ខេត្តកំពង់ឆ្នាំង ៖ ដោយសារមានការគាំទ្រពីអតិថិជនកាន់តែច្រើនឡើងៗ បងប្អូនប្រជាពលរដ្ឋជាអ្នកកែច្នៃរទេះគោចាស់ៗ បានពង្រីកអាជីវកម្មរបស់ខ្លួនកាន់តែប្រសើរឡើង និងមានសោភ័ណភាពស្អាតជាងមុន ដែលធ្វើឱ្យរទេះគោមានតម្លៃរហូតដល់ជាង១ពាន់ដុល្លារក្នុងមួយគ្រឿង ។ នេះជាការអះអាងរបស់ប្រជាពលរដ្ឋរស់នៅឃុំស្វាយជ្រុំ ស្រុករលាប្អៀរ…
ខេត្តកំពង់ឆ្នាំង ៖ ដោយសារមានការគាំទ្រពីអតិថិជនកាន់តែច្រើនឡើងៗ បងប្អូនប្រជាពលរដ្ឋជាអ្នកកែច្នៃរទេះគោចាស់ៗ បានពង្រីកអាជីវកម្មរបស់ខ្លួនកាន់តែប្រសើរឡើង និងមានសោភ័ណភាពស្អាតជាងមុន ដែលធ្វើឱ្យរទេះគោមានតម្លៃរហូតដល់ជាង១ពាន់ដុល្លារក្នុងមួយគ្រឿង ។ នេះជាការអះអាងរបស់ប្រជាពលរដ្ឋរស់នៅឃុំស្វាយជ្រុំ ស្រុករលាប្អៀរ ដែលបានប្រមូលទិញនូវគ្រឿងរទេះគោចាស់ៗយកមកដំឡើងធ្វើជារទេះថ្មីសម្រាប់លក់ឲ្យបងប្អូនយកទៅដាក់តាំងតាមគេហដ្ឋាន និងតាមរមណីយដ្ឋាននានា ។
ផ្ដល់កិច្ចសម្ភាសន៍ដល់កោះសន្តិភាពនៅព្រឹកថ្ងៃទី២១ ខែឧសភា ឆ្នាំ២០២០ លោក សួន ស៊ីណេត ជាអាជីវករប្រមូលទិញរទេះគោចាស់ៗយកមកកែច្នៃដំឡើងថ្មីសម្រាប់លក់បានឲ្យដឹងថា គាត់បានប្រកបមុខរបរនេះច្រើនឆ្នាំណាស់មកហើយ ក្រោយពីមានសារព័ត៌មាន ទូរទស្សន៍ចុះមកយកព័ត៌មាននិងបានផ្សាយកន្លងទៅ ធ្វើឱ្យបងប្អូនប្រជាពលរដ្ឋជាអ្នកកែច្នៃរទេះចាស់ធ្វើថ្មី សម្រាប់លក់ នៅក្នុងឃុំស្វាយជ្រុំនេះ កាន់តែល្បី ដោយមានប្រជាពលរដ្ឋ មន្ត្រីរាជការ និងអ្នកមានបណ្ដាសិក្ត័បានមកទិញរទេះគោរបស់គាត់ជាហូរហែ ដែលធ្វើឲ្យមុខរបរគាត់កាន់តែរីកចម្រើនឡើងជាលំដាប់។
អាជីវករខាងលើបានបន្តថា បច្ចុប្បន្ននេះគាត់មានការពិបាកក្នុងការប្រមូលគ្រឿងរទេះចាស់ៗ ដើម្បីមកដំឡើងថ្មីណាស់ ព្រោះតែរកទិញរទេះចាស់ៗលែងចង់បានទៅហើយ។ រទេះគោមួយគ្រឿងដែលគាត់ដំឡើងរួច លក់ក្នុងតម្លៃចាប់ពី៤០០ដុល្លារ រហូតទៅដល់១២០០ដុល្លារ ទៅតាមប្រភេទឈើមានធ្នង់ នាងនួន និងសុក្រំជាដើម ក្រៅពីនោះរទេះថ្លៃៗមានបំពាក់ដោយចង្កំតាមនឹម និងតាមជន្ទោលបន្ថែមផងដែរ។ ចំពោះតម្លៃចាប់ពី១ពាន់ដុល្លាឡើង គឺមានបន្ថែមនូវនង្គល័១គ្រឿង រនាស់១គ្រឿង ក្រៅពីនោះមានបន្ថែមនូវទ្រូ ឈ្នាង អង្រុត ចង្អេ កញ្ជើ មួកស្លឹកត្នោត និង បំពង់ឬស្សី ផងដែរ ដើម្បីឱយអតិថិជន យកទៅដាក់តាំងលើរទេះដែលបានទិញទៅ ។
ជាមួយគ្នានេះដែរ លោក សុខ បឿន ជាជាងជួសជុល និងដំឡើងរទេះជូនអាជីវករខាងលើនេះបានបញ្ជាក់ថា បច្ចុប្បន្នរទេះគោដែលបានទិញមកគឺមានតែគ្រឿងផ្សេងៗប៉ុណ្ណោះ ដូចជាកង់, ព្រែកត្រង់, ព្រែក ង ទូក និងទ្រង់ជាដើម គាត់យកមកបានឈូស និងដំឡើងផ្គុំគ្នាបានជារទេះ បន្ទាប់មករទេះណាដែលជាប្រភេទឈើល្អ បានចង្កំបន្ថែមទៀត។ រទេះ១គ្រឿងត្រូវចំណាយពេលធ្វើ២ទៅ៣ថ្ងៃ ទើបដំឡើងរួចដោយបានតម្លៃត្រឹមតែ១៥ម៉ឺនរៀល។
គួររំឮកដែរថា៖ រទេះគោ គឺយានជំនិះម្យ៉ាង ដែលមានតាំងពីបុរាណកាលមក ដោយដូនតាខ្មែរជំនាន់ដើមបានផលិតរទេះគោ ដើម្បីបម្រើឲ្យវិស័យកសិកម្មក្នុងការដឹកជញ្ជូនស្រូវ និងដឹកទំនិញផ្សេងៗគ្រប់ប្រភេទ។រទេះគោក៏ត្រូវបានដូនតាជំនាន់ដើមធ្វើជាយានជំនិះក្នុងការធ្វើដំណើរផ្លូវឆ្ងាយ ឬសម្រាប់ដឹកនង្គល័រនាស់ ទៅធ្វើស្រែផងដែរ។
បច្ចុប្បន្នរទេះគោ ឬរទេះក្របីត្រូវបានប្រជាពលរដ្ឋបោះបង់ចោលស្ទើរតែអស់ទាំងស្រុងទៅហើយ ដោយងាកមកប្រើគោយន្តកន្ត្រៃជំនួសវិញ, សម្រាប់អាជីវករដែលប្រមូលរទេះចាស់ៗមកដំឡើងថ្មីបែបនេះប្រៀបបានពួកគាត់កំពុងជួយថែរក្សានិងអភិរក្សនូវរទេះបុរាណរបស់ដូនតាខ្មែរយើងផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ