ខេត្តក្រចេះ ៖ ពលរដ្ឋប្រុស-ស្រីយ៉ាងហោច៦នាក់ ត្រូវបានអាជ្ញាធរស្រុកចិត្របុរីចាត់ បញ្ជូនមកសង្គ្រោះនៅមន្ទីរពេទ្យបង្អែកខេត្តភ្លាមៗ នៅពេលពួកគាត់បានជួបអាការៈពុលក្អួតចង្អោរ ទន់ដៃ ទន់ជើង ក្រោយពីទទួលទានក្បាលជ្រូកនិងបន្លែផ្សេងទៀត ក្នុងពិធីបែបុណ្យអ្នកតានៅក្នុងភូមិរួចមក ។ ក្រោយពីបញ្ជូនមកសង្គ្រោះនៅមន្ទីរពេទ្យមានរយៈពេលមួយយប់ ពលរដ្ឋរងគ្រោះដោយការពុល ដែលអាជ្ញាធរកំណត់ថា ដោយសារទទួលទានបន្លែមិនស្អាត ត្រូវបានមានសភាពធូរស្រាលវិញ ដោយមិនប៉ះពាល់ដល់អាយុជីវិតនោះទេ។
អភិបាលស្រុកចិត្របុរី លោក យិន វណ្ណៈ បានថ្លែងប្រាប់ឲ្យដឹងថា កាលពីយប់ថ្ងៃទី១៨ ឧសភា ពលរដ្ឋរស់នៅឃុំចង្ក្រង់ ស្រុកចិត្របុរី ពួកគាត់បានធ្វើពីធីបែបន់អ្នកតា ដោយសែនក្បាលជ្រូកដូចតាមទម្លាប់នៅរាល់ពេលពួកគាត់ត្រឡប់ចេញពីព្រៃវិញ ។
ក្រោយការសែនព្រេនរួច ពួកគាត់បាននាំគ្នាទទួលទានក្បាលជ្រូកដែលសែនរួចនោះ ផ្ទាប់ជាមួយបន្លែស្ពៃ ។ បន្ទាប់ពីទទួលទានបានមួយសន្ទុះ មានពលរដ្ឋប្រុស ស្រីចំនួន៦នាក់ បានកើតអការៈក្អួត ចង្អោរ ល្ហិតល្ហៃទន់ដៃជើង ។ ស្ថិតក្នុងស្ថានភាពនេះ អាជ្ញាធរស្រុកចិត្របុរី បានចាត់បញ្ជូនពួកគាត់ទាំងនោះនាំមក សង្គ្រោះនៅមន្ទីរពេទ្យភ្លាមទាំងយប់។
លោកអភិបាលស្រុកបានឲ្យដឹងទៀតថា ជាជំហ៊ានអាជ្ញាធរបានកំណត់ថា ការពុលរបស់ពួកគាត់អាចផ្តើមដោយសារពុលស្រាស ។ តែក្រោយការសាកសួរ ការហូបចុកនាយប់នោះ ពួកគាត់មិនបានទួលទានស្រាស នោះទេ ទើបអាជ្ញាធរកំណត់ថា ការពុលគឺអាចបណ្តាល មកពីការហូបបន្លែដែលមានបាញ់ថ្នាំ ៕
ចែករំលែកព័តមាននេះ