រាជធានីភ្នំពេញ ៖ បុរសម្នាក់បើករថយន្តស្ទូចមួយគ្រឿងទៅប៉ះជាមួយរថយន្តបើកស្របទិសគ្នាមួយគ្រឿងទៀត បន្ទាប់មកបានបើករថយន្តគេចទាំងភ័យស្លន់ស្លោ ក៏ជ្រុលទៅបុករថយន្តពីរគ្រឿងទៀតនៅចំណុចកណ្តាលផ្លួវបែកជាបី បណ្តាលឱ្យបុរសបើករថយន្តស្ទូចនោះកៀបជាប់ក្នុងរថយន្តរងរបួសធ្ងន់ ។ ហេតុការណ៍នេះកើតឡើងកាលពីវេលាម៉ោង ៧ និង៥០នាទី យប់ថ្ងៃទី ២៤ វិចិ្ឆកា ២០១៤ នៅចំណុចផ្លួវបែកជាបី ( ផ្លូវ៥៩៨ កែងនិងផ្លូវជាតិលេខ៦) ស្ថិតក្នុងសង្កាត់ស្វាយប៉ាក ខណ្ឌឬស្សីកែវ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តស្ទូចម៉ាកនីសាន់ ពណ៌ ស មួយគ្រឿង ពាក់ស្លាកលេខ3A-2270 ជិះដោយបុរសពីរនាក់ បានបើកបរតាម ផ្លូវជាតិលេខ៦ ក្នុងទិសដៅពីត្បូងទៅជើង ។ ខណៈពេលកំពុងតែបើកបរនោះ ក៏បានបើកទៅប៉ះរថយន្តកូរ៉ូឡាមួយគ្រឿងទៀតបន្ទាប់មកតៃកុងរថយន្តស្ទូចនោះបានបើកគេចទាំងភ័យស្លន់ស្លោ ស្រាប់តែបើកគេចមកដល់ចំណុចកើតហេតុដែលជាផ្លូវបែកជាបីនោះ រថយន្តស្ទូចខាងលើក៏បានបើកទៅបុករថយន្តពីរគ្រឿងទៀត ដែលមួយគ្រឿងជាប្រភេទរថយន្តកុងតឺន័របើកមកពីផ្លូវលេខ៥៩៨ និង មួយគ្រឿងទៀតរថយន្តទូរីសដឹកផ្លែចេកបើកស្របទិសគ្នាជាមួយរថយន្តស្ទូចតាមផ្លូវជាតិលេខ៦បម្រុងបត់ឆ្លងផ្លូវ បណ្តាលឱ្យរថយន្តស្ទូចនោះ នៅកៀបជាប់ប្រឡោះកណ្តាលរវាងរថយន្តទាំងពីរគ្រឿង និងបណ្តាលឱ្យអ្នកបើកបររថយន្តស្ទូចកៀបជាប់ក្នុងរថយន្តរងរបួសធ្ងន់ ។
ក្រោយពេលកើតហេតុអ្នករួមដំណើរក្នុងរថយន្តស្ទូចបានបើកទ្វាររថយន្តរត់គេចបាត់ស្រមោល ចំណែកតៃកុងរថយន្តស្ទូចត្រូវបានប្រជាពលរដ្ឋនាំគ្នាជួយគាស់ចេញពីក្នុងរថយន្តបញ្ជូនទៅសង្រ្គោះនៅមន្ទីរពេទ្យ។
ចែករំលែកព័តមាននេះ