ខេត្តកែប ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ពាក់ព័ន្ធនឹងគ្រឿងញៀន ត្រូវកងរាជអាវុធហត្ថក្រុងកែប សហការជាមួយអាវុធហត្ថខេត្តកំពត និងអាវុធហត្ថខេត្តស្វាយរៀង តាមប្រមាញ់រហូតឈានដល់ការឃាត់ខ្លួនបានកាលពីម៉ោង៦និង៣០នាទីព្រឹក ថ្ងៃទី២៧ ខែឧសភា ឆ្នាំ២០២០ ត្រង់ចំណុចភូមិដំណាក់ចង្ធើរ សង្កាត់ព្រៃធំ ក្រុងកែប ខេត្តកែប។
ប្រភពពីសមត្ថកិច្ចកងរាជអាវុធហត្ថខេត្តកែប បានឲ្យដឹងថា ជនសង្ស័យដែលត្រូវសមត្ថកិច្ចកងរាជអាវុធទាំង៣ខេត្ត តាមប្រមាញ់ចាប់ខ្លួនតាមដីការនេះមានឈ្មោះ ឃិន បណ្ឌិត ភេទប្រុស អាយុ៣៣ឆ្នាំ មានទីលំនៅភូមិរាជានុកូល ឃុំស្ទឹងត្រែង ស្រុកស្ទឹងត្រែង ខេត្តស្ទឹងត្រែង ត្រូវបានឃាត់ខ្លួនតាមអំណាចដីកាលេខ១១៦ ចុះថ្ងៃទី០៧ ខែមេសា ឆ្នាំ២០២០ របស់អយ្យការអមសាលាដំបូងខេត្តស្វាយរៀង ពាក់ព័ន្ធនឹងបទល្មើស ផលិតដោយខុសច្បាប់នូវសារធាតុញៀន និងរក្សាទុក ជួញដូរដោយខុសច្បាប់សារធាតុញៀននៅក្រុងបាវិត ខេត្តស្វាយរៀង កាលពីអំឡុងខែធ្នូ ឆ្នាំ២០១៩។
ប្រតិបត្តិការខាងលើនេះ ដឹកនាំដោយលោកវរសេនីយ៍ឯក អ៊ុក រិទ្ធិស័ក្ក មេបញ្ជាការរងកងរាជអាវុធហត្ថខេត្តកែប ទទួលផែនការងារព្រហ្មទណ្ឌ សហការជាមួយកម្លាំងអាវុធហត្ថខេត្តកំពត និងកម្លាំងអាវុធហត្ថខេត្តស្វាយរៀង។
ក្រោយពេលឃាត់ខ្លួន កម្លាំងអាវុធហត្ថបានដកហូតវត្ថុតាងមួយចំនួនរួមមាន៖ ឡេបថប១, ទូរស័ព្ទដៃ២គ្រឿង កាមេរ៉ា១ លិខិតឆ្លងដែន១ច្បាប់ អត្តសញ្ញាណប័ណ្ណ១ច្បាប់ រូបិយប័ណ្ណវត្ថុចិន១៣យ័ន ប្រាក់ខ្មែរ ១០៥,៧០០រៀល ខ្សែដៃ(លោហធាតុក្រហម)១ខ្សែ និងចិញ្ចៀន១វង់(លោហធាតុពណ៌ស)។
បច្ចុប្បន្នជនសង្ស័យ រួមនឹងវត្ថុតាង កងរាជអាវុធហត្ថក្រុងកែប បានធ្វើកំណត់ហេតុប្រគល់ជូនអាវុធហត្ថខេត្តស្វាយរៀង ដែលជាម្ចាស់ទឹកដី ដើម្បីអនុវត្តតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ