ខណៈកំពុងពិនិត្យព្រាងច្បាប់ស្តីពីបទល្មើសបច្ចេកវិទ្យាព័ត៌មាន ក្រសួងមហាផ្ទៃកម្ពុជា បានពិគ្រោះយោបល់ជាមួយស្ថានទូតសហរដ្ឋអាមេរិក ក្រសួងយុត្តិធម៌ សហរដ្ឋអាមេរិក និងក្រុមហ៊ុនបច្ចេកវិទ្យាធំៗរបស់សហរដ្ឋអាមេរិក ដើម្បីឲ្យសេចក្តីព្រាងច្បាប់នេះ មានសុក្រិតភាព និងស្របតាមការវិវឌ្ឍរបស់សង្គមជាតិ ។
ជាក់ស្តែងការកិច្ចពិគ្រោះយោបល់មួយបានធ្វើតាមប្រព័ន្ធវីដេអូនៅរសៀលថ្ងៃទី១៥ មិថុនានេះដែលតំណាងក្រសួងមហាផ្ទៃដឹកនាំដោយលោក ប៊ុន ហុន រដ្ឋលេខាធិការក្រសួងមហាផ្ទៃ និងជាអ្នកទទួលបន្ទុកក្រុមប្រឹក្សានីតិកម្មរបស់ក្រសួង ចំណែកភាគីសហរដ្ឋអាមេរិក មានទាំងតំណាងស្ថានទូត តំណាងក្រសួងយុត្តិធម៌ និងក្រុមហ៊ុនបច្ចេកវិទ្យា ។
កម្ពុជាមានឆន្ទៈក្នុងការរប្រយុទ្ធប្រឆាំងបទល្មើសបច្ចេកវិទ្យា ទោះបីជាបទល្មើសនេះប្រព្រឹត្តតាមទម្រង់ណាក៏ដោយ ហេតុដូចនេះហើយទើបកម្ពុជាព្យាយាមធ្វើការរៀបចំច្បាប់នេះឡើង ។
លោក ប៊ុន ហុន បានបញ្ជាក់ថា«ពាក់ព័ន្ធទៅនឹងបទល្មើសបច្ចេកវិទ្យានេះ កម្ពុជានៅមានកម្រិតនៅឡើយ ដូច្នេះហើយនៅក្នុងការរៀបចំសេចក្តីព្រាងច្បាប់នេះចង់បាននូវមតិយោបល់ពីអ្នកជំនាញអន្តរជាតិ ដើម្បីធ្វើឱ្យសេចក្តីព្រាងច្បាប់នេះមានសុក្រឹតភាព និងបទដ្ឋានអន្តរជាតិព្រមទាំងស្របតាមការអភិវឌ្ឍនៃប្រទេសកម្ពុជា»។
អនុប្រធានបេសកកម្មនៃស្ថានទូតសហរដ្ឋអាមេរិកប្រចាំកម្ពុជាលោក Michael Nebill បានលើកឡើងថា សេចក្តីព្រាងច្បាប់ស្តីពីបទល្មើសបច្ចេវិទ្យាព័ត៌មានវិទ្យានេះ ពិតជាមានសារៈសំខាន់ដោយច្បាប់នេះ គឺបង្កើតឡើងក្នុងន័យ ដើម្បីរក្សាតុល្យភាពធ្វើយ៉ាងណារក្សាការពារកុំឱ្យមានបទល្មើសបច្ចេកវិទ្យា និងដើម្បីការពារសិទ្ធិរក្សាបាននូវបទដ្ឋានជាលក្ខណៈអន្តរជាតិ ដើម្បីធានាថា ក្រុមហ៊ុនបច្ចេកវិទ្យាអន្តរជាតិអាចអនុលោមបាន ហើយអាចវិនិយោគនៅក្នុងប្រទេសកម្ពុជាបាន ។
លោកបានបញ្ជាក់ថា សហរដ្ឋអាមេរិកនឹងចាំត្រៀមផ្តល់នូវធនធានជំនួយបច្ចកទេសសម្រាប់ការរៀបចំនូវសេចក្តីព្រាងច្បាប់ពីបទល្មើសបច្ចេវិទ្យាព័ត៌មាននេះ ជាបន្តបន្ទាប់ទៀត ។
សេចក្តីព្រាងច្បាប់ស្តីពីបទល្មើសបច្ចេកវិទ្យាព័ត៌មាន បានធ្វើឡើងតាំងពីឆ្នាំ២០១៦ ក្រសួងយុត្តិធម៌សហរដ្ឋអាមេរិក តែងតែពិភាក្សាពិគ្រោះយោបល់ជាមួយកម្ពុជាជាបន្តបន្ទាប់ ។
លោក ប៊ុន ហុន បានបញ្ជាក់ថា សេចក្តីព្រាងច្បាប់នេះស្ថិតក្នុងដំណាក់កាលព្រាងនៅឡើយ និងពុំទាន់បានឆ្លង និងពិគ្រោះយោបល់ជាមួយរាជរដ្ឋាភិបាលនៅឡើយទេ ៕
ចែករំលែកព័តមាននេះ