រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បន្ទាប់ពីមានការការភ្ញាក់ផ្អើល បន្ទាប់ពីបុរសម្នាក់ប្រទះឃើញសត្វក្រពើចំនួនពី២ទៅ៤ក្បាលនៅក្នុងស្រះទឹកវត្តទួលសុភាឃួន ដែលគេសង្ស័យថា មានជនមិនស្គាល់យកទៅលែងចោលនោះ ហើយខណៈពេលកូនសិស្សលោក និងអ្នកភូមិនាំគ្នាស្ទូចយកក្រពើនោះចេញពីក្នុងស្រះបង្កឲ្យមានការភ្ញាក់ផ្អើលជិត២អាទិត្យតាំងពីអំឡុងថ្ងៃទី២៥ ខែឧសភាម្ល៉េះ នៅក្នុងវត្តទួលសុភាឃួន ស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ។
សេចក្តីរាយការណ៍បន្តថា ប៉ុន្តែកូនសិស្សលោក និងអ្នកភូមិបាននាំគ្នាស្ទូចចាប់ក្រពើនោះរយៈពេលជិត២សប្ដាហ៍កន្លងមកហើយ តែមិនបានសោះ លុះរហូតមកដល់ម៉ោងជាង៥ព្រឹកព្រលឹម ថ្ងៃទី៧ ខែមិថុនា ឆ្នាំ២០២០ ទើបស្ទូចបាន១ក្បាលតូចប៉ុណ្ណោះ នៅសល់ប្រហែល៣ក្បាលទៀត នៅមិនទាន់ស្ទូចបាននៅឡើយទេ។
អ្នកភូមិនិយាយថា តាំងពីរាប់សិបឆ្នាំកន្លងមកហើយ នៅក្នុងស្រះទឹកវត្តទួលសុភាឃួននេះពុំដែលមានសត្វក្រពើនោះទេ ទើបតែពេលនេះ ស្រាប់តែប្រទះឃើញគួរឲ្យភ្ញាក់ផ្អើលបែបនេះដែលសង្ស័យមានជនមិនស្គាល់មុខយកទៅលែងនៅពេលស្ងាត់ណាមួយ ប៉ុន្តែពុំដឹងថាជននោះមានគោលបំណងអ្វីមួយឡើយ ទើបបានជាយកសត្វក្រពើទៅលែងចោលនៅក្នុងស្រះទឹកក្នុងវត្តខាងលើ ជាហេតុបង្កឲ្យមានការភ័យខ្លាចដល់ព្រះសង្ឃ និងពុទ្ធបរិស័ទចំណុះជើងវត្តផងដែរ។
អ្នកភូមិនិយាយថា ពេលនេះក្រពើទាំងនោះនៅតូចៗមិនទាន់ធំនៅឡើយ ហើយពួកគាត់កំពុងមានការព្រួយបារម្ភថា បើចាប់មិនពេលនេះទេនៅពេលណាដែលក្រពើកាន់តែធំទៅៗនោះ និងបង្កគ្រោះដល់ជីវិតមនុស្សជាក់ជាមិនខានឡើយ ។
ប្រភពដដែលបន្តថា ក្រពើនោះខ្លះមានទំហំខ្លួនប៉ុនកំភួនដៃមនុស្សចាស់ និងខ្លះទៀតមានទំហំខ្លួនប៉ុនភ្លៅមនុស្សចាស់ ហើយតែងតែហែលទឹកបណ្ដែតខ្លួនឲ្យឃើញនៅលើស្លឹកឈូកជាញឹកញាប់នាពេលរសៀល ឬពេលល្ងាចជារៀងរាល់ថ្ងៃ ។ រយៈពេលជិត២សប្ដាហ៍កន្លងមកហើយ ហើយដែលពួកគាត់ឃើញជាក់ស្ដែង២ក្បាល តូច១ក្បាល និងធំ១ក្បាល ប៉ុន្តែក៏សង្ស័យថា មានរហូតដល់ទៅ៤ក្បាលឯណោះ ពុំមែនមានតែ២ក្បាលនេះឡើយ។
ប្រភពដដែលបន្តទៀតថា កូនក្រពើទាំងនោះត្រូវបុរសម្នាក់ឈ្មោះធី ដែលជាកូនសិស្សលោកប្រទះឃើញមុនគេ ខណៈគាត់កំពុងចងអង្រឹងដេកក្រោមដើមឈើនៅក្បែរមាត់ស្រះទឹកខាងលើ។ ដោយមុនដំបូងគាត់ឃើញក្រពើតូចមុន ហើយភ្លាមៗនោះក៏មិនបានចាប់អារម្មណ៍ថា ជាក្រពើដែរ ដោយស្មានថាជាសត្វត្រកួតទេ ប៉ុន្តែក្រោយពីពិនិត្យមើលច្បាស់និងឃើញអាធំ១ក្បាលទៀតបណ្ដែតបង្ហាញខ្លួនជិតនោះដែរ ទើបស្គាល់ច្បាស់ថា ជាសត្វក្រពើ រួចបុរសនេះក៏ទូលប្រាប់ព្រះសង្ឃ និងអ្នកនៅក្នុងវត្ត ទើបបង្កឲ្យមានការភ្ញាក់ផ្អើលកើតឡើងតែម្ដង។
ប្រភពខាងលើបន្ថែមទៀតថា ក្រោយពីប្រទះឃើញមានសត្វក្រពើនៅក្នុងស្រះទឹកដែលរាប់សិបឆ្នាំកន្លងមកហើយ មិនដែលធ្លាប់ឃើញបែបនេះ កូនសិស្សលោក និងអ្នកភូមិ៥ទៅ៦នាក់បាននាំគ្នាស្ទូចក្នុងបំណងយកសត្វក្រពើនោះចេញទៅដាក់នៅកន្លែងផ្សេង ដោយទិញមាន់ពីផ្សារមកធ្វើជានុយ ។ ប៉ុន្តែស្ទូចរយៈពេលជិត២អាទិត្យកន្លងមកហើយ រហូតមកដល់ល្ងាចថ្ងៃទី៦ ខែមិថុនា នៅមិនទាន់បាន១ក្បាលនៅឡើយទេ ដោយនៅខណៈនោះក្រពើបានស៊ីនុយដែរ ប៉ុន្តវ័ធអត់បាន ព្រោះដាច់ខ្សែរហូត ហើយក្រពើ១ក្បាលធំបានស៊ីនុយដោយទាំងផ្លែសន្ទូចអស់៤ទៅ៥ផ្លែទៅហើយដែរ។
ទោះជាបែបណាកូនសិស្សលោករួមនឹងអ្នកភូមិនៅតែព្យាយាមស្ទូចបន្តទៀតដដែល ហើយក្រោយមកបានដាក់នុយ និងសន្ទូចត្រាំចោលក្នុងទឹកចោល១យប់ លុះដល់ម៉ោងជាង៥ព្រឹកថ្ងៃទី៧ ខែមិថុនានេះ ពេលទៅមើល ស្រាប់តែឃើញជាប់ក្រពើតូច១ក្បាល។
ប្រភពមួយនេះបញ្ជាក់ថា ក្រោយពេលចាប់បានភ្លាម ព្រះសង្ឃបានយកចេញពីវត្តភ្លាមៗដើម្បីរកកន្លែងដោះយកផ្លែសន្ទូចចេញ និងយកវាទៅលែង ប៉ុន្តែពួកគាត់មិនបានដឹងថា ព្រះសង្ឃយកទៅលែងនៅកន្លែងណាឡើយ ចំណែកកូនសិស្សលោក និងអ្នកភូមិកំពុងបន្តស្ទូចចាប់ក្រពើដែលនៅសល់បន្តទៀត ដើម្បីចាប់យកវាចេញឲ្យអស់ពីក្នុងស្រះទឹកខាងលើ៕ (កែសម្រួលដោយ ៖ បុប្ផា)
ចែករំលែកព័តមាននេះ