ឆ្នាំ ២០២០ មិនមែនជាឆ្នាំដែលល្អសម្រាប់ការបញ្ចប់ការសិក្សាទេ ព្រោះវាពោរពេញទៅដោយភាពមិនប្រាកដប្រជា ខណៈដែលសេដ្ឋកិច្ចកំពុងជួបប្រទះនឹងវិបត្តិផងដែរ ។ ក្នុងកំឡុងពេលនេះនិស្សិតដែលបានបញ្ចប់ការសិក្សាក៏មានការលំបាកក្នុងការរៀបចំគម្រោងការសម្រាប់ថ្ងៃអនាគតផងដែរ ។
យោងតាម Forbes ខាងក្រោមនេះ គឺជាដំបូន្មានមួយចំនួនសម្រាប់និស្សិតដែលបញ្ចប់ការសិក្សាក្នុងឆ្នាំនេះដើម្បីធានាថា ដំណើរទៅរកភាពជោគជ័យមិនមានការអាក់ខាន ។
១. សន្សំជាមុនសិន
ប្រសិនបើអ្នករកបានការងារដំបូងបន្ទាប់ពីបានបញ្ចប់ការសិក្សាហើយនោះ អ្នកត្រូវទុកប្រាក់ចំណូលក្នុងគណនីសន្សំឲ្យបានច្បាស់លាស់មុនពេលអ្នកធ្វើការចាយវាយផ្សេងៗ ។ ការផ្ទុះជំងឺកូវីដ ១៩ បានផ្តល់មេរៀនសំខាន់មួយដល់មនុស្សគ្រប់រូបជុំវិញពិភពលោកពីសារៈសំខាន់នៃការមានប្រាក់បម្រុងទុកពេលមានអាសន្ន ដូច្នេះអ្នកមិនត្រូវមើលរំលងមេរៀននេះឡើយ ។
២. រស់នៅតាមសមត្ថភាព
សម្រាប់អ្នកដែលទទួលបានប្រាក់ខែដំបូង វាពិតជាងាយស្រួលណាស់ក្នុងការចាយវាយភ្លេចខ្លួន និងចាប់ផ្តើមរស់នៅជីវភាពដែលខ្ពស់ជាងសមត្ថភាពរបស់ខ្លួន ។ ប្រសិនបើអ្នកមិនចង់ចាប់ផ្តើមទម្លាប់មិនល្អនេះទេ អ្នកគួរតែព្យាយាមរស់នៅតាមជីវភាពជានិស្សិតដដែរដូចជាជៀសវាងការប្តូររថយន្ត ទិញសម្លៀកបំពាក់ថ្មីៗលើសតម្រូវការ និងចៀសវាងការចេញទៅទទួលទានអាហារក្រៅច្រើនដងពេកជាដើម ។
៣. បន្តរៀនសូត្រជានិច្ច
គ្រប់ការងារទាំងអស់តែងតែផ្តល់ឱកាសឲ្យអ្នករៀនជំនាញសំខាន់ៗដែលបង្កើនតម្លៃខ្លួនរបស់អ្នក ។ អ្នកមិនគួរធ្វើការងារព្រោះតែលុយទេ តែជ្រើសរើសការងារដែលអាចបង្រៀនអ្នកនូវអ្វីដែលអ្នកចង់រៀនសូត្រ ។ ជាមួយគ្នានេះផងដែរ អ្នកត្រូវបើកចិត្តឲ្យទូលាយក្នុងការរៀនអ្វីថ្មីៗ ។
ទីផ្សារការងារបច្ចុប្បន្នអាចនឹងមានការផ្លាស់ប្តូរព្រោះតែជំងឺកូវីដ ១៩ ដូច្នេះអ្នកត្រូវត្រៀមខ្លួនទទួលយកការងារដែលអាចនឹងខុសពីអ្វីដែលអ្នករំពឹងទុក ។ ជាក់ស្តែង មនុស្សវ័យក្មេងបច្ចុប្បន្ននេះប្រហែលជាមិនចាប់អារម្មណ៍ក្នុងការធ្វើការក្នុងក្រុមហ៊ុនរហូតមានតំណែងខ្ពស់ខ្ពស់ទេ ហើយអ្នកក៏អាចជ្រើសរើសផ្លូវផ្សេងបានដែរដូចជាចាប់ផ្តើមអាជីវកម្មដោយខ្លួនឯង ឬធ្វើការឲ្យអង្គការមិនគិតប្រាក់ចំណូលជាដើម ៕
ចែករំលែកព័តមាននេះ