រាជធានីភ្នំពេញ ៖ ជនម្នាក់ពិតជាថ្លើមធំពាសមេឃមែន ដោយហ៊ានធ្វើសកម្មភាពលួចយកម៉ូតូធំ១គ្រឿងរបស់មន្ត្រីនគរបាលប៉ុស្តិ៍ទំនប់ទឹក ខណ្ឌបឹងកេងកងមួយរូប ដែលមានទាំងបិទឡូហ្គោPOLICE និងពាក់ផ្លាកលេខនគរបាលផងដែរ។ ការលួចនេះគឺខណៈម៉ូតូខូច ហើយមន្ត្រីនគរបាលរូបនោះយកទៅឲ្យជាងជួសជុលម៉ូតូមួយកន្លែង នៅក្នុងសង្កាត់ផ្សារដើមថ្កូវ ខណ្ឌចំការមន ជួយជួសជុលឲ្យ និងផ្ញើទុកនៅទីនោះ។
ប៉ុន្តែសកម្មភាពខាងលើមិនអាចគេចផុតពីភ្នែកនគរបាលឡើយ ទីផុតក្រោយពេលលួចយកទៅដល់ក្នុងភូមិសាស្ត្រសង្កាត់ព្រៃស ខណ្ឌដង្កោជួបកម្លាំងនគរបាលកំពុងល្បាតក៏ចាប់ខ្លួននិងដកហូតយកម៉ូតូបានមកវិញ ។សកម្មភាពលួចនេះ កើតឡើងកាលពីវេលាម៉ោងប្រហែ១រំលងអធ្រាត្រឈានចូលថ្ងៃទី១ ខែមិថុនា ឆ្នាំ២០២០ នៅតាមផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន ។ ចំណែកជនសង្ស័យ ត្រូវចាប់ខ្លួនបាននាវេលាម៉ោងប្រមាណ ៣និង៣០នាទីទៀបភ្លឺថ្ងៃដដែលនោះ នៅតាមផ្លូវបេតុង ក្នុងភូមិព្រៃសខាងកើត សង្កាត់ព្រៃស ខណ្ឌដង្កោ ។
ជនសង្ស័យឈ្មោះ ផន ភក្តី អាយុ២៧ឆ្នាំ មុខរបរមិនពិតប្រាកដ ស្នាក់នៅក្នុងភូមិបឹងសាឡាង សង្កាត់បឹងសាឡាង ខណ្ឌទួលគោក បានធ្វើសកម្មភាពលួចយកម៉ូតូម៉ាកហុងដាអេសអិល ពណ៌ទឹកប្រាក់ បិទស្កុតពណ៌ត្រួយចេក ស៊េរីឆ្នាំ១៩៩៧ ពាក់ផ្លាកលេខ នគរបាល ១-៨៨០១ និងមានបិទឡូហ្គោPOLICE ជាកម្មសិទ្ធិរបស់លោក ឡុច លីណា អាយុ៣២ឆ្នាំ ជាមន្ត្រីនគរបាលប៉ុស្តិ៍ទំនប់ទឹក ខណ្ឌចំការមន ។
នគរបាលប៉ុស្តិ៍ព្រៃសនិយាយថា ក្រោយពីលួចម៉ូតូបានហើយ ជនសង្ស័យបានបណ្តើរតាមផ្លូវបេតុង នៅក្នុងភូមិព្រៃសខាងកើត សង្កាត់ព្រៃស ខណ្ឌដង្កោ ក៏ត្រូវកម្លាំងនគរបាលប៉ុស្តិ៍ព្រៃសល្បាតប្រទះឃើញ ចាប់ឃាត់ខ្លួននិងដកហូតយកម៉ូតូបានមកវិញ ។បន្ទាប់មក ក៏ប្រគល់ជនសង្ស័យឲ្យនគរបាលប៉ុស្តិ៍ផ្សារដើមថ្កូវ ខណ្ឌចំការមន សាកសួរ និងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ