ខេត្តកំពត ៖ ករណីក្មេងលួចបេះផ្លែទុរេនក្នុងចម្ការ គិតត្រឹមម៉ោង៦ល្ងាចថ្ងៃទី២៥ ឧសភា ដដែល ក្មេងទាំង៣នាក់ ត្រូវបញ្ជូនទៅស្នងការ ។ ខណៈម្ចាស់ចម្ការបានប្រាប់ថា…
ខេត្តកំពត ៖ ករណីក្មេងលួចបេះផ្លែទុរេនក្នុងចម្ការ គិតត្រឹមម៉ោង៦ល្ងាចថ្ងៃទី២៥ ឧសភា ដដែល ក្មេងទាំង៣នាក់ ត្រូវបញ្ជូនទៅស្នងការ ។ ខណៈម្ចាស់ចម្ការបានប្រាប់ថា គាត់បាត់ច្រើនលើកមកហើយ ។
សូមរំលឹកថា ក្មេងប្រុស៣នាក់បានត្រូវនគរបាលស្រុកកំពង់ត្រាចសួរនាំ ពាក់ព័ន្ធនឹងករណីលួចចូលបេះទុរេន១ផ្លែទម្ងន់ជិត២គីឡូក្រាមពីក្នុងចម្ការមួយ កាលពីព្រឹកថ្ងៃទី២៥ ខែឧសភា នៅខាងលិចភ្នំវល្លិ ស្ថិតក្នុងភូមិកូនសត្វ ឃុំកូនសត្វ ស្រុកទឹកឈូ ។ ក្មេងប្រុសទាំង៣នាក់នេះ ២នាក់អាយុ១៦ឆ្នាំដូចគ្នា និងម្នាក់ទៀត អាយុ១៧ឆ្នាំ ។ ពួកគេទាំង៣នាក់ នៅភូមិកណ្ដាលទួល ឃុំកំពង់ត្រាចខាងលិច ស្រុកកំពង់ត្រាច ។
ស្ត្រីឈ្មោះ ឯម ម៉ៅ ត្រូវជាម្ដាយក្មេងប្រុសម្នាក់ បាននិយាយប្រាប់អ្នកយកព័ត៌មានថា កូនគាត់ រួមទាំងក្មេងប្រុស២នាក់ទៀត បានទៅស៊ីឈ្នួលបេះម្រេចឱ្យថៅកែម្នាក់ នៅជិតចម្ការទុរេន ។ ពេលកំពុងបេះម្រេច ពួកគេទាំង៣នាក់បានជិះម៉ូតូទៅខាងក្រៅ ដោយប្រាប់ថា ទៅចាក់សាំង ។ បន្ទាប់ពីបាត់យូរពេក គាត់ក៏ចេញមកក្រៅចម្ការ និងឮថាកូនប្រុសគាត់រួមទាំងក្មេងប្រុស២នាក់ទៀត ត្រូវម្ចាស់ចម្ការទុរេនចាប់ខ្លួនឱ្យនគរបាល ។
ម្ដាយក្មេងប្រុសរូបនេះនិយាយទៀតថា គាត់មិនបានដឹងថា កូនគាត់ទៅលួចបេះទុរេនគេទេ ។ ម្ចាស់ចម្ការបានជិះម៉ូតូចំនួន៣គ្រឿង ដេញតាមចាប់រហូតដល់ភូមិកណ្ដាលទួល ក្នុងចម្ងាយផ្លូវជាង១០គីឡូម៉ែត្រ ។
ម្ចាស់ចម្ការបានទារសំណងពីក្មេងប្រុសទាំង៣នាក់ ជាប្រាក់ចំនួន១ពាន់ដុល្លារ ។ ឯម្ដាយក្មេងទាំង៣នាក់នេះ សុំបង់ឱ្យម្ចាស់ទុរេនត្រឹមតែម្នាក់ៗ៥០ម៉ឺនរៀល តែម្ចាស់ទុរេនមិនព្រម ។
នគរបាលដែលបានធ្វើកំណត់ហេតុនិយាយថា ម្ចាស់ចម្ការទុរេនខាងលើឈ្មោះ សយ សុភ័ក្ត្រ ភេទប្រុស អាយុ៣៥ឆ្នាំ នៅភូមិត្រពាំងព្រីង ឃុំត្រពាំងព្រីង ស្រុកទឹកឈូ ។ ពេលនេះ នគរបាលមិនហ៊ានថា ឱ្យក្មេងទាំង៣នាក់រួចខ្លួន ឬក៏លើកលែងទោសនោះទេ គឺអាស្រ័យទៅលើម្ចាស់ទុរេន ។
យ៉ាងណាក៏ដោយ មន្ត្រីនគរបាលបាននិយាយគ្រប់មាត់ថា បើម្ចាស់ទុរេនធ្វើបែបនេះ វាហួសហេតុពេកហើយ ។
ចែករំលែកព័តមាននេះ