រាជធានីភ្នំពេញ ៖ ព្រោះវិបត្តិកូវីដ-១៩ រាជរដ្ឋាភិបាលបានសម្រេចដាក់ចេញវិធានការថ្មីបន្ថែមដើម្បីកាត់បន្ថយផលប៉ះពាល់សម្រាប់សេដ្ឋកិច្ច ក្នុងនោះផងដែររាជរដ្ឋាភិបាលបន្តលើកលែងការបង់ពន្ធប្រចាំខែសម្រាប់គ្រប់ប្រភេទចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មនៅក្នុងរាជធានី-ខេត្តចំនួន ៧ ក្នុងនោះរួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកែប កំពត បាវិត ប៉ោយប៉ែតរយៈពេល២ខែ បន្ថែមចាប់ពីខែមិថុនា ដល់ខែកក្កដា ឆ្នាំ ២០២០ ។
យោងតាមសេចក្តីប្រកាសព័ត៌មានរបស់រាជរដ្ឋាភិបាលកម្ពុជា ចេញផ្សាយថ្ងៃទី ២៦ ឧសភា ២០២០នេះបានអោយដឹងថា ការសម្រេចពន្យាមិនយកពន្ធរយៈពេល ២ខែបន្ថែមនេះ គឺស្ថិតនៅក្នុងជុំទី ៤ នៃការសម្រួលរបស់រាជរដ្ឋាភិបាលចំពោះអាជីវកម្មរងផលប៉ះពាល់ដោយកូវីដ-១៩ នោះ ។
ប្រកាសដដែលបានបន្តថា ក្នុងគោលដៅធានាលំនឹងនៃសេដ្ឋកិច្ច និងសង្គម ពិសេសរក្សាលំនឹងអាជីវកម្មរបស់ក្រុមហ៊ុន រោងចក្រសហគ្រាស ឱ្យអាចបន្តអាជីវកម្ម ឆ្លងផុតពីវិបត្តិនៃជំងឺកូវីដ១៩នេះ រាជរដ្ឋាភិបាលកម្ពុជា សម្រេចដាក់ចេញនូវវិធានការជុំទី៤ ដើម្បីកាត់បន្ថយផលប៉ះពាល់នានាដែលអាជីវកម្ម ធុរកិច្ចក្នុងវិស័យសំខាន់ៗកំពុងប្រឈម ។
សេចក្តីប្រកាសបង្ហាញថា កញ្ចប់នៃវិធានការនេះ រួមបញ្ចូលនូវសមាភាគធំៗពីរ គឺ ១ – ការបន្តសុភាពនៃវិធានការមួយចំនួនដែលរាជរដ្ឋាភិបាលបានដាក់ចេញកន្លងមក ទី២ – ការដាក់ចេញនូវវិធានការថ្មីបន្ថែម ។
ជាមួយគ្នានេះដែរ វិធានការជុំទី៤ នេះក៏បានគិតគូរដល់ការបង្កើននូវការចូលរួមចំណែកបន្ធូរបន្ទុក នៃការរស់នៅរបស់ប្រជាពលរដ្ឋ ដែលមានជីវភាពក្រីក្រ តាមរយៈកម្មវិធីជំនួយសង្គមផងដែរ ។ វិធានការនេះក៏ផ្តោតផងដែរ លើការជួយស្ដារ និងជំរុញលទ្ធភាពអាជីវកម្ម និងធុរកិច្ច ឱ្យងើបឡើងវិញដើម្បីជំរុញកំណើនសេដ្ឋកិច្ចនៅក្នុងបរិការណ៍ក្រោយវិបត្តិ ខណៈវិបត្តិកូវីដ អាចនឹងវិវត្តទៅដំណាក់មួយកាន់តែធូរស្បើយ ។
ក្រៅពីនេះរាជរដ្ឋាភិបាលក៏មានវិធានការជួយវិស័យអាកាសចរណ៍ផងដែរ ដោយលើកលែងការបង់ពន្ធអប្បបរមា សម្រាប់រយៈពេល២ខែបន្តទៀតចាប់ពីខែមិថុនា ដល់ខែ កក្កដា ឆ្នាំ ២០២០ ជូនដល់ក្រុមហ៊ុនអាកាសចរណ៍ ដែលបានចុះបញ្ជីនៅកម្ពុជា ៕
ចែករំលែកព័តមាននេះ