ខេត្តកំពង់ស្ពឺ ៖ គ្រាន់តែទាស់សម្តីជាមួយប្រពន្ធបន្តិចបន្តួច បុរសម្នាក់បានវេចបង្វេចទៅផ្ទះម្ដាយព្រោះតែចង់ឲ្យប្រពន្ធតាមអង្វរខ្លួនឲ្យត្រឡប់មកផ្ទះវិញ ។ ពេលទៅដល់ផ្ទះម្តាយ សាច់ញាតិបងប្អូនបានបបួលផឹកស៊ីរហូតស្រវឹងស្រឿងៗ ស្រាប់តែប្រពន្ធទូរស័ព្ទអង្វរឲ្យត្រឡប់ទៅផ្ទះវិញ បុរសរូបនេះក៏ជិះម៉ូតូទៅវិញទាំងសប្បាយចិត្ត ។ ប៉ុន្តែជាចៃដន្យ ពេលទៅដល់ពាក់កណ្ដាលផ្លូវក៏ដួលម៉ូតូ បណ្ដាលឲ្យបែកក្បាល និងរលាត់ដៃជើង ហើយត្រូវបានក្រុមគ្រួសារដឹកបញ្ជូនទៅមន្ទីរពេទ្យ ។
ករណីនេះកើតឡើងកាលពីវេលាម៉ោង ប្រមាណ៦និង៣០នាទីល្ងាចថ្ងៃទី១៧ ខែឧសភា ឆ្នាំ ២០២០ នៅតាមផ្លូវលំក្នុងភូមិក្រាំងត្រឡាច ឃុំស្គុះ ស្រុកសំរោងទង ។ បុរសរូបនេះឈ្មោះម៉ាប់ រតនៈ អាយុ៣៧ឆ្នាំ មានទីលំនៅក្នុងភូមិឃុំ ខាងលើ ។
បើតាមប្រពន្ធនិយាយថា នារសៀលថ្ងៃនោះរូបគាត់និងប្ដីបានទាស់សម្តីគ្នាបន្តិចបន្តួចនៅក្នុង
រង្វង់គ្រួសារ ស្រាប់តែប្តីខឹងច្រឡោតតោតតូងនិងបានវេចបង្វេចទៅនៅផ្ទះម្ដាយដែលនៅក្នុងភូមិជាមួយគ្នានេះដែរបាត់ទៅ ។
ចំណែកបុរសជាប្តីវិញនិយាយថា ពេលខឹងប្រពន្ធនោះខ្លួនក៏វេចបង្វេចខោអាវទៅផ្ទះម្ដាយនៅឯចុងភូមិប្រាកដមែន ។ នៅពេលទៅដល់បងប្អូនបានបបួលផឹកស្រាបៀររហូតដល់ស្រវឹងស្រឿងៗ ស្រាប់តែប្រពន្ធទូរស័ព្ទអង្វរឲ្យត្រឡប់ទៅផ្ទះវិញ គាត់ក៏ចិត្តទន់ហើយជិះម៉ូតូទាំងស្រវឹងទៅផ្ទះវិញ។
ជាអកុសលពេលទៅដល់ពាក់កណ្ដាលផ្លូវ ស្រាប់តែងងឹតមុខដួលម៉ូតូបណ្ដាលឲ្យបោកក្បាលសន្លប់តែម្ដង លុះពេលដឹងខ្លួនវិញគឺនៅក្នុងមន្ទីរពេទ្យបាត់ទៅហើយ ។ ជាមួយនេះ ឃើញប្រពន្ធនៅជិត ធ្វើឲ្យគាត់សប្បាយចិត្តយ៉ាងខ្លាំង ។ នៅព្រឹកថ្ងៃទី១៨ ខែឧសភា រូបគាត់និងប្រពន្ធបានសុំគ្រូពេទ្យត្រឡប់ទៅព្យាបាលរបួសបន្តនៅឯផ្ទះវិញ ដើម្បីឱ្យប្រពន្ធមើលថែឆាប់ជាសះស្បើយ៕ (កែសម្រួលដោយ ៖ បុប្ផា)
ចែករំលែកព័តមាននេះ