រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃទី២ ខែមិថុនា ឆ្នាំ២០២០ បានលើកយកសំណុំរឿងរក្សាទុក ផលិត និងជួញដូរនូវសារធាតុញៀនដោយខុសច្បាប់នៅក្លិបកម្សាន្តម៉ៃអាមី មកបើកសវនាការ ដើម្បីផ្តន្ទាទោសលើជនជាប់ចោទ…
រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃទី២ ខែមិថុនា ឆ្នាំ២០២០ បានលើកយកសំណុំរឿងរក្សាទុក ផលិត និងជួញដូរនូវសារធាតុញៀនដោយខុសច្បាប់នៅក្លិបកម្សាន្តម៉ៃអាមី មកបើកសវនាការ ដើម្បីផ្តន្ទាទោសលើជនជាប់ចោទ ដែលបានជនសង្ស័យទាំងអស់ចំនួន៧នាក់ ។
ជនសង្ស័យស្ថិតនៅមុខរង្វង់ក្រចកសេះរួមមាន ១-ឈ្មោះ ស្រេង វីរៈ ហៅ លាក់ ភេទប្រុស អាយុ៤២ឆ្នាំ ជាមេការក្លឹប ២-ឈ្មោះ ស្រី កា ភេទស្រី អាយុ២២ឆ្នាំ ជាមេការ និងជាគណនេយ្យក្លឹប ៣-ឈ្មោះ ដាំ សារ៉ាត់ ភេទប្រុស អាយុ៣៥ឆ្នាំ ជាសន្តិសុខក្លឹប ៤-ឈ្មោះ សារ៉ូ សាដែន ភេទប្រុស អាយុ៣៣ឆ្នាំ ជាសន្តិសុខក្លឹប ៥-ឈ្មោះ មិន សំណាង ភេទប្រុស អាយុ២៨ឆ្នាំ ជាអ្នករត់តុក្លិប និងលក់ចែកចាយគ្រឿងញៀន ៦-ឈ្មោះ អុិន ស្រីពេជ្រ អាយុ២៣ឆ្នាំ ជាអ្នករត់តុ និងលក់ចែកចាយថ្នាំញៀន និង៧-ឈ្មោះ ប៊ុន រ័ត្ន ភេទប្រុស អាយុ២៧ឆ្នាំ ជាអ្នករៀបចំឆាកតន្ត្រីក្នុងក្លិប ។
សវនាការខាងលើនោះ មានលោក លិ សុខា ជាប្រធានក្រុមប្រឹក្សាជំនុំជម្រះ និងលោក សឿ ឡងឌី ព្រះរាជអាជ្ញារងតំណាងអយ្យការ ក្រោយបញ្ចប់ការសាកសួរដេញដោលប្រធានក្រុមប្រឹក្សា បានលើកពេលប្រកាសសាលក្រមផ្តន្ទាទោសលើជនជាប់ចោទទៅថ្ងៃទី១២ ខែមិថុនា ខាងមុខនេះ ។
អង្គហេតុក្នុងសំណុំរឿងនេះ កាលពីវេលាម៉ោង២ រំលងអាធ្រាតថ្ងៃទី១១ ខែមេសា ឆ្នាំ២០១៩ នៅចំណុចក្លិបកម្សាន្តម៉ៃអាម៊ី មានទីតាំងស្ថិតនៅផ្លូវលេខ៣៦០ សង្កាត់បឹងកេងកង១ ខណ្ឌចំការមន រាជធានីភ្នំពេញ ត្រូវបានកម្លាំងសមត្ថកិច្ចនគរបាលរាជធានីភ្នំពេញ ចុះបង្ក្រាបបទល្មើសពាក់ព័ន្ធគ្រឿងញៀននៅក្នុងក្លិបនោះ ដោយបានធ្វើការឃាត់ខ្លួនមនុស្សប្រុសស្រីចំនួន៥៨នាក់ ។ ក្នុងនោះមាន៣២នាក់ផ្ទុកនូវសារធាតុញៀនក្នុងខ្លួន និងរឹបអូសគ្រឿងញៀនជាច្រើនប្រភេទសរុបជាង១០គីឡូក្រាម និងសម្ភារៈផលិតគ្រឿងញៀនមួយចំនួនទៀត ។
ប៉ុន្តែក្នុងចំណោមមនុស្សប្រុស ស្រីទាំង៣២នាក់ ដែលផ្ទុកសារធាតុញៀនក្នុងខ្លួន មានតែមនុស្ស៧នាក់ប៉ុណ្ណោះ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដែលពេលនោះត្រូវបានចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ។
នៅថ្ងៃទី១៦ ខែមេសា ឆ្នាំ២០១៩ តំណាងអយ្យការបានចោទប្រកាន់ឈ្មោះ ស្រេង វីរៈ ដែលជាម្ចាស់ក្លឹប និងមេការ២នាក់ពីបទ.ផលិត ជួញដូរ រក្សាទុក ចាត់ចែងសម្រួលឱ្យប្រើប្រាស់ដោយខុសច្បាប់នូវសារធាតុញៀន ។
ចំណែកគូកន៤នាក់ទៀត ត្រូវចោទប្រកាន់ពីបទ សមគំនិតក្នុងអំពើជួញដូរ រក្សាទុក ចាត់ចែងប្រើប្រាស់ និងសម្រួលឱ្យប្រើប្រាស់នូវសារធាតុញៀន ដោយខុសច្បាប់ ។ នៅក្នុងសវនាការជនត្រូវចោទ៥នាក់ (លើកលែងតែឈ្មោះ ស្រេង វីរៈ និង ស្រី កា)បានបដិសេធថា ពួកគេមិនជាប់ពាក់ព័ន្ធនិងគ្រឿងញៀននៅក្នុងក្លឹបរាត្រីម៉ៃអាមីនោះទេ ពួកគេចោទថា ប៉ូលីសធ្វើទារុណ កម្មបង្ខំឲ្យផ្ដិតមេដៃលើកំណត់ហេតុសួរចម្លើយ ពាក់ព័ន្ធគ្រឿងញៀននោះ ។ លុះដំណាក់កាលចុងក្រោយពួកគេបានឆ្លើយថាឈ្មោះ ញឹក សាខន ភេទស្រី គឺជាម្ចាស់ក្លឹបម៉ៃអាមីនោះ ។
ទោះបីជាចម្លើយជនសង្ស័យឆ្លើយដោះសារយ៉ាងណា តំណាងអយ្យការ បាន និងនៅតែធ្វើការសន្និដ្ឋានសេចក្តី រក្សាទុកបទចោទនោះដដែល និងបានស្នើសុំឲ្យប្រធានក្រុមប្រឹក្សាជំនុំជម្រះ ផ្តន្ទាទោសលើជនជាប់ចោទទាំង៧ នាក់តាមគតិច្បាប់ ៕
ចែករំលែកព័តមាននេះ