ខេត្តកំពត ៖ ប្រជាពលរដ្ឋជាច្រើនគ្រួសារ នៅភូមិដំណាក់ក្រឡាញ់ ឃុំភ្នំប្រាសាទ ស្រុកកំពង់ត្រាច កាលពីព្រឹកថ្ងៃទី9 ខែឧសភា បានមកជួបជុំគ្នានៅមុខផ្លូវចូលវត្តដូនកែវជាប់នឹងស្ពានធំ ត្រង់ចំណុចបុគ្គលម្នាក់បានចាក់ដីលប់បឹងរំលោភយកដីសាធារណជាដីរបស់រដ្ឋ។
បើតាមការអោយដឹងពីលោកហ៊ុន ចិន្ដា ភេទប្រុស អាយុ39ឆ្នាំ បាននិយាយប្រាប់ថា ប្រជាពលរដ្ឋជាង200គ្រួសារ បានផ្ដិតមេដៃមិនគាំទ្របុគ្គលម្នាក់បានចាក់ដីរំលោភយកដីបឺងទេ។ លោកបាននិយាយប្រាប់ថា ទំហំដីដែលបុគ្គលម្នាក់បានចាក់ដីលប់បឹងរំលោភយកដីរបស់រដ្ឋនោះមានប្រហៃល2000ម៉ែត្រការ៉េតែប៉ុណ្ណោះ ព្រោះដីបឹងនេះជាប់នឹងផ្លូវលេខ117ផង ពីកំពង់ត្រាចទៅកាន់ច្រកទ្វារទ្វេភាគីតន់ហន់។
លោកនិយាយប្រាប់ថា ពេលដែលចាក់ដីដំបូងពលរដ្ឋ និងអាជ្ញាធរមូលដ្ឋានបានមកឃាត់ដែរ តែក្រោយមកប្រើរូបភាពផ្សេង គឺឱ្យព្រះសង្ឃវត្តដូនកែវ ចាំហែកបណ្ណ័ឱ្យរថយន្តដឹកដីបញ្ជាក់ថា ដីត្រង់ចំណុចនេះជាដីរបស់វត្ត ហើយម្យ៉ាងទៀតដីត្រង់ចំណុចនេះក៏ជាទីកន្លែងពលរដ្ឋធ្វើពីធីប្រណាំងទូកដែរ។ តែក្រោយពីចាក់ដីពេញរួចរាល់ ស្រាប់តែមានម្ដាយក្មេកមន្ត្រីសាលាស្រុកកំពង់ត្រាច មកដាំបង្គោលរបង ទើបមានការភ្ញាក់ផ្អើល។
លោកហ៊ុន ចិន្តា និយាយថា ការទាមទារបស់ពលរដ្ឋអោយអាជ្ញាធរពិនិត្យ និងដកបង្គោលរបងនោះចេញវិញ ទុកជាដីសម្បត្តិរដ្ឋវិញ។
ពលរដ្ឋម្នាក់ទៀតឈ្មោះឯក យន់ ភេទប្រុស អាយុ78ឆ្នាំ និយាយថា ដីនេះដំបូងឡើយថាព្រះសង្ឃជាអ្នកចេញមុខចាក់ដី តែក្រោយមកស្រាប់តែឃើញគេបោះបង្គោលរបង ទើបម្នាក់ៗបានភ្ញាក់ផ្អើលរឿងអ្នកចាក់ដីរំលោភយកដីរដ្ឋ។
លោកជួន សុភា អភិបាលរងស្រុកកំពង់ត្រាច ក៏មានវត្តមានកន្លែងពលរដ្ឋមកជួបជុំគ្នានោះដែរ។ ហើយលោកជួន សុភា បាននិយាយថា អាជ្ញាធរស្រុកគ្រាន់តែចុះមកពិនិត្យជាក់ស្ដែងទេ ប៉ុន្តែអ្វីសំខាន់ឱ្យជំនាញពិនិត្យឯកសារ តើម្ចាស់ដីគាត់មានអីខ្លះជាទីអាង? តែបើគាត់មិនមានអ្វីជាឯកសារជាផ្លូវការ ហើយយើងនិងដកដីនោះមកទុកជាសម្បត្តិរដ្ឋវិញ ចំណែកបង្គោលរបងដែលបោះពទ្ធ័ដីនោះ ក៏ត្រូវបានដកចោលទៅវិញដែរ។
ទោះជាបែបណាក៏ដោយ ពលរដ្ឋចាំមើលថា តើអាជា្ញធរស្រុកហ៊ានធ្វើតាមពាក្យសន្យាដែរឬក៏អាចអូសបន្លាយយូរ?
ចែករំលែកព័តមាននេះ