ខេត្តស្វាយរៀង ៖ អនាគតកូនកំលោះម្នាក់បានដាច់ចិត្តផឹកថ្នាំបាញ់ស្រូវប៉ុនប៉ងសម្លាប់ខ្លួនក្នុងថ្ងៃប្រារព្ធពិធីភ្ជាប់ពាក្យរបស់ខ្លួន ខណៈដែលឪពុកម្តាយបងប្អូនរវល់រៀបចំចាត់ចែងកម្មវិធីនៅផ្ទះខាងនារីជាគូដណ្តឹង ដែលមានចម្ងាយ៥០០ម៉ែត្រពីផ្ទះខាងប្រុស ។ ហេតុការណ៍ភ្ញាក់ផ្អើលនេះកើតឡើងកាលពីវេលាម៉ោង៧និង៣០នាទីព្រឹក ថ្ងៃទី១៤ វិច្ឆិកា ស្ថិតក្នុងភូមិភ្លោះ ឃុំក្រួស ស្រុកស្វាយជ្រំ ។
តាមសម្តីបុរសជាឪពុកឈ្មោះ យាន សៀម អាយុ៣៨ឆ្នាំ ជាកសិករ បានឱ្យដឹងថា កូនប្រុសដែលគិតខ្លីនេះមានឈ្មោះ យាន ពិសាល អាយុ២០ឆ្នាំ ជាកសិករ មានលំនៅក្នុងភូមិកើតហេតុខាងលើ រីឯនារីដែលជាគូដណ្តឹងឈ្មោះ មឿន ស្រីល័ក្ខ អាយុ១៨ឆ្នាំ ជាកសិករ អ្នកទាំងពីរត្រូវជាបងប្អូនជីដូនមួយនឹងគ្នា ។ បុរសជាឪពុកបានបន្តថា មូលហេតុដែលបណ្តាលឱ្យកើតមានការរៀបចំពិធីភ្ជាប់ពាក្យនេះឡើង ដោយសារតែចាស់ទុំទាំងសងខាង ដែលត្រូវជាបងប្អូននឹងគ្នាស្រាប់បានឃើញកូនៗមានភាពល្អូកល្អិននឹងគ្នា ក៏មានគំនិតចង់ផ្សំផ្គុំពួកគេទាំងពីរនាក់ឱ្យបានជាគូគ្រងនឹងគ្នា តែក៏បានសួរនាំចិត្តថ្លើមកូនទាំងពីរដែរ មិនមែនចេះតែធ្វើទៅតាមអំណាចខ្លួនជាឪពុកម្តាយនោះទេ តែមិនមានខាងណាម្នាក់ប្រកែកតវា៉នោះឡើយ ។
បុរសជាឪពុកបន្តថា លុះដល់ថ្ងៃភ្ជាប់ពាក្យនោះ ពួកគាត់ជាឪពុកម្តាយក៏បានទៅរៀបចំចាត់ចែងកម្មវិធីនៅផ្ទះខាងកូនស្រីដែលនៅចម្ងាយប្រមាណជា៥០០ម៉ែត្រពីផ្ទះខាងកូនប្រុស រីឯកូនប្រុសរបស់គាត់មិនទាន់ទៅផ្ទះខាងស្រីទេ (នៅផ្ទះ) ។ បន្ទាប់ពីរៀបចំកម្មវិធីរួចរាល់ភ្ញៀវពន្លឺមកដល់នៅតែមិនទាន់ឃើញអនាគតកូនកំលោះមកដល់ទៀត គាត់ក៏បានឱ្យបងប្អូនទៅតាមហៅនៅឯផ្ទះ ដើម្បីចាប់ផ្តើមកម្មវិធីភ្ជាប់ពាក្យឱ្យទាន់ពេលវេលាជ័យ ។ បន្ទាប់ពីបងប្អូនទៅតាមបាត់រយៈពេលជាងកន្លះម៉ោង ស្រាប់តែមានគេរត់មកប្រាប់ថា កូនប្រុសរបស់គាត់បានផឹកថ្នាំបាញ់ស្រូវសម្លាប់ខ្លួនបាត់ទៅហើយ ធ្វើឱ្យគាត់និងសាច់ញាតិទាំងអស់មានការភ្ញាក់ផ្អើល និងស្លុតចិត្តយា៉ងខ្លាំង ហើយក៏ប្រញាប់ប្រញាល់បញ្ជូនកូនមកសង្គ្រោះនៅមន្ទីរពេទ្យបង្អែកខេត្តភ្លាមៗ ។ រហូតមកដល់វេលាម៉ោង១១ព្រឹកថ្ងៃដដែល យុវជនខាងលើក្រុមគ្រូពេទ្យកំពុងជួយសង្គ្រោះនៅឡើយ ។
ភ្លាមៗនេះ គេមិនដឹងថាតើគម្រោងភ្ជាប់ពាក្យរៀបការកូនប្រុសស្រីនេះត្រូវលើកពេលឬលុបចោលនោះទេ ព្រោះម្នាក់ៗគិតពីសុវត្ថិភាពអនាគតកូនកំលោះដែលកំពុងស្ថិតក្នុងមន្ទីរពេទ្យ ៕
ចែករំលែកព័តមាននេះ