ខេត្តស្វាយរៀង៖ លោកយាយវ័យ៦៦ឆ្នាំចំអិនម្ហូបអាហាររួចភ្លេចពន្លត់ភ្លើងចង្ក្រាន ហើយដើរចេញពីផ្ទះទៅលេងផ្ទះគេក្នុងភូមិមួយភ្លេត ក៏ត្រូវភ្លើងចង្ក្រានបានឆាបឆេះផ្ទះនិងទ្រព្យសម្បត្តិអស់គ្មានសល់ក្លាយជាគំនរផេះផង់ ។ ករណីភ្លើងចង្ក្រានឆាបឆេះផ្ទះនេះ កើតឡើងនៅវេលាម៉ោង១០និង៣០នាទីព្រឹកថ្ងៃទី២៧ឧសភា នៅភូមិជៀសប្ញស្សី ឃុំកំពង់ចម្លង ស្រុកស្វាយជ្រំ ។
បើតាមសមត្ថកិច្ចបានឲ្យដឹងថា ម្ចាស់ផ្ទះរងគ្រោះឈ្មោះ រាម យ៉ាត ភេទស្រី អាយុ៦៦ឆ្នាំ ជាស្ត្រីមេម៉ាយរស់នៅក្នុងភូមិឃុំកើតហេតុខាងលើ មានជីវភាពក្រីក្ររស់នៅជាមួយចៅ ។ ប្រភពបន្តទៀតថា ផ្ទះលោកយាយទំហំ៤ម៉ែត្រគុណ៦ម៉ែត្រសង់អំពីឈើ ជញ្ជាំងស្លឹកប្រក់ស័ង្កសី រនាបប្ញស្សីលើកផុតពីដីកន្លះម៉ែត្រ ត្រូវភ្លើងចង្ក្រានឆាបឆេះអស់គ្មានសល់។
ប្រភពពីប្រជាពលរដ្ឋបានឲ្យដឹងថា ភ្លើងឆេះលឿនពេកពេលអ្នកភូមិមើលឃើញ គឺភ្លើងបានឆេះពេញក្រមុំទៅហើយ ពេលមកដល់ក៏គ្មានទឹកនៅជិតអាចយកមកពន្លត់បាន គឺបានត្រឹមតែមកឈមើលប៉ុណ្ណោះ។ គួរឲ្យអាណិតលោកយាយ បានពោលថា លោកយាយតស៊ូរស់យ៉ាងលំបាកណាស់ទំរាំបានប៉ុន្នឹងឥឡូវអ្វីៗ ត្រូវភ្លើងឆេះអស់គ្មានសល់ សូម្បីចានស្រាក់ដែលធ្លាប់ដាក់ចង្ហាន់ទៅប្រគេនព្រះសង់រាល់ថ្ងៃសិលក៏ឆេះអស់មិនសល់ផងចៅ។
ទ្រព្យសម្បត្តិតិចតួច សំលៀកបំពាក់ កន្ទេលមុងភួយខ្នើយ អង្ក ចានឆ្នាំងឆេះគ្មានសល់។ ដូចច្នេះសូមបងប្អូនប្រុងប្រយ័ត្នខ្ពស់ទាំងអស់គ្នាអាកាសធាតុក្តៅណាស់ចូលរួមសោកស្តាយផង ៕
ចែករំលែកព័តមាននេះ