រាជធានីភ្នំពេញ ៖ អគ្គលេខាធិការសហព័ន្ធស្រូវអង្ករកម្ពុជាបានឱ្យដឹងថា ការប្រកួតប្រែជែងរបស់កម្ពុជា ក្នុងវិស័យស្រូវអង្ករ ឬផលិតស្រូវអង្ករនេះ បើពាក់ព័ន្ធកត្តាពូជស្រូវ និងគុណភាពគឺកម្ពុជាឈ្នះគេ ប៉ុន្តែកត្តាផលិតកម្ម គឺនៅចាញ់គេដោយសារតម្លៃផលិតកម្ម គឺនៅថ្លៃពិសេសថ្លៃផលិត ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាមានប្រសាសន៍ថា «បញ្ហាធំបំផុតរបស់យើង គឺថ្លៃភ្លើងអគ្គិសនីដែលជាកត្តាចម្បងរបស់យើង បើប្រៀបធៀបទៅ និងបណ្តាប្រទេសជិតខាង ឬនៅក្នុងតំបន់ គឺថ្លៃអគ្គិសនីនៅយើងខ្ពស់ឆ្ងាយ ។ លើសពីនេះគុណភាពនៃការផ្គត់ផ្គង់ភ្លើងអគ្គិសនីនៅមានបញ្ហាច្រើន ហើយការដឹកជញ្ជូននៅមានតម្លៃថ្លៃ» ។
តាមលោកអគ្គលេខាធិការសហព័ន្ធស្រូវអង្ករកម្ពុជាវិស័យស្រូវអង្ករកម្ពុជាទទួលបានការសម្របសម្រួលពាណិជ្ជកម្មរបស់ក្រសួងពាណិជ្ជកម្ម និងក្រសួងពាក់ព័ន្ធជួយជ្រោមជ្រែងច្រើន ហើយផ្តល់អាទិភាពដល់វិស័យស្រូវអង្ករនេះមុនគេ ។
យោងតាមសហព័ន្ធស្រូវអង្ករកម្ពុជាថ្មីៗនេះ ក្រសួងពាណិជ្ជកម្មបានរៀបចំកិច្ចប្រជុំពិភាក្សាលើរបាយការណ៍សិក្សាអំពីថ្លៃដើមផលិតកម្ម និងនាំចេញអង្ករកម្ពុជា ហើយគម្រោងសិក្សាថ្លៃដើមផលិតកម្ម និងនាំចេញអង្ករកម្ពុជានេះ ត្រូវបានស្នើឡើងដោយក្រសួងពាណិជ្ជកម្ម ក្រោមកិច្ចសហការ និងគាំទ្រផ្នែកបច្ចេកទេស និងហិរញ្ញវត្ថុពីអង្គការ «កម្មវិធីខ្សែច្រវ៉ាក់តម្លៃកសិកម្មកម្ពុជា» ឬកាវ៉ាក់ (CAVAC) ដែលគម្រោងនេះមានបំណងរកឱ្យឃើញពីបញ្ហាប្រឈមឧត្តមភាព ឬលទ្ធភាពពង្រឹងភាពប្រកួតប្រជែងបច្ចុប្បន្នរបស់វិស័យស្រូវ-អង្ករកម្ពុជា ។
ការសិក្សាបានផ្តោតសំខាន់លើភាពប្រកួតប្រជែងវិស័យស្រូវ-អង្ករកម្ពុជាដោយវិភាគលើខ្សែច្រវ៉ាក់តម្លៃរបស់វិស័យស្រូវ-អង្ករ ចាប់តាំងពីការបង្កបង្កើនផល ការសម្ងួត និងកិនរហូតដល់ការនាំចេញដែលរួមទាំងការដឹកជញ្ជូន និងការរត់ការឯកសារ សម្រាប់ការនាំចេញទៅកាន់ប្រទេសគោលដៅ (នាំចូល) នៅសហភាពអឺរ៉ុប និងបណ្តាប្រទេសផ្សេងទៀត។
របាយការណ៍នៃលទ្ធផលសិក្សានេះ នឹងផ្សព្វផ្សាយជូនវិស័យឯកជន និងបណ្តាក្រសួងស្ថាប័នពាក់ព័ន្ធ សំដៅដាក់ចេញផែនការ និងគោលនយោបាយអភិវឌ្ឍន៍វិស័យស្រូវ-អង្ករកម្ពុជា និងឈានទៅចាប់យកទីផ្សារអង្ករក្រៅប្រទេស។
បើតាមសហព័ន្ធស្រូវអង្ករកម្ពុជាគូសបញ្ជាក់ថា«ការពិភាក្សាផ្តោតលើផ្នែកពាក់ព័ន្ធសំខាន់ៗដែលប៉ះពាល់ដល់តម្លៃនាំចេញអង្ករកម្ពុជា រួមមាន៖ អគ្គិសនី ដឹកជញ្ជូនពីឃ្លាំងទៅកំពង់ផែ ថ្លៃចំណាយនៅកំពង់ផែ ចំណាយលើការនាំចេញ ថ្លៃដឹកជញ្ជូនពីកំពង់ផែទៅប្រទេសគោលដៅ (នាំចូល) និងចំណាយពាក់ព័ន្ធផ្សេងៗទៀត»៕
ចែករំលែកព័តមាននេះ