ខេត្តពោធិ៍សាត់ ៖ រមណីយដ្ឋានទឹកធ្លាក់ច្រកល្អៀង ជាមរណីយដ្ឋានធម្មជាតិមួយដ៏ស្រស់ត្រកាល ដែលមានទីតាំងបង្កប់នៅកណ្តាលព្រៃជ្រៅ ស្ថិតក្នុងឃុំឈើតុំ ស្រុកក្រគរ ចំងាយ៧៣គីឡូម៉ែត្រ ភាគខាងត្បូងឆៀងខាងកើតទីប្រជុំជនខេត្តពោធិ៍សាត់ ឬ៤១គីឡូម៉ែត្រ ពីផ្លូវជាតិលេខ៥ទីរួមស្រុកក្រគរ ។ គេប្រើពេលមួយម៉ោងកន្លះដោយរថយន្ត Pick Up បើម៉ូតូពីរម៉ោង ទើបទៅដល់រមណីយដ្ឋានសំបូរទេសភាពនេះ ។ រមណីយដ្ឋានធម្មជាតិទឹកធ្លាក់ច្រកល្អៀងលំអដោយទឹកធ្លាក់កំពស់៧ម៉ែត្រ ព្រៃឈើធម្មជាតិនៅគង់វង្សចំរុះពណ៌ខៀវស្រងាត់គួរជាទីគយគន់ ។
ល្បាក់ទឹកធ្លាក់បោកលើផ្ទាំងថ្មតូចធំបែកខ្ចាយសសំពោងជាប់រហូតទាំងប្រាំង និងវស្សា ដែលទីនោះអ្នកទេសចរអាចងូតទឹក ហែលរអិលខ្លួនលេងតាមចន្លោះផ្ទាំងថ្មដែលមានទឹកថ្លាដូចកញ្ចក់ត្រជាក់ស្រេប (ស្រេង) មើលឃើញមច្ឆា ។ ទន្ទឹមនឹងនេះ ដើមឈើធំៗ មែកសាខាគ្របមកលើផ្ទាំងថ្មប្រមមាត់ទឹកបានជាម្លប់ដ៏ត្រឈឹងត្រឈៃសំរាប់ភ្ញៀវទេសចរចងអង្រឹង ឬក្រាលកន្ទេលជ្រកកំសាន្តហូបបាយជុំគ្នាយ៉ាងសប្បាយរីករាយ ។ មុនពេលចុះងូតទឹក ឬឡើងពីទឹកវិញហូបបាយជុំគ្នាជាលក្ខណៈគ្រួសារ ឬមិត្តភក្តិដែលមានភេសជ្ជៈទឹក្រូច ឬស្រាបៀរក្លាស្សេត្រជាក់ជាមួយនឹងម្ហូបមាន់ដុត ផ្អកចំហុយ ប្រហុកអាំងចុចបន្លែអន្លក់យ៉ាងឈ្ងុយឆ្ងាញ់ពិសា លាយឡំនឹងសំណើចក្អាកក្អាយយ៉ាងសប្បាយរីករាយ ។
លោកញ៉ូវ សុង ប្រធានមន្ទីរទេសចរខេត្តបានជំរាបជូនថា រមណីយដ្ឋានទឹកធ្លាក់ច្រកល្អៀង គឺជាមរណីយដ្ឋានល្អជាងគេក្នុងចំណោមរមណីយដ្ឋានធម្មជាតិទាំងអស់ក្នុងខេត្តពោធិ៍សាត់ ព្រោះទីនោះមានទឹកធ្លាក់កំពស់៧ម៉ែត្រ ហូរលក្ខណៈដូចស្ទឹងបានជាកន្លែងធំទូលាយ សំរាប់ភ្ញៀវទេសចរងូតទឹកលេងកំសាន្ត មានផ្ទាំងថ្មបន្តុបលើគ្នាដូចក្បាច់ចំលាក់ មានព្រៃភ្នំអមសងខាងត្រជាក់ត្រឈឹងត្រឈៃ ។ មកដល់ពេលនេះយើងបានកសាងស្ពាន កាំជណ្តើរ ចំណតរថយន្ត បង្គន់អនាម័យ ធុងសំរាម រានអង្គុយលេង ស្លាកសញ្ញាណែនាំផ្សេងៗ ព្រមទាំងបានសហការជាមួយអាជ្ញាធរមូលដ្ឋានការពារសុវត្ថិភាពជូនភ្ញៀវទៅលេងកំសាន្តទៀតផង ។ រមណីយដ្ឋានទឹកធ្លាក់ច្រកល្អៀងនេះថ្ងៃសៅរ៍-អាទិត្យមិនសូវមានភ្ញៀវទេ ទាល់តែថ្ងៃបុណ្យចូលឆ្នាំចិន ចូលឆ្នាំខ្មែរ ភ្ជុំបិណ្ឌ ទើបមានមនុស្សទៅលេងច្រើន ។ សេវាចូលទៅលេងកំសាន្តកន្លងមកម្នាក់៥០០រៀល ប៉ុន្តែឆ្នាំនេះ១.០០០រៀល ។
លោកប្រធានមន្ទីរឱ្យដឹងថា សម្តេចតេជោហ៊ុន សែន បានផ្តល់ផ្លូវក្រួសក្រហមចូលទៅកាន់រមណីយដ្ឋាននេះ ប្រវែង២៧គីឡូម៉ែត្រ តាំងពីឆ្នាំ២០០៦មកម៉្លេះ ប៉ុន្តែកងវិស្វកម្មទើបតែចាប់ផ្តើមកសាងនៅឆ្នាំ២០១០នេះ ដោយចាក់ដីពង្រីកទទឹងផ្លូវបានប្រវែង១១គីឡូម៉ែត្រ ចាក់ក្រួសក្រហមបាន១គីឡូម៉ែត្រ ចាក់ក្បាលស្ពាន២កន្លែង (តាំងល្វា និងទួលត្បែង) និងដំណើរការសង់បន្ថែមលើស្ពានចាស់ចំនួន៣ និងលូ៤កន្លែងទៀត ប៉ុន្តែដោយសាររដូវនេះភ្លៀងក៏ផ្អាកមួយរយៈសិន លុះពេលរាំងភ្លៀងទើបដំណើរការបង្ហើយ ៕
ចែករំលែកព័តមាននេះ