ខេត្តបាត់ដំបង ៖ ជាងកន្លះខែហើយ ដែលក្រសួងអប់រំយុវជន និងកីឡាចេញសេចក្ដីប្រកាសដល់គ្រប់មន្ទីរ.. នៅតាមបណ្ដាខេត្ត-រាជធានី ឲ្យរៀបចំបើកបង្រៀនសិស្សានុសិស្សឡើងវិញ បន្ទាប់ពីការសិក្សាដូលសន្លប់អស់រយៈពេលជាច្រើនខែកន្លងទៅនេះ ដោយសារតែការផ្ទុះឡើងនៃ« វីរុសកូរ៉ូណា ឬកូវីដ១៩ថ្មី»។ ប៉ុន្តែក្រសួងមិនតម្រូវឲ្យបើកទ្វារសាលាបង្រៀនសិស្សទេ គឺណែនាំឲ្យបើកបង្រៀនជាបណ្ដោះអាសន្ននៅតាមសហគមន៍ និងមិនអនុញាតឲ្យសិស្សរៀនលើសពី១០នាក់ឡើយក្នុងមួយថ្នាក់។
យោងលើផែនការរបស់ក្រសួងនេះ នៅក្នុងខេត្តបាត់ដំបង គេសង្កេតឃើញនៅតាមបណ្ដាមូលដ្ឋាននានា ទាំងនៅទីប្រជុំជន ទាំងនៅតាមទីជនបទ លោកគ្រូ អ្នកគ្រូ បានបើកបង្រៀនសិស្សនុសិស្សក្នុងសកម្មភាពយ៉ាងផុសផុលបំផុត ។ ប៉ុន្តែកន្លែងខ្លះបង្រៀនសិស្សនៅខាងក្រោមផ្ទះ កន្លែងខ្លះយករោងគោធ្វើជាសាលា រីឯកន្លែងខ្លះទៀត ត្រូវជ្រើសរើសយកម្លប់ឈើរធ្វើជាជម្រកសិក្សា ជាមួយនឹងខ្យល់អាកាសដ៏ល្អបរិសុទ្ធ.. ជាពិសេសនៅតាមតំបន់ជនបទ ។ នេះហើយការសិក្សា នៅក្នុងយុគសម័យកូវីដ១៩ថ្មី។
ជាក់ស្ដែង នៅសាលាបឋមសិក្សា«ភ្នំខ្ពស់» ដែលស្ថិតនៅក្នុងភូមិតាង៉ែន ឃុំតាគ្រាម ស្រុកបាណន់។ សាលាបឋមសិក្សាមួយនេះនៅក្បែរជើងភ្នំ ឆ្ងាយពីទីប្រជុំជន តែស្ថិតនៅម្ខាង នៃតំបន់ទេសចរណ៏«អាងកំពីងពួយ» ប៉ែកខាងត្បូង។ ជួបជាមួយកោះសន្តិភាព កាលពីថ្ងៃទី១៨ ឧសភា លោកទូច ង៉ុយ នាយកបឋមសិក្សាភ្នំខ្ពស់នេះ បាននិយាយថា លោកបានបែងចែកសិស្សជាច្រើនក្រុម ក្នុងចំណោមសិស្សានុសិស្ស សរុបចំនួន១១៣នាក់មានចំនួន០៦ថ្នាក់ តាមការណែនាំពីលោកប្រធានមន្ទីរអប់រំខេត្ត ដើម្បីឲ្យលោកគ្រួ អ្នកគ្រូ បើកបង្រៀននៅតាមសហគមន៏ ។ លោកបានបញ្ជាក់ថា សិស្សខ្លះរៀននៅតាមសំយ៉ាបផ្ទះ និង ខ្លះទៀតរៀននៅក្រោមម្លប់ឈើរ។ ប៉ុន្តែពួកគេពេញចិត្តនឹងការសិក្សានៅតាមទីតាំងបែបនេះ ហើយពួកគេមិនដែលខកខានក្នុងការសិក្សាទេ។
ស្ថិតនៅមិនឆ្ងាយប៉ុន្មានពីសាលាបឋមសិក្សា «ភ្នំខ្ពស់» នោះទេ គេឃើញសិស្សានុសិស្សមួយក្រុម ដែលមានគ្នាប្រហែល៣០នាក់ អង្គុយរៀនយ៉ាងយកចិត្តទុកដាក់បំផុត ក្រោមម្លប់ដើមអំពិលទឹក ជាមួយនឹងខ្យល់អាកាសដ៏បរិសុទ្ធបក់ត្រសៀកៗ ក្រោមក្រសែភ្នែកសត្វគោមួយហ្វូងដែលទំនងកំពុងរងចាំម្ចាស់ ចប់ម៉ោងរៀននឹងបានប្រលែងពួកវាឲ្យស៊ីស្មៅ។ សិស្សក្មេងៗទាំងនោះ ត្រូវបានដាក់នៅអង្គុយដាច់ដោយឡែកៗពីគ្នាតាមតុនីមួយៗ។ លោកគ្រូបានយកជញ្ជាំផ្ទះអ្នកភូមិធ្វើជាក្ដាខៀន គេឃើញមានលោកគ្រូម្នាក់ និង អ្នកគ្រូម្នាក់ បានប្រឹងប្រែងពន្យល់មេរៀនដល់សិស្ស តែពន្យល់មេរៀនផ្សេងៗគ្នា ខណៈកូនសិស្សប្រឹងស្ដាប់ ប្រឹងសរសេរស្ទើរមិនហ៊ានងើបមុខ។
ស្របពេលដែលអ្នកគ្រូព្យាយាមពន្យល់មេរៀននៅលើក្ដាខៀនតូចមួយជាប់នឹងជញ្ជាំងផ្ទះ ដល់សិស្សរបស់គាត់.. លោកគ្រូម្នាក់ដែលដើរពន្យល់មេរៀនដល់សិស្សនៅតាមតុ បានឆ្លៀតឪកាសផ្ដល់ព័ត៏មានដល់កោះសន្តិភាពថា «សិស្សទាំងអស់នេះ ត្រូវបានបែងចែកជា៣ថ្នាក់ គឺមានថ្នាក់ទី១ ទី២ និង ទី៣។ ពិតមែនតែខ្ញុំ រៀបតុឲ្យពួកគេរៀន នៅក្រោមម្លប់ឈើរតែមួយ តែពួកគេរៀនថ្នាក់ផ្សេងគ្នា និងរៀបចំឲ្យអង្គុយដាច់ឆ្ងាយពីគ្នា ដើម្បីងាយស្រូលបង្រៀន»។ គាត់និយាយទៀតថា មិនមែនត្រិមតែរៀបចំឲ្យស្ថិតនៅឆ្ងាយពីគ្នាទេ សូម្បីតែរៀបតុអង្គុយ ក៏មិនឲ្យទល់មុខគ្នាដែរ ព្រោះយើងធ្វើតាមការណែនាំរបស់មន្ទីរអប់រំខេត្ត ដើម្បីការពារមានការឆ្លងនូវជំងឺកូវីដ១៩ថ្មី។
មន្ត្រីការិយាល័យអប់រំយុវជន និង កីឡា ស្រុកបាណន់ ដែលបានចុះត្រូតពិនិត្យការសិក្សាបែបថ្មី ក្នុងសម័យកូវីដ១៩ថ្មីនេះ នៅតាមមូលដ្ឋាន បាននិយាយថា ការបើកបង្រៀនជាបណ្ដោះអាសន្នឡើងវិញ ដែលប្រព្រឹត្តទៅនៅតាមសហគមន៏នេះ គឺយើងអនុវត្តតាមផែនការណែនាំរបស់ក្រសួងអប់រំយុវជននិងកីឡា។ មន្ត្រីរូបនេះបានបញ្ជាក់ថា ពេលនេះ ក្រសួងមិនទាន់អនុញាតឲ្យបើកទ្វារសាលា ដើម្បីបង្រៀនសិស្សទេ តែតម្រូវឲ្យលោកគ្រូ អ្នកគ្រូបើកបង្រៀនសិស្សនៅតាមសហគមន៏ តែត្រូវដាក់តុអង្គុយឲ្យឃ្លាតពីគ្នា ហើយមិនអនុញាតឲ្យសិស្សអង្គុយរៀនលើសពី១០នាក់ឡើយក្នុងមួយថ្នាក់។
យ៉ាងណាក៏ដោយ ស្ថិតក្នុងស្ថានភាពនៃការសិក្សាបែបយុគសម័យ« កូវីដ១៩ថ្មី» សម្រាប់សាលាបឋមសិក្សា«ភ្នំខ្ពស់» នេះ បើតាមការអះអាងរបស់លោកទូច ង៉ុយ នាយកបឋមសិក្សានេះ បានឲ្យដឹងថា ពេលនេះទ្វារសាលាបានបិតស្ងាត់ឈឹង តែសិស្សានុសិស្ស ហាក់មិនខកខានទេ ក្នុងការធ្វើដំណើរទៅរៀននៅតាមសហគមន៏នានា ដែលលោកបានរៀបចំ បើទោះជាការសិក្សានេះ ត្រូវជ្រកក្រោមម្លប់ឈើរ តាមរោងគោ ឬ នៅតាមសំយ៉ាបផ្ទះអ្នកភូមិក្ដី ។
លោកបានបញ្ជាក់ថា សិស្សទាំង៦ថ្នាក់នៅបឋមសិក្សារបស់លោកបានរៀនគ្រប់ៗគ្នា។ ពួកគេបានយកចិត្តទុកដាក់បំផុត ក្នុងការសិក្សាក្រៅសាលានេះ ។ ប៉ុន្តែពួកគេរៀនបានត្រិមរយៈពេល២ម៉ោងប៉ុណ្ណោះក្នុងមួយពេល ។ ព្រោះលោកគ្រូ អ្នកគ្រូ ត្រូវចល័តទៅបង្រៀនសិស្សនៅកន្លែងដទៃទៀតនៅក្នុងសហគមន៍ ៕
ចែករំលែកព័តមាននេះ