ខេត្តព្រះវិហារ ៖ ពស់វែករនាមប្រវែងជាង៣ម៉ែត្របានចឹកស្លាប់បុរសម្នាក់ដែលចូលព្រៃហើយព្យាយាមចាប់ ។ ហេតុការណ៍នេះបានកើតឡើងនៅភូមិសាស្ត្រភូមិសំឡាញ់ ឃុំត្បែងមួយ ស្រុកសង្គមថ្មី ខេត្តព្រះ វិហារ កាលពីរសៀលម៉ោង៥ល្ងាចថ្ងៃទី៨ ខែមិថុនា ឆ្នាំ២០២០ ។ នេះបើតាមការប្រាប់ឱ្យដឹងពីលោកវរ សេនីយ៍ទោ ជួន មឿន អធិការនគរបាលស្រុកសង្គមថ្មី ។
តាមប្រភពព័ត៌មានថា បុរសរងគ្រោះឈ្មោះ យាម តាក់ អាយុ៣៧ឆ្នាំ ជាកសិករ រស់នៅភូមិសំឡាញ ឃុំត្បែងមួយ ស្រុកសង្គមថ្មី ខេត្តព្រះវិហារ ។ មូលហេតុដែលបណ្តាលឱ្យបុរសរងគ្រោះខាងលើស្លាប់នោះគឺដោយសារតែបុរសនោះ ប្រទះឃើញពស់វែករនាមធំមួយក្បាល ខណៈជនរងគ្រោះកំពុងដើរក្នុងព្រៃ ក៏ស្ទុះទៅចាប់ តែអកុសលត្រូវពស់វែកដែលមានពិសដ៏សាហាវនេះបកមកចឹកវិញចំកំភួនដៃឆ្វេង។ ភ្លាមៗនោះបុរសរងគ្រោះបានវាយពស់នោះងាប់ ហើយក៏យកពស់វែករនាមនេះចេញពីព្រៃ ត្រឡប់មកផ្ទះដើម្បីឱ្យគេជួយសង្គ្រោះ តែដោយសារតែពិសដ៏សាហាវរបស់ពស់វែករនាមនេះបានជ្រាបពេញខ្លួនក៏បានធ្វើឱ្យបុរសរងគ្រោះដួលដាច់ខ្យល់ស្លាប់ពាក់កណ្តាលផ្លូវបន្សល់ទុកពស់ដែលវាយងាប់នោះកាន់ជាប់នឹងដៃ ។
នេះមិនមែនជាលើកដំបូងទេដែលពស់វែករនាមបានវាយប្រហារមនុស្ស ។ តាមកត់សម្គាល់ជិត១ឆ្នាំមុន គឺថ្ងៃទី២៥ មិថុនា ២០១៩ បុរសវ័យចំណាស់មានជំនាញចាប់ពស់ម្នាក់ បានភ្លាត់ស្នៀតត្រូវពស់វែករនាមដ៏ធំ១ក្បាល ចឹកចំដៃពិសជ្រាបចូលក្នុងខ្លួនឈឺចុកចាប់រត់ទៅរកពេទ្យឱ្យជួយ តែអកុសល ស្លាប់ចោលប្រពន្ធកូនយ៉ាងអាណោចអាធ័មនៅចំណុចចម្ការរបស់ខ្លួន ស្ថិតនៅចំណុចភូមិសៀមបូក ឃុំសៀមបូក ស្រុកសៀមបូក ។
ជនរងគ្រោះរូបនោះឈ្មោះ សុខ ស៊ីន អាយុ៦៦ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ ។ តាមក្រុមគ្រួសារជនរងគ្រោះ បានឲ្យដឹងថា នៅមុនពេលកើតហេតុ ជនរងគ្រោះបានចេញទៅដើររកសត្វនៅក្នុងចម្ការបស់ខ្លួនដូចសព្វដង ដោយមានបណ្តើរឆ្កែមួយក្បាលទៅជាមួយផង ។ លុះពេលទៅដល់ក្នុងចម្ការ ក៏ឮសំឡេងឆ្កែព្រូសរន្ថើន ហើយពេលជនរងគ្រោះដើរទៅមើលក៏ប្រទះឃើញពស់វែករនាម១ក្បាល កំពុងតែបើកវែកប្រយុទ្ធតទល់ជាមួយឆ្កែ ។
ឃើញដូច្នេះក៏ស្ទុះទៅចាប់ពស់ ដោយមិនខ្លាចញញើតអ្វីសោះ ព្រោះតែកន្លងមកគាត់ធ្លាប់ចាប់ពស់មានពិសបានជាច្រើនក្បាលមកហើយ តែលើកនេះជាអកុសល ពេលចាប់ពស់វែករនាមនោះបានហើយ តែទំនងជាជនរងគ្រោះភ្លាត់ស្នៀត ស្រាប់តែត្រូវពស់បកក្បាលមកចឹកចំដៃ ធ្វើឱ្យឈឺចុកចាប់យ៉ាងខ្លាំង ។ ភ្លាមៗក៏ប្រញាប់ដើរទៅរកកូនចៅនៅផ្ទះឱ្យជួយដឹកទៅមណ្ឌលសុខភាពកោះព្រះ ដើម្បីឱ្យក្រុមគ្រូពេទ្យជំនាញជួយសង្គ្រោះ ប៉ុន្តែពេលបញ្ជូនទៅដល់គ្រូពេទ្យពិនិត្យរួច ក៏ប្រាប់ថា ពិសពស់បានជ្រាបពេញខ្លួនជនរងគ្រោះទៅហើយ មិនអាចជួយសង្គ្រោះបានទេ ទីបំផុតក៏ស្លាប់ ។
ពស់វែករនាមរស់នៅតែក្នុងព្រៃ វាលស្រែ និងទំនាបដែលមានច្រើនជាងគេនៅប្រទេស ឥណ្ឌា និងតំបន់អាស៊ីអាគ្នេយ៍ ។ សត្វអសិរ្ពិសជាប្រភេទពស់ដ៏មានគ្រោះថ្នាក់ ហើយអាចមានប្រវែងរហូតដល់៥ម៉ែត្រឯណោះ ។ នៅពេលវាគិតថាមានគ្រោះថ្នាក់ វាតែងងើបក្បាលអើតឡើងខ្ពស់ផុតពីដីរហូតដល់១,៥ម៉ែត្រ រួចដំឡើងស្បែកឱ្យរីកធំ (គេថាពស់ដកពពារ ឬបើកវែក ) ។ ចាស់បុរាណបាននិយាយពីអនុភាពពិសរបស់ប្រភេទពស់វែកថា ពស់វែកដំបូក១ស្រែ ពស់វែកស្រងែ១ព្យាម ពស់វែករនាមបុាំងស្ដូក ៕
ចែករំលែកព័តមាននេះ