រាជធានីភ្នំពេញ៖ គ្រោងការទុច្ចរិតក្លែងបន្លំតាមប្រព័ន្ឋទូរស័ព្ទ ឬហៅ Telephone Scam គឺជាអំពើឬសកម្មភាពក្នុងការស្វែងរកព័ត៌មានពីអ្នកប្រើប្រាស់សេវាទូរគមនាគមន៍តាមរយៈទូរស័ព្ទ ឬ បញ្ជូនសា ឬ ស្រាវជ្រាវតាមដានតាមបណ្តាញសង្គមនិងបណ្តាញ OTT នានា ដើម្បីធ្វើការបោកប្រាស់កេងបន្លំផលប្រយោជន៍ពីអ្នកប្រើប្រាស់សេវាទូរគមនាគមន៍ ។ នេះបើយោងតាមអ្នកជំនាញនៃនិយ័តករទូរគមនាគមន៍កម្ពុជា។
បើតាមអ្នកជំនាញនិងជាមន្ត្រីអ្នកនាំពាក្យនៃនិយ័តករទូរគមនាគមន៍កម្ពុជា គ្រោងការទុច្ចរិតក្លែងបន្លំតាមប្រព័ន្ឋទូរស័ព្ទ ឬហៅ Telephone Scam វាខុសគ្នាបន្តិចនឹង បទល្មើសបច្ចេកវិទ្យា ឬ Cyber Crime ត្រង់ថា បទល្មើសបច្ចេកវិទ្យា ឬ Cyber Crime ជាសកម្មភាពឬប្រតិបត្តិវាយលុកលួចទាញយកព័ត៌មាន វាយលុកចូលកំទេចព័ត៌មាន ឬ វាយលុកចូលបិទឬលួចកាន់កាប់គេហទំព័រ ឬគណនីបណ្តាញសង្គមឬសេវា OTT ណាមួយ តាមរយៈកម្មវិធីព័ត៌មានវិទ្យាពិសេស ក្នុងបំណងអនុវត្តសកម្មភាពឧក្រឹដ្ឋកម្ម និងបំផ្លាញសណ្តាប់ធ្នាប់សង្គមឬសន្តិសុខសាធារណៈ និងសន្តិសុខជាតិ ។
តើអ្វីទៅជាគ្រោងការទុច្ចរិតក្លែងបន្លំតាមប្រព័ន្ធទូរស័ព្ទកំពុងកើតមាននៅកម្ពុជានោះ
លោក អ៊ឹម វុត្ថា មន្ត្រីអ្នកនាំពាក្យនៃនិយ័តករទូរគមនាគមន៍កម្ពុជាគូសបញ្ជាក់ថា «នៅកម្ពុជាយើង«គ្រោងការទុច្ចរិតក្លែងបន្លំតាមប្រព័ន្ឋទូរស័ព្ទ ឬហៅ Telephone Scam»ដែលកំពុងតែកើតមានឡើង៖១)- មានការក្លែងបន្លំទូរស័ព្ទមកជនណាម្នាក់ថាមានបងប្អូនឬមានសាច់ញាតិគ្រោះថ្នាក់ចរាចរណ៍បើកឡានឬទោចចក្រយានយន្តប៉ះពារគេ ត្រូវដោះស្រាយសងសំណង ហើយគេធានាជួយអន្តរាគមន៍ឱ្យៗតែជនទទួលទូរស័ព្ទវេលុយតាមប្រព័ន្ធផ្ទេរលុយណាមួយទៅឱ្យគេចឹងទៅ។ ២)- ករណីមានជនម្នាក់មានលុយដាក់ផ្ញើនៅក្នុងគណនីធនាគារណាមួយចឹង ហើយជនខិលខូចនោះ ស្រាវជ្រាវរកលេខជននោះ ហើយប្រាប់ថាគេជាបុគ្គលិកធនាគារដែលយើងដាក់ប្រាក់មានបំណងចង់រៀបចំគណនីឬធ្វើអ្វីមួយតាមជំនាញធនាគារ ដោយត្រូវការព័ត៌មានសំខាន់ៗពីជននោះ ហើយនៅពេលយើងប្រាប់អស់ទៅ ជនខិលខូចហ្នឹងគេនឹងទាញយកលុយយើងចេញពីធនាគារអស់ទៅ។
លោកបានបន្តថា ចំណុចបន្ទាប់គឺ ទី ៣)- ឬតាំងខ្លួនស្គាល់ថ្នាក់ដឹកនាំរបស់យើង មកថានេះថានោះ ជាផលមិនល្អសម្រាប់យើង ឬ ចង់ឱ្យឡើងដំណែង ដែលតម្រូវឱ្យលុយទៅគេ។
៤)- បណ្តាប្រតិបត្តិករទូរស័ព្ទនៅបណ្តាប្រទេសនៅលើកោះ តូចៗ ដែលមិនសូវមានអ្នកណាទូរស័ព្ទទៅ ហើយទូរស័ព្ទទៅមានតម្លៃថ្លៃជាងប្រទេសដទៃ។ ពេលនោះប្រតិបត្តិករហ្នឹងធ្វើការស៊ីញ៉ូមួយខ្វាច់ រួមយើងអ្នកទទួល នៅកម្ពុជានេះ ស្មានថាបងប្អូនឬសាច់ញាតិឬដៃគូជំនួញទូរស័ព្ទមក ក៏ទូរស័ព្ទទៅវិញពេលនោះ មិនមានអ្នកណានិយាយរកយើងទេ ឬនិយាយដែលមានលក្ខណៈទាក់ទាញយើងឱ្យនិយាយក្នុងរយៈពេលមួយ ៥នាទី ទៅ ១០នាទី អីចឹង ពេលនោះយើងអ្នកហៅទៅគេ គឺត្រូវគិតលុយឱ្យទៅប្រតិបត្តិករក្នុងស្រុកដែលយើងប្រើ ហើយប្រតិបត្តិករក្នុងស្រុកយើងបង់ថ្លៃឱ្យទៅប្រតិបត្តិករប្រទេសនោះជាលក្ខណៈសេវារ៉ូម៉ីងអន្តរជាតិ។ ៥)- មានគេតាំងខ្លួនជាតំណាងក្រុមហ៊ុនឆ្នោត ឬ តំណាងក្រុមហ៊ុនផលិតផលណាមួយ ទូរស័ព្ទមកយើងថាយើងមានត្រូវរង្វាន់អីចឹង ហើយបើចង់បានរង្វាន់នោះត្រូវតែវេលុយមកឱ្យគេខ្លះទៅ ដើម្បីគេជួយពន្លឿននិងយកទៅជូនតែម្តងដល់ផ្ទះអីចឹងទៅ។ ៦)- ករណីខ្លះទៀត មានផ្ញើសារថាយើងត្រូវរង្វាន់បរទេសឬគេចង់ចងយើងជាមិត្ត គេចង់ផ្ញើអីមកឱ្យ តែមកដល់ហើយ ត្រូវការថ្លៃបង់សេវា។ល។ ឱ្យយើងវេលុយឱ្យទៅគេអីចឹងទៅ។
លោកក៏បានបញ្ជាក់បន្ថែមថា ចំណុចទី ៧)- មានករណីមួយទៀត គេភ្ជាប់បណ្តាញ SIMBOX តាមស៊ីមទូរស័ព្ទ ឬតាមអាយភី ដើម្បីធ្វើជាបណ្តាញទំនាក់ទំនងក្រៅប្រព័ន្ធគ្រប់គ្រងរបស់យើង ទៅប្រើប្រាស់ចាប់ជម្រឹតទារប្រាក់ជាដើម។ ៨)- បញ្ជូនសារមកយើងក្នុងគោលដៅបោកបញ្ឆោត ថានឹងបញ្ជូនរបស់មកឱ្យ ថានឹងរៀបចំយើងឱ្យទៅនៅបរទេស ហើយតម្រូវឱ្យយើងបំពេញឯកសារអនឡាញ ដែលគេអាចទាញយកព័ត៌មានពីយើង ក្នុងបំណង់បោកប្រាស់។ល។
លោកបន្តថា «ដើម្បីទប់ស្កាត់អំពើនិងសកម្មភាពទាំងនេះ គឺគ្មានអ្វីក្រៅពី៖ ទី១)- អ្នកប្រើប្រាស់សេវាទូរស័ព្ទឬសេវាទូរគមនាគមន៍ ត្រូវផ្តល់ការសហការអ្នក ផ្តល់សេវាដោយផ្តល់អត្តសញ្ញាណសំគាល់របស់ខ្លួននៅពេលជួលជាវសេវា។ ទី២)-មិនត្រូវជឿជាក់ពេកទេទៅលើរឿងអភូតហេតុធ្លាក់មកពីលើមេឃ ដូចជាត្រូវរង្វាន់ និង ផ្តល់ព័ត៌មានរបស់ខ្លួនទៅឱ្យជនមិនស្គាល់អត្តសញ្ញាណ។ ទី៣)- ប្រើប្រាស់កម្មវិធីនៅក្នុងទូរស័ព្ទដៃឬកុំព្យូទ័រ ត្រូវស្ទាត់ជំនាញនិងមានវិធីការពារសុវត្ថិភាពឱ្យបានត្រឹមត្រូវ បើខ្លួនមិនចេះគួសួរគេឯងជាអ្នកជំនាញដើម្បីជួយយើងនិងទី៤)-មានបញ្ហាត្រូវប្តឹងទៅអាជ្ញាធរសមត្ថកិច្ចមូលដ្ឋានដែលនៅជិតអ្នក និង សហការជាមួយអាជ្ញាធរមានសមត្ថកិច្ចឱ្យល្អ»។
លោកលើកឡើងថា ក្នុងកិច្ចការទប់ស្កាត់បញ្ហានេះ កន្លងមក ក្រសួងប្រៃសណីយ៍និងទូរគមនាគមន៍ ក៏ដូចជានិយ័តករទូរគមនាគមន៍កម្ពុជា បានរួមចំណែកជាមួយអាជ្ញាធរមានសមត្ថកិច្ច ជាពិសេសក្រសួងមហាផ្ទៃ៖ទី១)-មានយន្តការច្បាប់ និង បទប្បញ្ញត្តិជាធរមានដូចជាបានសហការជាមួយក្រសួងមហាផ្ទៃ ចេញសារាចរណ៍ណែនាំអន្តរក្រសួងមួយមានលេខ ០០១ សរ.មផ.បទ ចុះថ្ងៃទី២៨ខែកុម្ភៈឆ្នាំ២០១២ ស្តីពីការគ្រប់គ្រង ការធ្វើអាជីវកម្ម និងការប្រើប្រាស់សេវាកម្មទូរគមនាគមន៍ ដើម្បីឱ្យប្រតិបត្តិករផ្តល់សេវាទូរគមនាគមន៍ និង ដេប៉ូចែកចាយសេវាទូរគមនាគមន៍អនុវត្តឱ្យបានត្រឹមត្រូវ។
មានច្បាប់ស្តីពីទូរគមនាគមន៍ ដែលបានដាក់ឱ្យប្រើប្រាស់នៅចុងឆ្នាំ២០១៥ ដែលជាបទប្បញ្ញត្តិកំពូលក្នុងការតម្រូវឱ្យប្រតិបត្តិករទូរគមនាគមន៍អនុវត្ត និងសហការជាមួយរាជរដ្ឋាភិបាលក្នុងចាត់វិធានការផ្សេងៗដែលជាបទល្មើស និង បង្គាប់ឱ្យប្រតិបត្តិករទូរគមនាគមន៍ សហការឱ្យបានល្អលើបញ្ហានេះ ជាមួយអាជ្ញាធរមានសមត្ថកិច្ច។ ទី២)-យន្តការចាត់វិធានការ៖គ្មានអ្វីពីសហការជាមួយអគ្គស្នងការនគរបាលជាតិ នៃក្រសួងមហាផ្ទៃ ក្នុងការចាត់វិធានការលើបញ្ហានេះ និង បញ្ជ្រៀបការយល់ដឹងពីសីលធម៌សង្គម និង ចំណេះដឹងខាងបច្ចេកទេសព័ត៌មានវិទ្យានិងទូរគមនាគមន៍ តាមរយៈបណ្តាញសារព័ត៌មាន បណ្តាញផ្សព្វផ្សាយដទៃទៀត និង ស្ថាប័នអប់រំពាក់ព័ន្ធ។
បើតាមលោក អ៊ឹម វុត្ថា វិធានការមានប្រសិទ្ឋិភាពសំរាប់ការទប់ស្កាត់បញ្ហានេះ ទាមទារឲ្យមានស្ថាប័នជំនាញ ទី១)- ប្រជារាស្ត្រខ្លួនឯង, ទី២)- អាជ្ញាធរមានសមត្ថកិច្ចតាមមូលដ្ឋាន, ទី៣)- អគ្គស្នងការនគរបាលជាតិ នៃក្រសួងមហាផ្ទៃ, ទី៣)- អគ្គាធិការដ្ឋាននៃក្រសួងប្រៃសណីយ៍និងទូរគមនាគមន៍, ទី៤)- ប្រតិបត្តិករទូរគមនាគមន៍, ទី៥)- ស្ថាប័នតុលាការ ទី៦)- ត្រូវមានច្បាប់ និងបទប្បញ្ញត្តិឱ្យបានច្បាស់លាស់៕
ចែករំលែកព័តមាននេះ