ខេត្តកំពង់ស្ពឺ ៖ ទីតាំងលួចផលិតបារីក្លែងក្លាយរបស់ជនជាតិចិន នៅស្រុកភ្នំស្រួច មួយកន្លែងត្រូវបានគណៈកម្មការចម្រុះធ្វើការបង្ក្រាប និងដកហូតបារីជាង១០០០ប៊ិច ព្រមទាំងម៉ាស៊ីនផលិត២គ្រឿង និងកសាងឯកសារបញ្ជូនទៅកាន់អយ្យការអមសាលាដំបូងខេត្តចាត់ការបន្តតាមនីតិវិធី។
លោក សរ សុពុត្រា អភិបាលរងខេត្តកំពង់ស្ពឺ បានប្រាប់ថា ក្នុងនាមតំណាងអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ស្ពឺ បានដឹកនាំកម្លាំងចម្រុះនៃគណៈបញ្ជាការឯកភាពរដ្ឋបាលខេត្ត សហការជាមួយគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រសួងមហាផ្ទៃ ដែលដឹកនាំដោយលោកឧត្តមសេនីយ៍ទោ ជ័យ រិទ្ធី អនុប្រធានលេខាធិការដ្ឋាន ក្រោមការសម្របសម្រួលនីតិវិធីដោយអយ្យការអមសាលាដំបូងខេត្ត ។
លោកអភិបាលរងបានបញ្ជាក់ប្រាប់នាព្រឹកថ្ងៃទី១២ ខែមិថុនា ឆ្នាំ២០២០ នេះថា កាលពីរសៀលថ្ងៃទី១១ មិថុនា សមត្ថកិច្ចជំនាញបានចុះបង្ក្រាបទីតាំងលួចផលិតបារីក្លែងក្លាយរបស់ជនជាតិចិន នៅស្រុកភ្នំស្រួច ដកហូតបារីជាង១,០០០ប៊ិច និងម៉ាស៊ីនផលិត២គ្រឿង។
លោកបានបន្តថា ករណីបង្ក្រាបទីតាំងផលិតបារីក្លែងក្លាយរបស់ជនជាតិចិន (ជួលទីតាំងពីខ្មែរ) ក្នុងស្រុកភ្នំស្រួច លុះមកទល់ពេលនេះកម្លាំងជំនាញសហការជាមួយអយ្យការ អមសាលាដំបូងខេត្ត និងគណៈកម្មាធិការកំពុងតែស្រាវជ្រាវ និងសាកសួរយ៉ាងល្អិតល្អន់ ហើយនឹងចេញលទ្ធផលក្នុងពេលឆាប់ៗខាងមុខ។
សូមបញ្ជាក់ថា សមត្ថកិច្ចបានចុះឆែកឆេរទីតាំងផលិតបារីក្លែងក្លាយ មួយកន្លែង ស្ថិតក្នុងភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺ។
បច្ចុប្បន្នសមត្ថកិច្ចជំនាញ បានកសាងសំណុំរឿងបញ្ជូនទៅសាលាដំបូងខេត្ត ដើម្បីអនុវត្តទៅតាមនីតិវិធីច្បាប់។ ហើយក្នុងការបង្ក្រាបនេះដែរ ជនជាតិចិនចំនួន៧នាក់ ត្រូវបានសមត្ថកិច្ចធ្វើការសាកសួរ ដោយពុំមានឃាត់ខ្លួននោះទេ។
សូមរំលឹកថា នេះជាលើកទី២ហើយ ដែលសមត្ថកិច្ចមកពីក្រសួង ធ្វើការបង្ក្រាបកន្លែងផលិតបារីរបស់ជនជាតិចិននេះ ដែលលើកទី១ បង្ក្រាបនៅស្រុកថ្ពង ដោយលាក់លៀមព័ត៌មានបំផុត ដែលអ្នកកំពង់ស្ពឺនិយាយថា ចងមុងស៊ី… ។
តើលទ្ធផលបង្ក្រាបនៅស្រុកថ្ពងយ៉ាងណាហើយ? អ្នកខ្លះថា កាលណាគេមិនប្រាប់អ្នកកាសែត គឺគេមិនយកស្នាដៃទេ… គេនាំគ្នាលាក់…. អ្នកកាសែតត្រូវដេញមិនឱ្យថត ។
សូមជួយប្រាប់កោះសន្តិភាពផង កុំឱ្យមហាជននៅតែចង់ដឹង តើការបង្ក្រាបនៅស្រុកថ្ពង បាន…ប៉ុន្មាន?
ចែករំលែកព័តមាននេះ