ខេត្តកំពត ៖ រូបភាពនេះប្រហែលជាគ្រប់គ្នាធ្លាប់ឃើញ ដោយចៃដន្យពេលណាមួយឬក៏ធ្លាប់ឃើញតាមរយៈទូរទស្សន៍ឯកសារនានា គឺពស់តុកកែចាប់តុកកែស៊ីថ្លើម ។ តាមវេចនានុក្រមសម្តេចព្រះសង្ឃរាជ ជួន ណាត ថា…
ខេត្តកំពត ៖ រូបភាពនេះប្រហែលជាគ្រប់គ្នាធ្លាប់ឃើញ ដោយចៃដន្យពេលណាមួយឬក៏ធ្លាប់ឃើញតាមរយៈទូរទស្សន៍ឯកសារនានា គឺពស់តុកកែចាប់តុកកែស៊ីថ្លើម ។ តាមវេចនានុក្រមសម្តេចព្រះសង្ឃរាជ ជួន ណាត ថា តឹកកែ ឬតុកកែ ជាពពួកសត្វអំបូរពួកជីងចក់ តែធំជាងជីងចក់ មានសម្បុរផ្ជុចៗ មានជើងស្អិត គឺចាប់ត្រង់ណាជាប់ត្រង់នោះ យំឮ «តុក កែៗ» ។
ចំណែកពស់មួយប្រភេទមានមាឌតូចរៀវ សម្បុរបៃតង ដែលជួនកាលគេឃើញលូនឡើងនៅក្រោមដំបូលផ្ទះ កាលបើតុកកែឃើញតែងតែហាមាត់ធំដើម្បីបើកឱកាសឱ្យពស់នេះចូលស៊ីថ្លើម ។ សម្រាប់អ្នកឃើញពិតជាទប់អារម្មណ៍អាណិតតុកកែមិនបានឡើយ ហើយតុកកែនៅតែរស់ ប៉ុន្តែចាប់ពីពេលនោះមកគេលែងឮតុកកែយំទៀតហើយ រហូតដល់ថ្លើមវាធំឡើងវិញទើបយំ ហើយពស់ពណ៌បៃតងនោះក៏មកស៊ីថ្លើមទៀត ។ ដោយសារតែដំណើរជីវិតសត្វទាំង២នេះតែងផ្សារភ្ជាប់គ្នាបែបនេះហើយទើបគេហៅពស់ថា ពស់តុកកែ ។
ពេលនេះមិនខុសពីដំណើរជីវិតខាងលើនេះទេ ខណៈគេឃើញពស់និងតុកកែហាក់បានវាយប្រយុទ្ធគ្នាអស់រយៈពេលច្រើនម៉ោងនៅក្នុងគំនរឥដ្ឋចាស់ៗ កាលពីវេលាម៉ោង៣រសៀលថ្ងៃទី៦ឧសភា នៅផ្ទះចាស់មួយកន្លែង ស្ថិតនៅភូមិដើមចំរៀក ឃុំស្ដេចគង់ខាងលិច ស្រុកបន្ទាយមាសខេត្តកំពត ។
បើតាមការសន្និដ្ឋានជំហានដំបូងរឿងរ៉ាវសត្វទាំងពីដែលកើតជម្លោះស៊ីសាច់ងាប់រស់នេះ គឺពស់នេះទៅរកសុីថ្លើមតុកកែជាអាហារ ។ ក្រោយពីចាប់តុកកែមិនបានសម្រេចដោយតុកកែបែរជាខាំពស់ជាប់ស្អិតដូចស្ករតាំងម៉ែ ។ តាមការពិនិត្យមើល តុកកែពិតជាបានខាំពស់មិនលែងទេ គឺខាំត្រូវជាច្រើនកន្លែងទាល់តែពស់លូនលែងចង់រួច ។
ការប្រយុទ្ធគ្នារវាងសត្វតុកកែនិងពស់មួយក្បាលនេះពិតជាក្រាញននៀលមែនទែន មិនឃើញអ្នកឈ្នះអ្នកចាញ់ទេ ។ ទីបំផុតត្រូវបានអ្នកភូមិទ្រាំមើលលែងបានក៏ជួយបន្ថយភាពតានតឹង ឱ្យពួកគេលែងប្រយុទ្ធគ្នាពស់ក៏លូនចេញតុកកែវាឡើងទៅលើផ្ទះវិញ ចែកផ្លូវគ្នារៀងៗខ្លួនទៅ ។បានកត់សម្គាល់ថា កាលពីឆ្នាំ២០១០កន្លងមកការប្រយុទ្ធគ្នារវាងពស់និងសត្វតុកកែ បានក្លាយជាជំនឿប្រផ្នូលអាក្រក់ដោយអ្នកស្រុកជាច្រើននាក់ក្នុងខេត្តអ៊ូដនឌីត នៅប្រទេសថៃបានចោមរោមមើលហេតុការណ៍ពស់ខៀវ១ក្បាល (ពស់តុកកែ) មានទំហំប៉ុនចង្អុលដៃប្រវែង៤០សង្ទីម៉ែត្រ កំពុងរឹតតុកកែដែលមានប្រវែង១៥សង្ទីម៉ែត្រ ដើម្បីស៊ីថ្លើមទៅតាមទម្លាប់នៃសភាវៈរបស់សត្វទាំង២ ។ ប៉ុន្តែបែរជាតុកកែ មិនព្រមឱ្យពស់ស៊ីថ្លើមក៏បានប្រយុទ្ធជាមួយពស់ទៅវិញ ។
ការប្រយុទ្ធគ្នារវាងពស់ខៀវ និងតុកកែបានកន្លងផុតជាងកន្លះម៉ោង តុកកែក៏មានលក្ខណៈទន់ជ្រាយ ដោយការរឹបរឹតរបស់ពស់ ធ្វើឱ្យអ្នកស្រុកមានការភ្ញាក់ផ្អើល ព្រោះពស់មានឥរិយាបថលេបតុកកែទាំងមូល ប៉ុន្តែជាចុងក្រោយពស់ខៀវមិនអាចលេបតុកកែបាន ក៏យល់ព្រមបន្ធូរបន្ថយការរឹតខ្លួន ។ ស្របពេលជាមួយគ្នានេះដែរ តុកកែក៏យល់ព្រមចុះចាញ់ ដោយហាមាត់ឱ្យពស់ខៀវលូនចូលទៅស៊ីថ្លើមតាមសំរួល ។ ក្នុងខណៈពេលដែលពស់ស៊ីថ្លើមរួច ពួកវាទាំង២ក្បាលក៏បំបែកផ្លូវគ្នារៀងៗ ខ្លួនដោយគ្មានរបួស ។
ជាធម្មតា ហេតុការណ៍បែបនេះ មនុស្សគ្រប់គ្នាកម្របានឃើញណាស់ ៕ (កែសម្រួលដោយ ៖ បុប្ផា)
ចែករំលែកព័តមាននេះ