាមបណ្ដាញសង្គមលោកហ្សេឡេនស្គីថ្លែងថា ប្រសិនបើដៃគូអាមេរិករបស់យើង ទទួលបានការយល់ព្រមពីឆន្ទៈពិតប្រាកដរបស់រុស្ស៊ីបញ្ចប់សង្គ្រាម ដែលបណ្ដាលឲ្យមនុស្សស្លាប់យ៉ាងច្រើន នោះអ៊ុយក្រែនក៏នឹងចាត់បណ្ដាវិធានការបន្ថយជម្លោះដែរ ។ លោកបន្តទៀតថា សហរដ្ឋអាមេរិកបានបង្ហាញសំណើម៉ឺងម៉ាត់ ទាក់ទិននឹងការបញ្ឈប់ទៅវិញទៅមក ការវាយប្រហារប្រឆាំងបណ្ដាហេដ្ឋារចនាសម្ព័ន្ធសំខាន់ៗ ដែលនោះអាចជាដំណាក់កាលដំបូង ឆ្ពោះទៅកាត់បន្ថយជម្លោះ នោះអ៊ុយក្រែនក៏ត្រៀមធ្វើដូចគ្នានេះដែរ ។ វិមានក្រឹមឡាំងនៅមិនទាន់មានប្រតិកម្មក្នុងពេលភ្លាមៗ ពីការអះអាងទាំងនោះនៅឡើយ។
រុស្ស៊ី និងអ៊ុយក្រែនចាប់តាំងពីច្រើនខែមកហើយ បានបង្កើនការវាយប្រហារគ្នាក្នុងចម្ងាយឆ្ងាយ សំដៅលើទីតាំងស៊ីវិលកាន់តែច្រើនដូចជារោងចក្រ បណ្ដាឃ្លាំងស្ដុកទំនិញ បណ្ដាហេដ្ឋារចនាសម្ព័ន្ធថាមពល កំពង់ផែ និងនាវានៅសមុទ្រខ្មៅ ។ ការវាយប្រហារទាំងនេះ បណ្ដាលឲ្យជនស៊ីវិលស្លាប់កាន់តែច្រើន និងបណ្ដាលឲ្យមានវិបត្តិប្រេងនិងប៉ះពាល់ខ្លាំងដល់ក្រុមហ៊ុនផ្គត់ផ្គង់ធំៗរបស់រុស្ស៊ី ។ នៅអ៊ុយក្រែនវិញ ការវាយប្រហារនានារបស់រុស្ស៊ី បណ្ដាលឲ្យជាប់គាំងដល់ការនាំចេញផលិតផលកសិកម្ម ហើយប៉ះពាល់ធ្ងន់ធ្ងរដល់ឧស្សាហកម្មស្លដែក និងការផ្គត់ផ្គង់ទំនិញ។
ការវាយប្រហាររបស់រុស្ស៊ី ក៏បង្កើនផងដែរ ប្រឆាំងបណ្ដាញផ្លូវដែកអ៊ុយក្រែន ដោយរថភ្លើងអ៊ុនក្រែនមួយរងការវាយប្រហារ នៅកន្លែងមួយស្ថិតនៅចម្ងាយត្រឹម២គីឡូម៉ែត្រ ពីព្រំដែនប៉ូឡូញសមាជិកអូតង់ ។ ម្យ៉ាងទៀត ពេលកំពុងមានភាពតានតឹងខ្លាំង រវាងអូតង់ និងរុស្ស៊ីលើសង្គ្រាមនៅអ៊ុយក្រែន កងយន្តហោះប្រដេញអូតង់ បានបាញ់ទម្លាក់ដ្រូនមួយគ្រឿងដែលហោះរំលោភបំពានដែនអាកាសលីទុយអានីសមាជិកអូតង់ ៕
ចែករំលែកព័តមាននេះ