ខេត្តព្រះវិហារ ៖ រូបសំណាកលោកតាឌីជិះលើសេះតំណាងឱ្យភាពក្លាហានហ៊ានពលីជីវិតដើម្បីប្រទេសជាតិមាតុភូមិជាទីស្រលាញ់ត្រូវលោកអ៊ុំ ម៉ារ៉ា អភិបាលខេត្តព្រះវិហារ និងភរិយា រួមទាំងមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ កសាងឡើង ដើម្បីរំឭកនឹកគុណ និងរំឭកគំរូវីរភាពរបស់គាត់ ។
ខេត្តព្រះវិហារ ៖ រូបសំណាកលោកតាឌីជិះលើសេះតំណាងឱ្យភាពក្លាហានហ៊ានពលីជីវិតដើម្បីប្រទេសជាតិមាតុភូមិជាទីស្រលាញ់ត្រូវលោកអ៊ុំ ម៉ារ៉ា អភិបាលខេត្តព្រះវិហារ និងភរិយា រួមទាំងមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ កសាងឡើង ដើម្បីរំឭកនឹកគុណ និងរំឭកគំរូវីរភាពរបស់គាត់ ។ រូបសំណាកលោកតាឌីជិះលើខ្នងសេះមានចងកន្សែងក្រហម នៅក្បាល ក្រវាត់កន្សែងពាក់ឆៀង ស្ពាយធ្នូនៅខាងឆ្វេង និងក្រវាត់ដាវ ចំណែកដៃស្តាំចង្អុលទៅមុខយ៉ាងអង់អាចក្នុងលក្ខណៈបញ្ជាពលទ័ពប្រយុទ្ធនឹងសត្រូវបរទេសឈ្លានពាន ។ នៅមុខរូបសំណាកមានសួនផ្កាស្រស់បំព្រង និងមានបង់សម្រាប់អង្គុយលេងអមដោយបង្គោលភ្លើងបំភ្លឺជុំវិញ ។
រូបសំណាកលោកតាឌីកសាងឡើង ត្រង់ផ្លូវប្រសព្វបំបែកជាពីរ ស្ថិតនៅភូមិហ្មសែត សង្កាត់ប៉ាហាល ក្រុងព្រះវិហារ ក្រោមការឧបត្ថម្ភលើការសាងសង់ពីលោក អ៊ុំ ម៉ារ៉ា អភិបាល និងលោកស្រី ។ រូបសំណាកនេះកសាងឡើងនៅថ្ងៃព្រហស្បតិ៍ ១២រោច ខែពិសាខ ពុទ្ធស័ករាជ ២៥៥៦ ត្រូវនឹងថ្ងៃទី១៧ ខែឧសភា ឆ្នាំ២០១២ ក្នុងបំណងឧទិ្ទសបុណ្យកុសលដល់កងកម្លាំងប្រដាប់អាវុធ វីរជន អ្នកស្នេហាជាតិគ្រប់ជំនាន់ដែលបានពលីជីវិតក្នុងអំឡុងសង្គ្រាមការពារទឹកដីខ្មែរយើងឱ្យរួចផុតពីការឈ្លានពានពីសត្រូវបរទេស ព្រមទាំងចំពោះពលិកម្មថ្មីនៅតំបន់ប្រាសាទព្រះវិហារ ដែលជាសម្បត្តិបេតិភណ្ឌរបស់មនុស្សជាតិ ។ ជាពិសេសរូបសំណាកលោកតាឌីកសាងទុកសម្រាប់ឱ្យប្រជាពលរដ្ឋ សិស្សានុសិស្សចងចាំពីគំរូវីរភាពដ៏អង់អាចរបស់លោកតាឌី ។ ម្យ៉ាងវិញទៀតរូបសំណាកនេះក៏ជាទីសក្ការៈដ៏ស័ក្តិសិទិ្ធដែលប្រជាពលរដ្ឋនៅក្នុងខេត្តព្រះវិហារទាំងមូល ទៅបន់ស្រន់សុំសេចក្តីសុខផងដែរ ។
អ្នកស្រីឡាង ភារា ឱ្យដឹងកាលពីពេល ថ្មីៗនេះថា គាត់ និងក្រុមគ្រួសារតែងតែនាំគ្នាទៅអុជធូបបន់ស្រន់សុំសេចក្តីសុខពីលោកតាឌីជារឿយៗ ព្រោះមានជំនឿលើរូបសំណាកលោកតាឌី បន់ស្រន់សុំអ្វីបានដូចបំណង ។ ប្រជាពលរដ្ឋរស់នៅក្នុងខេត្តព្រះវិហារ ជឿលើរូបសំណាកលោកតាឌី ទោះបីគាត់ស្លាប់មែនពិត តែកេរ្តិ៍ឈ្មោះ និងកិតិ្តយសលោកស្ថិតនៅក្នុងដួងចិត្តប្រជាពលរដ្ឋកម្ពុជាជានិច្ច និងបួងសួងឱ្យព្រលឹងរបស់លោកជួយថែរក្សាទឹកដីកម្ពុជា កុំឱ្យសត្រូវបរទេសឈ្លានពានបាន ។
យុវជនឈ្មោះសុខ តុលា រៀននៅវិទ្យាល័យភ្នំត្បែង ឱ្យដឹងថា ចាប់តាំងពីលោកអ៊ុំ ម៉ារ៉ា អភិបាលខេត្តព្រះវិហារ កសាងរូបសំណាកលោកតាឌីមក ឱ្យតែដល់ថ្ងៃប្រឡងសិស្សតែងតែបន់ស្រន់សុំឱ្យបានប្រឡងជាប់ ។ ជារៀងរាល់ពេលល្ងាចមនុស្សប្រុសស្រីយ៉ាងច្រើននាំគ្នាទៅអុជធូបបន់ស្រន់សុំសេចក្តីសុខ អ្នកខ្លះបន់ស្រន់ឱ្យរកស៊ីមានបាន ឬសុំឱ្យមានកូន ។ មានអ្នកខ្លះនាំគ្នាដុសខាត់រូបសំណាកសេះ ដើម្បីសុំកន្ទុយលេខ ព្រោះតែពួកគេមានជំនឿទៅលើរូបសំណាកបារមីលោកតាឌីដ៏ល្បីស័កិ្តសិទ្ធិ ។
ពលរដ្ឋម្នាក់សុំមិនបញ្ចេញឈ្មោះនិយាយថា «សម័យលោកតាឌី សត្រូវបរទេសតែងតែខ្លាចញញើត ដោយលោកតាឌីមានឫទ្ធិអំណាចខ្លាំងយ៉ាងខ្លាំង ។ ដោយខ្លាចបាត់ទឹកដីលោកតាឌីបានលោតសម្លាប់ខ្លួននៅលើកំពូលភ្នំប្រាសាទព្រះវិហារ ធ្វើឱ្យកេរ្តិ៍ឈ្មោះដ៏ល្បីល្បាញរបស់គាត់ជាប់ជាឈ្មោះ «ពើយតាឌី» ដល់សព្វថ្ងៃ» ។ ស្តូបរូបសំណាកលោកតាឌីទាំងអ្នកទេសចរជាតិ និងអន្តរជាតិ ដែលធ្វើដំណើរឆ្លងកាត់តែងតែចូលអុជធូបបន់ស្រន់សុំសេចក្តីសុខសប្បាយ ។ រូបសំណាកលោកតាឌីក៏ជាកន្លែងប្រជាពលរដ្ឋអង្គុយលេងលំហែកាយផងដែរ ៕
ចែករំលែកព័តមាននេះ