ខេត្តមណ្ឌលគិរី ៖ ខណៈជំងឺកូវីដ១៩កាន់តែធូរស្រាល វិស័យទេសចរណ៍នៅក្នុងខេត្តមណ្ឌលគិរីក៏កាន់តែប្រសើរឡើងបន្តិចម្ដងៗ ដោយសង្កេតឃើញថា មួយរយៈចុងក្រោយនេះមានភ្ញៀវទេសចរចូលទៅកម្សាន្តជាបណ្ដើរវិញហើយ នៅតាមគោលដៅទេសចរណ៍នានាចាប់ផ្ដើមមានមនុស្សម្នាជាធម្មតា ខុសប្លែកកាលពីអំឡុងខែមីនា និងខែមេសា ដែលមានសភាពស្ងាត់ជ្រងំ ។
ជាក់ស្ដែង នៅរមណីយដ្ឋានកោះម្យើលលើ អ្នកទេសចរជាច្រើនបានទៅកម្សាន្តទីនោះ មានទាំងអ្នកទេសចរក្នុងខេត្តផ្ទាល់ និងទេសចរមកពីបណ្ដាខេត្តផ្សេងៗ ទោះបីជារមណីយដ្ឋានមួយនេះ ស្ថិតនៅឆ្ងាយពីក្រុងសែនមនោរម្យជាង១០០គីឡូម៉ែត្រ រហូតក្បែរព្រំប្រទល់ខេត្តរតនគិរីឯណោះ ។ កោះម្យើលលើ ជារមណីយដ្ឋានមួយយ៉ាងប្លែក បើធៀបនិងបណ្ដារមណីយដ្ឋានផ្សេងទៀតក្នុងខេត្តមណ្ឌលគិរី ព្រោះថា រមណីយដ្ឋាននេះ ស្ថិតតាមបណ្ដោយដងទន្លេស្រែពក មានវាលខ្សាច់យ៉ាង ស្រស់ស្អាត មានស្ថានភាពទឹករាក់ល្មម អំណោយផលដល់ការលេងកម្សាន្តជាខ្លាំងទាំងក្មេងៗនិងមនុស្សចាស់ ។
អ្នកទេសចរ ដែលបានទៅកម្សាន្តទីនោះលើកឡើងថា ចំណុចពិសេសរបស់រមណីយដ្ឋានកោះម្យើលលើ ព្រោះស្ថិតតាម ដងទន្លេ មានព្រៃឬស្សីអមតាមមាត់ច្រាំងទន្លេជាម្លប់សម្រាប់អ្នកទេសចរសម្រាក ឬអាចវេចខ្ចប់អាហារទៅចម្អិនហូប ជាលក្ខណៈគ្រួសារយ៉ាងសប្បាយរីករាយ ។
រមណីយដ្ឋាននេះមានវាលខ្សាច់ ស្ថានភាពទឹកមិនហូរខ្លាំងអាចលេងកម្សាន្តដោយសុវត្ថិភាព មិនតែប៉ុណ្ណោះ ទីនេះប្លែកខុសពីរមណីយដ្ឋានដទៃក្នុងខេត្ត ព្រោះតំបន់ទេសចរណ៍ភាគច្រើនក្នុងខេត្ត មណ្ឌលគិរី ជាកន្លែងគយគន់ទេសភាពព្រៃភ្នំ ឬក៏ជាទឹកជ្រោះ ទឹកអូរ ជាដើម ដែលអាចចាត់ទុកថា រមណីយដ្ឋាន កោះម្យើលលើជាកន្លែងទេសចរណ៍តែមួយគត់របស់ខេត្តមណ្ឌលគិរីដែលស្ថិតជាប់ដងទន្លេ ។
នៅរមណីយដ្ឋានកោះម្យើលលើអ្នកទេសចរណ៍ក៏អាចជួលទូករបស់អ្នកស្រុក ដើម្បីជិះលេងកម្សាន្តមើលទេភាពតាមដងទន្លេ ។ រមណីយដ្ឋានស្ថិតនៅភូមិកោះម្យើលលើ ឃុំណងឃិលឹក ស្រុកកោះញែក មានចម្ងាយផ្លូវប្រមាណ១៤០ គីឡូម៉ែត្រពីក្រុងសែនមនោរម្យ ផ្លូវចូលទៅរមណីយដ្ឋានប្រហែល៤០គីឡូជាផ្លូវគ្រួសក្រហម ប៉ុន្តែរមនីយដ្ឋាននេះមាន ឆ្នេរខ្សាច់រំលេចឡើងតែនៅរដូវប្រាំងប៉ុណ្ណោះ ចំណែករដូវរស្សាទឹកនឹងជន់លេចអស់ ។
អភិបាលខេត្តមណ្ឌលគិរី លោក ស្វាយ សំអ៊ាង បានប្រាប់កាលពីប៉ុន្មានថ្ងៃមុននេះថា វិស័យទេសចរណ៍ក្នុងខេត្តមណ្ឌលគិរី ទើបល្អឡើងវិញតិចតួច ដោយភ្ញៀវទេសចរដែលចាប់ផ្ដើមចូលមកកម្សាន្តមានប្រមាណ ៣%ទៅ៥%ប៉ុណ្ណោះ ៕
ចែករំលែកព័តមាននេះ