ខេត្តបន្ទាយមានជ័យ ៖ ប្រាសាទមេបុណ្យស្ថិតក្នុងឃុំបន្ទាយឆ្មារ ស្រុកថ្មពួក ដែលរងការខូចខាតស្ទើរទាំងស្រុង ត្រូវបានជួសជុលឡើងវិញ ដើម្បីទាក់ទាញភ្ញៀវជាតិនិងអន្តរជាតិឱ្យមកទស្សនា ។ លោក ម៉ៅ…
ខេត្តបន្ទាយមានជ័យ ៖ ប្រាសាទមេបុណ្យស្ថិតក្នុងឃុំបន្ទាយឆ្មារ ស្រុកថ្មពួក ដែលរងការខូចខាតស្ទើរទាំងស្រុង ត្រូវបានជួសជុលឡើងវិញ ដើម្បីទាក់ទាញភ្ញៀវជាតិនិងអន្តរជាតិឱ្យមកទស្សនា ។
លោក ម៉ៅ ស៊ី ជាក្រុមឯកទេសបានប្រាប់ថា ប្រាសាទមេបុណ្យកសាងឡើងដោយព្រះមហាក្សត្រ ព្រះបាទជ័យវរ្ម័នទី៧ នៅសម័យកាលចុងសតវត្សរ៍ទី១២ ដើមសតសតវត្សរ៍ទី១៣ រចនាបថបាយ័ន បានរងខូចខាតបាក់បែកស្ទើទាំងស្រុង ដោយមានការយកចិត្តទុកដាក់ពីក្រសួងវប្បធម៌និងវិចិត្រសីល្បៈនិងរដ្ឋបាលខេត្តបន្ទាយមានជ័យ ព្រមទាំងលោកជំទាវ ម៉ៅ ម៉ាល័យ ភរិយាលោក កែ គឹមយ៉ាន ឧបនាយករដ្ឋមន្ត្រី បានផ្តួចផ្តើមជួសជុលឡើងវិញដោយក្រុមឯកទេសក្រសួងវប្បធម៌និងវិចិត្រសីល្បៈនិងជំនាញក្រុមជាងអ្នករស់នៅប្រាសាទបន្ទាយឆ្មារ។
លោកបានបញ្ជាក់ថា លោកជំទាវ ម៉ៅ ម៉ាល័យ កែ គឹមយ៉ាន បានខិតខំប្រឹងប្រែងទាំងកំលាំងកាយនិងចិត្តបានផ្តួចផ្តើមកសាងស្ពានឈើដែលមានប្រវែងជិត១គីឡូម៉ែត្រពីទីទួលទៅប្រាសាទមេបុណ្យដែលហៅថាស្ពានជាប់និស្ស័យបារាយណ៍មេបុណ្យដែលរួចរាល់ជាច្រើនឆ្នាំមកនេះដែលទាក់ទាញភ្ញៀវជាតិនិងអន្តរជាតិមកកំសាន្តនៅថ្ងៃបុណ្យឆ្នាំ២០១៨ និង២០១៩កន្លងទៅ ដោយមានភ្ញៀវទេសចរមកទស្សនាកម្សាន្តរាប់ពាន់នាក់ក្នុង១ថ្ងៃ។
លោក ម៉ៅ ស៊ី បានបញ្ជាក់ថា ជាការយកចិត្តទុកដាក់ និងផ្តល់នូវថវិការផ្ទាល់របស់លោកជំទាវ ម៉ៅ ម៉ាល័យ បានជួសជុលប្រាសាទមេបុណ្យឡើងវិញ ដោយសហការជាមួយក្រសួងជំនាញចាប់កសាងឡើងនៅថ្ងៃទី២ ខែមករា ឆ្នាំ២០២០ រហូតមកដល់ពេលនេះក៏បានប្រទះឃើញចម្លាក់តោថ្មដែលមានអាយុកាលរាប់រយឆ្នាំមានកំពស់១,៩០ម៉ែត្រ ទំងន់ជាង១តោន ៕ (កែសម្រួលដោយ ៖ ធីតា)
ចែករំលែកព័តមាននេះ