រាជធានីភ្នំពេញ៖ អ្នកដំណើរជនជាតិខ្មែរម្នាក់និងបរទេសចំនួន ៥ សញ្ជាតិសរុប ៦២នាក់ត្រូវបានត្រូវដាក់បន្តឲ្យធ្វើចត្តាឡីស័កចំនួន ១៤ ថ្ងៃ នៅសណ្ឋាគារមួយនៅរាជធានីភ្នំពេញ ដើម្បីតាមដានសុខភាពតាមវិធានការសុខាភិបាលជាចាំបាច់ បន្ទាប់ពីអ្នកដំណើរម្នាក់ជាបុរសជនជាតិខ្មែរវ័យ ២៦ ឆ្នាំត្រូវបានតេស្តរកឃើញមានផ្ទុកកូវីដ-១៩ ។
យោងតាមប្រកាសព័ត៌មានរបស់ក្រសួងសុខាភិបាលកម្ពុជាចេញផ្សាយកាលពីរាត្រីថ្ងៃទី ២១ ឧសភា អំពីការរឃើញករណីវិជ្ជមានកូវីដ-១៩ មួយករណីលើជនជាតិខ្មែរវ័យ ២៦ ឆ្នាំធ្វើដំណើរពីប្រទេសហ្វីលីពីន ឆ្លងកាត់ព្រលានយន្តហោះនៅកូរ៉េ ក៏បានឲ្យដឹងផងដែរថាអ្នកដំណើរផ្សេងទៀតមានជនជាតិកូរ៉េ ២៣ នាក់, ជនជាតិប៊ែលហ្សិក ១ នាក់, បុរសជនជាតិចិន (តៃវ៉ាន់) ១នាក់, បុរសជនជាតិ ហូឡង់ ១នាក់, ជនជាតិជប៉ុន ៣នាក់, និងជនជាតិខ្មែរ ៣៤ នាក់ (រួមទាំងអ្នកផ្ទុកកូវីដ-១៩) ។
ឆ្លើយតបទៅនឹងសំណូររបស់អ្នកសារព័ត៌មានថាតើអ្នកបើកបរយន្តហោះ និងបុគ្គលិកបម្រើការលើយន្តហោះ តើត្រូវបានដាក់ក្នុងចត្តាឡីស័ក្តដែរ ឬទេនោះ លោកជំទាវ ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានឲ្យដឹងថា «ខ្ញុំបានព័ត៌មានហើយ គឺយន្តហោះនោះទាំងអ្នកបើកបរនិងអ្នកបម្រើការបានវិលត្រឡប់ទៅវិញនៅថ្ងៃដដែល» ។
សូមរម្លឹកថាបុរសជនជាតិខ្មែរ អាយុ ២៦ ឆ្នាំ មានទីលំនៅនៅស្រុកកំពង់ត្រាច ខេត្តកំពត បានធ្វើដំណើរពីប្រទេសហ្វីលីពីន ឆ្លងកាត់ព្រលានយន្តហោះនៅកូរ៉េនិងបានមកដល់កម្ពុជានាថ្ងៃទី ២០ ឧសភា វេលាម៉ោង ១០យប់ ។ ក្រោយពីតេស្តឃើញមានវិជ្ជមានកូវីដ-១៩ ក៏ត្រូវបានបញ្ជួនមកទទួលការព្យាបាលនៅមន្ទីរពេទ្យរុស្ស៊ី ៕
ចែករំលែកព័តមាននេះ