រាជធានីភ្នំពេញ ៖ ខណៈដែលចំនួនអ្នកស្លាប់ដោយសារតែកូវីដ-១៩បានហក់ឡើងជិត៣៥ម៉ឺន និងមានប្រទេសសរុប ២១៧ ប្រទេសកំពុងរងការវាយលុយដោយវីរុសឆ្លងមួយនេះ គិតត្រឹមព្រឹកថ្ងៃទី២៨ ឧសភាឆ្នាំ ២០២០ សម្តេចតេជោហ៊ុន សែន នាយករដ្ឋមន្ត្រីកម្ពុជាបានក្រើនរម្លឹកពលរដ្ឋឲ្យមានការប្រុងប្រយ័ត្នខ្ពស់នៃរលកទី២ នៃការរាតត្បាតជំងឺកូវីដ-១៩នៅកម្ពុជា បើសិនពលរដ្ឋមានការធ្វេសប្រហែសនោះ ។
សម្តេចតេជោ បានសរសេរសារក្រើនរម្លឹកពលរដ្ឋថា «សូមប្រុងប្រយ័ត្នរលកទី២ នៃការរាត្បតជំងឺឆ្លងកូវីដ១៩ ។ អ្វីដែលសំខាន់បំផុតនៅពេលនេះគឺការថែរក្សាអនាម័យសុខភាពអាយុជីវិតសម្រាប់ខ្លួនឯងផ្ទាល់ និងសម្រាប់កូនចៅជាទីស្រឡាញ់នៅក្នុងក្រុមគ្រួសារ កុំអោយឆ្លងមេរោគកូវីដ១៩ អោយសោះ» ។
សម្តេចនាយករដ្ឋមន្ត្រីបានបន្ថែមថា «សូមកុំអោយមានវិប្បដិសារីកើតឡើងព្រោះតែការធ្វេសប្រហែសមើលស្រាលចំពោះស្ថានការណ៍បច្ចុប្ប្នន្ន។ ទោះបីចំនួនអ្នកឆ្លងក្នុងប្រទេសយើងមានតិចមែន តែយើងត្រូវបង្កើនការយកចិត្តទុកដាក់ខ្ពស់នឹងត្រៀមទប់ស្កាត់គ្រប់ពេល ជាពិសេសនៅក្នុងរលកទី២នៃការងើបឡើងវិញនៃជំងឺឆ្លងរលាកផ្លូវដង្ហើមកូវីដ១៩ ដ៏កាចសាហាវបំផុតនេះ» ។
អង្គការសុខភាពពិភពលោក (WHO) បានបញ្ជាក់ឲ្យដឹងថា ចំនួនអ្នកឆ្លងកូវីដ-១៩ កើតមានក្នុងប្រទេសនិងកោះសរុប ២១៧ ដែលមានអ្នកឆ្លងរោគបានកើនឡើងជិត ៥.៥ លាននាក់ហើយ (5,491,678) ហើយស្លាប់ជិត ៣៥ ម៉ឺននាក់ ។ ក្នុងនោះផងដែរប្រទេសកម្ពុជាក៏មានអ្នកឆ្លងថ្មី ២នាក់ដែល ករណី១នោះគឺជាបុរសខ្មែរធ្វើដំណើរពីហ្វីលីពីន និងទី ២ គឺស្ត្រីខ្មែរមកពីអាមេរិកដែលថ្នាក់ដឹកនាំក្រសួងសុខាភិបាលអះអាងថា «ករណីថ្មី២នេះគឺជាករណីនាំចូល» មិនទាន់ត្រូវបានចាត់ទុកជារលកទី ២ នៅកម្ពុជានោះទេ ។
សូមរម្លឹកថា កម្ពុជារកឃើញករណីវិជ្ជមានកូវីដ ១៩សរុប ១២៤ ករណី ដែលក្នុងនោះព្យាបាលជាសះស្បើយបាន ១២២ ករណីនិង ២ ករណីកំពុងសម្រាកព្យាបាលនៅពេទ្យ រុស្ស៊ី នៅក្រុងភ្នំពេញ ។ សម្តេចតេជោ ហ៊ុន សែន ក៏បានរម្លឹកដល់ពលរដ្ឋផងដែរថា «មកទល់ពេលនេះ មិនទាន់មានថ្នាំព្យាបាលកូវីដ១៩នៅឡើយទេ។
ដូច្នេះ បងប្អូនប្រជាពលរដ្ឋត្រូវតែពាក់ម៉ាស់ ហើយត្រូវដុសលាងសម្អាតដៃជាប្រចាំដោយទឹកអាល់កុល ឬចឹលសម្លាប់មេរោគ។ ត្រូវខ្ទប់មាត់ជាមួយក្រម៉ា ឬម៉ាស ឬខ្ទប់ដោយដៃនៅពេលក្អក ឬកណ្តាស ជាពិសេសនៅក្នុងចំណោមក្រុមមនុស្សច្រើន ឬទីប្រជុំជននានាដូចជាទីផ្សារ ភោជនីយដ្ឋាន និងទីកន្លែងធ្វើការជា ដើម »។
សម្តេចបានបន្តថា សូមបន្តស្តាប់តាមការណែនាំរបស់ក្រសួងសុខាភិបាលគ្រប់ពេល។ បើមានចម្ងល់ឬការសង្ស័យណាមួយ សូមទូរស័ព្វទៅលេខ ១១៥ ជាបន្ទាន់។ យើងទាំងអស់គ្នា ត្រូវបន្តចូលរួមទប់ស្កាត់ការរឆ្លងរាតត្បាតនៃជំងឺឆ្លងកូវីដ១៩នៅទូទាំង ប្រទេស ៕
ចែករំលែកព័តមាននេះ