ប្រទេសអ៊ីតាលី ៖ តាមប្រភពព័ត៌មាន CNN បានឱ្យដឹងថា ប្រទេសអ៊ីតាលី បានរាយការណ៍ពីការបាត់បង់ជីវិតចំនួន៧០នាក់ដោយសារវីរុសកូរ៉ូណាថ្មី នៅក្នុងរយៈពេល២៤ម៉ោងចុងក្រោយ នៅពេលដែលប្រទេសនេះ បានឃើញការធ្លាក់ចុះនូវករណីកើតថ្មីក្នុងប្រទេស។
ទីភ្នាក់ងារការពារជនស៊ីវិលអ៊ីតាលី បាននិយាយនៅថ្ងៃព្រហស្បតិ៍នេះថា មនុស្សសរុបចំនួន ៣៣,១៤២នាក់ត្រូវបានបាត់បង់ជីវិតដោយសារតែកូវីដ១៩ នៅប្រទេសអ៊ីតាលី។
ប្រទេសអ៊ីតាលី ក៏បានកត់ត្រាករណីថ្មីចំនួន៥៩៣ករណីនៅប៉ុន្មានថ្ងៃចុងក្រោយនេះ ដែលនាំឱ្យមានករណីឆ្លងសរុបនៅក្នុងប្រទេសដល់ ២៣១,៧៣២ករណី។
ស្ថានភាពទូទៅនៅក្នុងប្រទេសអ៊ីតាលី នៅតែបន្តមានភាពប្រសើរឡើង ខណៈដែលចំនួនករណីសកម្មនៃកូវីដ១៩ បានធ្លាក់ចុះមកត្រឹម ៤៧,៩៨៦នាក់។ ការធ្លាក់ចុះ ៥.៨៥% គឺជាចំនួនដ៏ច្រើនបំផុតក្នុងរយៈពេលប៉ុន្មានសប្តាហ៍ ហើយនេះជាលើកទី១ហើយ ដែលមានអ្នកជំងឺតិចជាង៥ម៉ឺននាក់ ចាប់តាំងពីថ្ងៃទី២២ ខែមីនា មក។
ចំនួនអ្នកជំងឺដែលកំពុងព្យាបាលក្នុងស្ថានភាពធ្ងន់ធ្ងរ ឥឡូវនេះមានចំនួន ៤៨៩នាក់ ដែលបានថយចុះចំនួន១៦នាក់ ក្នុងរយៈពេល២៤ម៉ោងចុងក្រោយ។
មនុស្សសរុបចំនួន ១៥០,៦០៤នាក់បានជាសះស្បើយពីជំងឺកូវីដ១៩ ដែលជាការកើនឡើងបានចំនួន ៣,៥០៣នាក់ នៅក្នុងប្រទេសអ៊ីតាលី៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ