ខេត្តប៉ៃលិន ៖ រមណីយដ្ឋានថ្មីមួយនៅលើទឹកដីក្រុងប៉ៃលិន ខេត្តប៉ៃលិន មានឈ្មោះថា «រមណីយដ្ឋានម៉េម៉ូរីយ៉ាផាឡេស» សម្បូរទៅដោយធម្មជាតិស្រស់បំព្រង រួមជាមួយអាងហែលទឹកពណ៌ខៀវស្រងាត់ ស្ថិតនៅក្បែរព្រៃភ្នំក្រំថ្មគួរឱ្យចង់ទៅកម្សាន្ត ។ រមណីយដ្ឋានម៉េម៉ូរីយ៉ាផាឡេស ស្ថិតក្នុងភូមិបយ៉ាខា សង្កាត់បយ៉ាខា ក្រុងប៉ៃលិន ខេត្តប៉ៃលិន ។
រមណីយដ្ឋានមានច្រើននៅខេត្តប៉ៃលិន ក្នុងនោះមានរមណីយដ្ឋានទឹកធ្លាក់ភ្នំខៀវ រមណីយដ្ឋានអាងជីងចក់ និងរមណីយដ្ឋានទឹកធ្លាក់៣២ជាន់ជាដើម ។ ចំពោះរមណីយដ្ឋានដែលទើបបង្កើតថ្មី គឺរមណីយដ្ឋានម៉េម៉ូរីយា៉ផាឡេសអ្នកទេសចរដែលទៅកម្សាន្ត តែងតែសរសើរចំពោះធម្មជាតិដ៏ល្អប្រណីតគាប់ភ្នែក គាប់ចិត្ត ។
លោកលឺ ធារ៉ា អាយុ២៩ឆ្នាំ ជាមេការប្រចាំរមណីយដ្ឋានម៉េម៉ូរីយ៉ាប្រាប់ឱ្យដឹងកាលពីពេល ថ្មីៗនេះថា រមណីយដ្ឋានេះជារបស់អ្នកស្រីប្រិម សុជី អាយុ៣៦ឆ្នាំ មានលំនៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ម៉េម៉ូរីយ៉ា ស្ថិតនៅចម្ងាយពីភ្នំខៀវប្រហែល៥ទៅ៦គីឡូម៉ែត្រ កសាងឡើងនៅថ្ងៃទី១១ ខែវិច្ឆិកា ឆ្នាំ២០១០ លើផ្ទៃដីទំហំ១៣ហិកតា ។
តាំងពីចាប់ផ្តើមបង្កើត រហូតមកដល់បច្ចុប្បន្ននេះ លោកលី ធារ៉ា ប្រាប់ថាមានអ្នកទេសចរជាតិ និងអន្តរជាតិច្រើនទៅកម្សាន្ត ជាពិសេសសម្បូរអ្នកទេសចរនៅថ្ងៃបុណ្យទាន ដូចជា ថ្ងៃបុណ្យចូលឆ្នាំចិន ចូលឆ្នាំខ្មែរ និងថ្ងៃភ្ជុំបិណ្ឌជាដើម ។ នៅរមណីយដ្ឋាន មានភោជនីយដ្ឋានមួយ អាចទទួលភ្ញៀវបានចំនួន១០០នាក់ មានបន្ទប់ស្នាក់នៅចំនួន១៩បន្ទប់ មានបន្ទប់ប្រជុំទទួលបានជាង២០០នាក់ និងមានអាងហែលទឹកដ៏ធំមួយសម្រាប់ឱ្យភ្ញៀវហែលលេងកម្សាន្ត។ រមណីយដ្ឋានមានធ្វើម្ហូបគ្រប់មុខតាមតម្រូវការរបស់ភ្ញៀវ ដូចជាសម្លកកូរ សម្លម្ជូរ ឆា ស្ងោរ ចៀន និងញាំ ជាដើម រីឯម្ហូបអឺរ៉ុប ក៏មានច្រើនមុខដែរ ។
លោកឡុង ពុទ្ធជាតិ អាយុ៤០ឆ្នាំ ជាបុគ្គលិកបម្រើការនៅរមណីយដ្ឋានម៉េម៉ូរីយ៉ាផាឡេស ឱ្យដឹងថា បុគ្គលិកមានចំនួន១៩នាក់ ក្នុងនោះស្រីចំនួន៣ទៅ៤នាក់ និងមានមេការចំនួន៣នាក់ ។ រមណីយដ្ឋានមានកង់សម្រាប់ជួលឱ្យអ្នកទេសចរជិះលេងកម្សាន្តនៅជុំវិញរមណីយដ្ឋានផងដែរ ។
អាណិកជនខ្មែរនៅអាមេរិក ដែលនាំក្រុមគ្រួសារទៅលេងរមណីយដ្ឋានម៉េម៉ូរីយ៉ា ផាឡេស និយាយថា រមណីយដ្ឋាននេះស្ងប់ស្ងាត់ មានខ្យល់បរិសុទ្ធ ជាពិសេសឮសំឡេងសត្វបក្សីយំខ្ញៀវខ្ញារនៅលើដើមឈើធ្វើឱ្យពួកគាត់ស្ទើរតែមិនចង់ត្រឡប់ទៅរស់នៅបរទេសវិញឡើយ ។ ម្យ៉ាវិញទៀត នៅពេលហត់នឿយ ធុញថប់ក្នុងអារម្មណ៍ពួកគាត់នាំគ្នាទៅសម្រាកកម្សាន្តនៅទីនោះ ។ ចំណែកម្ហូបវិញគួរឱ្យចង់ហូប មានត្រីចៀន ញាំស្វាយត្រីឆ្អើរ ស្ងោរតុំយ៉ាំបង្គា ឬបង្កង ជាដើម ។
អាណិកជនខ្មែរទាំងនោះបានធ្វើពិធីរំលឹកខួបកំណើតអាពាហ៍ពិពាហ៍នៅរមណីយដ្ឋានមេម៉ូរីយ៉ាផាឡេសទៀតផង ៕
ចែករំលែកព័តមាននេះ