រាជធានីភ្នំពេញ ៖ កម្ពុជានឹងមានភ្លៀងធ្លាក់ហើយរងឥទ្ធិពលផ្គរ រន្ទះ និងខ្យល់កន្ត្រាក់ ចាប់ពីថ្ងៃទី២០ ដល់២៦ ខែឧសភា ឆ្នាំ២០២០ខាងមុខនេះ ។…
រាជធានីភ្នំពេញ ៖ កម្ពុជានឹងមានភ្លៀងធ្លាក់ហើយរងឥទ្ធិពលផ្គរ រន្ទះ និងខ្យល់កន្ត្រាក់ ចាប់ពីថ្ងៃទី២០ ដល់២៦ ខែឧសភា ឆ្នាំ២០២០ខាងមុខនេះ ។ នេះ បើតាមក្រសួងធនធានទឹក និងឧតុនិយម ។
យោងតាមសេចក្តីជូនដំណឹងរបស់ក្រសួងធនធានទឹកចេញផ្សាយ នៅថ្ងៃទី១៩ ឧសភា ស្តីពីស្ថានភាពធាតុអាកាស (ចាប់ពីថ្ងៃទី២០ ដល់ថ្ងៃទី២៦ ខែឧសភា ឆ្នាំ២០២០)បានឲ្យដឹងថា តាមរយៈនៃការប្រែប្រួលជាបន្តបន្ទាប់នៃស្ថានភាពអាកាសធាតុដែលបណ្តាលមកពីជ្រលងសម្ពាធទាបដណ្តប់ និងបក់លើកម្ពុជា គួបផ្សំនឹងខ្យល់មូសុងនិរតីគ្របធ្វើឲ្យចាប់ពីថ្ងៃទី២០-២៦ ខែឧសភាបានធ្វើឲ្យបណ្ដាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមា មានពី ២៥-២៨°C និងសីតុណ្ហភាពអតិបរមា មានពី ៣៧-៣៩°c ។ នឹងអាចមានភ្លៀងធ្លាក់រាយប៉ាយពីតិចទៅបង្គួរ ក្នុងនោះ ផ្នែកខ្លះនៃវាលទំនាបខាងក្រោមនឹងអាចមានភ្លៀងធ្លាក់ច្រើន ។
ចំណែកបណ្ដាខេត្តនៅតំបន់ផ្នូរភ្នំដងរែក និងខ្ពង់រាបឦសាន មានសីតុណ្ហភាពអប្បបរមា មានពី ២៤-២៦°C និងសីតុណ្ហភាពអតិបរមា មានពី ៣៣-៣៨°C ។ នឹងអាចមានភ្លៀងពីតិចទៅមធ្យម ។
ដោយឡែកបណ្ដាខេត្តនៅតំបន់មាត់សមុទ្រមានសីតុណ្ហភាពអប្បបរមា មានពី ២៦-២៨°C និងសីតុណ្ហភាពអតិបរមា មានពី ៣៣-៣៥°C ។ នឹងអាចមានភ្លៀងពីខ្សោយទៅមធ្យម ។
ក្រសួងបានលើកឡើងទៀតថា អាស្រ័យស្ថានភាពធាតុអាកាសដូចបានជម្រាបជូនខាងលើសាធារណជនជ្រាបជាព័ត៌មាន និងសូមប្រុងប្រយ័ត្នចំពោះបាតុភូតផ្គរ រន្ទះនិងខ្យល់កន្ត្រាក់ ដែលអាចកើតមានឡើងជាយថាហេតុ ជាពិសេស បណ្តាខេត្តនៅតំបន់ជួរភ្នំដងរែក និងតំបន់វាលទំនាបកណ្តាល ចាប់ ថ្ងៃទី ២១-២៦ ខែឧសភា៕
ចែករំលែកព័តមាននេះ